باس پروكۋروردىڭ ورىنباسارىنا پىشاق وتپەيتىن ناندى ساتىپ جىبەرگەن
كراۆچەنكونىڭ ايتۋىنشا، كاسىپكەرلەردىڭ قۇقىعىن قورعاۋ قاجەت، ءبىراق ولاردىڭ مىندەتتەرىن دە ەستەن شىعارماعان ءجون.
«كەشە عانا مەنىمەن بىرگە تۇراتىن قاريا ءبىر ءونىمدى الدى. سويتسە، ونى وتكەن جىلى وندىرگەن. قارت ادامنىڭ كوزى كورمەسە دە، مەن انىق كورىپ وتىرمىن عوي. وسىدان ءبىر جارىم اي بۇرىن مەن ءوزىم دۇكەننەن نان ساتىپ الدىم. ونىڭ قاتتىلىعى سونداي، پىشاقپەن دە كەسە المادىم. سوندا بۇل ناندى وپ-وڭاي ساتا سالدى. مەن تاڭعالدىم. كاسىپكەرلەر جاۋاپكەرشىلىكتى سەزبەي مە؟ سول سياقتى جەمىس- جيدەكتىڭ دە ساپاسى سىن كوتەرمەيدى. استانانىڭ ماڭدايالدى ساۋدا ورتالىعى بولىپ سانالاتىن جەرلەردە كوگەرىپ كەتكەن جەمىس- جيدەكتى ساتادى. ماسقارا عوي! مەن وسىنى ىلعي ويلايمىن. قالاي ءوزى؟ قىزمەت كورسەتۋ ساپاسى قايدا؟ ءىرىپ كەتكەن ءسۇت، ىرىمشىك... مەيرامحانالار مەن ءدامحانالاردا كىر وڭەزدەنىپ كەتكەن، تەمەكىنىڭ ءيىسى ءسىڭىپ كەتكەن بولمەلەر، كينوتەاترداعى كۇل- قوقىس... وتىرعىڭ كەلمەي كەتەدى. قوناق ۇيلەر، تاكسي جانە تاعى باسقا قوعامدىق ورىنداردىڭ قىزمەت كورسەتۋ ساپاسىن ايتا بەرسەڭ، پروبلەمانىڭ ۇشى-قيىرى كورىنبەيدى»، - دەيدى باس پروكۋروردىڭ ورىنباسارى.
ونىڭ سوزىنە قاراعاندا، كاسىپكەرلەردىڭ قۇقىعىن قورعاۋمەن قاتار تۇتىنۋشىلاردىڭ قۇقىعىن دا ۇمىتپاۋ قاجەت. وسى ورايدا كراۆچەنكو مەملەكەتتىك ورگاندار تاۋار مەن قىزمەت كورسەتۋ ساپاسىن تەكسەرىپ ۇلگەرمەسە، جەكە مەنشىك اۋديتورلارعا جول بەرۋ كەرەك دەپ سانايدى.
ايتا كەتەيىك، بۇگىنگى وتىرىس بارىسىندا باس پروكۋراتۋرا اقىلعا سىيمايتىن كەيبىر تەكسەرىستەردى جاريالادى. پروكۋراتۋرانىڭ دەپارتامەنت باسشىسى مارات سەكسەمبايەۆتىڭ ايتۋىنشا، جەرگىلىكتى جەردە كاسىپكەرلەدى تەكسەرەتىن ورگاندار ويىنا كەلگەندى ىستەپ، ورىنداۋعا مۇلدەم كەلمەيتىن تالاپتاردى قويىپ ءجۇر. ال «اتامەكەن» پالاتاسى كاسىپكەرلەرگە قاتىستى مىڭداعان تالاپتاردىڭ قىسقارتىلعانىن مالىمدەدى.
اۆتور: ارمان اسقاروۆ