كومىردى قىتايعا تاسىمالدايمىز دەپ، ەكولوگيانى ۇمىتپايىق - ۇكىمەت باسشىسى

استانا. قازاقپارات - ۇكىمەتتىڭ بۇگىنگى وتىرىسىندا پرەمەر-ءمينيستردىڭ ءبىرىنشى ورىنباسارى اسقار مامين رەسەي فەدەراتسياسىنىڭ قازاقستاندىق كومىردى ساتىپ الۋ كولەمىن ازايتاتىندىعىن دەگەنمەن، ەكىباستۇز كومىرىن كورشى قىتاي ەلىنە ساتۋعا بولاتىندىعىن جەتكىزدى، دەپ حابارلايدى قازاقپارات ءتىلشىسى.

«ارينە، بىزگە وسى سالادا بولىپ جاتقان وزگەرىستەردى ەسكەرىپ وتىرۋ قاجەت. ماسەلەن، كورشى رەسەي 2030 -جىلعا دەيىن كومىر ءوندىرىسىن 400 ميلليون توننادان 500 ميلليونعا دەيىن ارتتىرۋدى جوسپارلاپ وتىر. وعان قوسا، ەكىباستۇز كومىرىن ءوز كومىرىمەن الماستىرامىز دەپ جاتىر. وسىنىڭ ءبارى قازاقستاندىق شيكىزاتتىڭ ەكسپورتىن قىسقارتۋى ابدەن مۇمكىن. سوندىقتان بىزگە جاڭا نارىقتاردى ىزدەۋ كەرەك. كولىكتىك- لوگيستيكا جاعىن دا الدىن الا ويلاستىرىپ قويعان ءجون. وسى ورايدا، قىتايدىڭ كومىر يمپورتىن 200 ميلليون تونناعا دەيىن ارتتىرىپ وتىرعانىن اتاپ ءوتۋ كەرەك. وسىنى زەردەلەپ، شەكارا جاقىن ايماقتاردان كومىر جەتكىزۋ ماسەلەسىن قاراستىرۋعا بولادى»، - دەيدى مامين.

دەگەنمەن، ۇكىمەت باسشىسى باقىتجان ساعىنتايەۆ الدىمەن ەكولوگيالىق ماسەلەلەردى ەسكەرۋ كەرەكتىگىن جەتكىزدى. «ەكىباستۇزدى ءبارىمىز جاقسى بىلەمىز. ول جاقتا بولعاندار ەكولوگياسىن دا كورگەن. وسى ورايدا ناقتى ءبىر شارالاردى، سونىڭ ىشىندە كومىر حيمياسىن دامىتۋدى قولعا العان دۇرىس. كومىر پلاستتارىنان مەتاندى الۋ اسا ماڭىزدى. سول ءۇشىن بۇگىن مامانداردى شاقىرىپ وتىرمىز. ولادىڭ پىكىرىن تىڭدايىق، تاجىريبەسىن زەردەلەيىك دەپ، ارنايى شاقىردىق. سەبەبى ءسىز، اسقار ۇزاقباي ۇلى، جانا قىتايدىڭ كومىر يمپورتىن ۇلعايتقانى جايىندا ايتىپ وتىرسىز عوي. مەنىڭ بىلۋىمشە، قىتاي ۇكىمەتى 2020 -جىلعا دەيىن كومىر ءوندىرىسىن 500 ميلليون تونناعا دەيىن ازايتۋدى جوسپارلاپ وتىر. ولار ەكولوگياعا بايلانىستى وسىنداي شارالاردى قولعا الدى. سوندىقتان وسىنى ءالى دە زەردەلەۋ كەرەك»، - دەپ اتاپ كورسەتتى ساعىنتايەۆ.