پاۆلوداردا ءبىر اي ىشىندە قازاق ءتىلىن مەڭگەرگەن وزگە ۇلت وكىلى «ەكسپو» كورمەسىنە تەگىن بيلەت الادى
بۇل تۋرالى «سەرپىن» ىسكەرلەر ۇيىمى پاۆلودار وبلىسى بويىنشا فيليالىنىڭ ءتوراعاسى دارىن تاجىبايەۆ ءمالىم ەتتى.
«پاۆلودارلىق سەرپىندىكتەر «قازاقستاندىق ارمان» اتتى قوعامدىق بىرلەستىك قۇرعان بولاتىن. وسى ۇيىممەن جانە قازاقستان حالقى اسسامبلەياسى جاستار قاناتىنىڭ جەتەكشىسى ەلينا پاۋليمەن بىرلەسە وتىرىپ، «قازاقشا سويلەۋ وڭاي» جوباسىن باستادىق. ەرەجە بويىنشا قازاق ءتىلىن مەڭگەرۋدى ماقسات تۇتقان كەز كەلگەن وزگە ۇلت وكىلى مەن ءبىر سەرپىندىك قوسىلىپ، جەكە جۇپ بولادى. ولارعا ءبىر اي ۋاقىت بەرىلىپ، كونكۋرستىق جۇيەدە جەڭىمپاز انىقتالادى. شامامەن 1 - ناۋرىز كۇنى قورىتىندىسى شىعىپ، ناتيجەلى جۇمىس جاساعان جۇپ «ەكسپو-2017» كورمەسىنە تەگىن بيلەت ۇتىپ الادى»، - دەدى وبلىستىق «سەرپىن» فيليالىنىڭ ءتوراعاسى.
دارىن تاجىبايەۆتىڭ ايتۋىنشا، بۇگىندە 44 ادام جازىلىپ، 22 جۇپ ىسكە كىرىسىپ كەتكەن. جوبانىڭ نەگىزگى ماقساتى - قازاق ءتىلىن دامىتۋ، سەرپىندىك ستۋدەنتتەردىڭ جەرگىلىكتى ادامدارمەن قارىم- قاتىناسىن نىعايتۋ.