ديماش قۇدايبەرگەنوۆ تىڭدارماندارىنا العىسىن ءبىلدىردى

استانا. قازاقپارات - ديماش قۇدايبەرگەنوۆ ءوزىنىڭ ونەرىنە ءتانتى جاندارعا العىسىن ءبىلدىردى، دەپ حابارلايدى «قازاقپارات» ح ا ا- ءنىڭ مەنشىكتى ءتىلشىسى.

قىتايداعى «I am a Singer-2017» بايقاۋىنا قاتىسۋشى قازاقستاندىق ءانشى ءوزىنىڭ ونەرىنە باس يۋشىلەرگە ينستاگرامداعى قولداۋلارى ءۇشىن العىس ءبىلدىردى. ول ءوزىنىڭ پوستىن اعىلشىن جانە قازاق تىلدەرىندە جازدى.

«مەن ءوزىمنىڭ شەت مەملەكەتتەردەگى دوستارىم مەن قازاقستانداعى مەنىڭ ونەرىمدى باعالاۋشى ازاماتتارعا العىسىمدى بىلدىرگىم كەلەدى. مەن ارنايى فانكلۋبتىڭ قۇرىلعانىنا ريزامىن، مەن قىتاي، ا ق ش، جانە ەۋروپا ەلدەرىنەن قولداۋ كورىپ وتىرعانىما قۋانىشتىمىن»، - دەپ جازدى ول الەۋمەتتىك جەلىدە.

ايتا كەتەيىك، قىتايدىڭ چانشا قالاسىندا «I am a Singer-2017» مۋزىكالىق شوۋى جالعاسۋدا. ق ر مادەنيەت جانە سپورت مينيسترلىگىنىڭ حابارلاۋىنشا، ديماش قۇدايبەرگەنوۆ كەلەسى كەزەكتە استانا ۋاقىتى بويىنشا ساعات 20-05 تە ونەر كورسەتەدى. باعدارلامانىڭ ءبىرىنشى كەزەڭى بويىنشا الدىدا كەلە جاتقان قازاقستاندىق ديماش قۇدايبەرگەن ۇلى Hunan TV باستى ويىن- ساۋىق تەلەارناسىنىڭ مۋزىكالىق شوۋىندا ءوزىنىڭ تىڭدارماندارىن ونەرىمەن ءتانتى ەتۋىن جالعاستىرا بەرمەك.

بايقاۋدىڭ ەكىنشى كۇنىندە ول ۆيتاستىڭ «وپەرا №2» ءانىن ورىندايدى. ايتا كەتەتىن ماسەلە - ەرەكشە تانىمال ازيالىق بايقاۋدىڭ ەرەجەسى وتە كۇردەلى. وعان تەك تەك ءوز ەلىندە ەرەكشە تانىمال، حالىقارالىق كونكۋرستاردىڭ جەڭىمپازدارى عانا قاتىسا الادى. ۇيىمداستىرۋشىلار ۇمىتكەرلەردىڭ قاي كۇنى قانداي ءان ايتاتىنىن وزدەرى تاڭدايدى.