دانيار ەلەۋسىنوۆ كاسىپقوي بوكستاعى ءبىرىنشى جەكپە-جەگىن قىتايدا وتكىزەدى

استانا. قازاقپارات - كەشە وليمپيادا چەمپيونى دانيار ەلەۋسىنوۆتىڭ كاسىپقوي بوكسقا اۋىسقانى بەلگىلى بولدى.

العاشقى جەكپە-جەگىن قىتاي جەرىندە وتكىزەدى. بۇل تۋرالى «Fighnews.com»  پورتالىنا سىلتەمە جاساپ، ماسساگەت. ك ز سايتى حابارلادى.

قازاقستاندىق بوكسشى كاسىپقوي بوكستاعى العاشقى جەكپە-جەگىن مامىر ايىندا وتكىزبەك. «MJA Entertainment's» پروموۋتەرلىك كومپانياسى باسشىسى مايك التامۋردىڭ ايتۋىنشا ءبىرىنشى كەزدەسۋىن پەكيندە ۇيىمداستىرۋ جوسپارلانىپ وتىر ەكەن. ول دانياردى ەكى جىل ىشىندە الەم چەمپيونى اتاندىرعىسى كەلەدى.

- ءبىزدىڭ جوسپار بويىنشا دانيار ەلەۋسىنوۆ ەكىنشى جانە ءۇشىنشى جەكپە-جەكتەرىندە-اق قۇرلىقتىق چەمپيوندىق اتاقتارعا تالاساتىن بولادى. ال ەكى جىل ىشىندە الەم چەمپيونى اتانامىز. ول 18 اي ىشىندە كاسىپقوي بوكستا شىڭدالىپ، ەكى جىلدان كەيىن چەمپيوندىق اتاق ءۇشىن جەكپە-جەككە شىعاتىنىنا سەنىمدىمىن. دانيار قارىمتا سوققى جاساۋدا اسا جىلدام. ونىڭ بويىندا اتاقتى بوكسشىلارعا ءتان سەنىمدىلىك بار. ول ەشتەڭەدەن قورىقپايدى، - دەدى مايك التامۋر.

دانيار ەلەۋسىنوۆتىڭ كاسىپقوي بوكستاعى جەكە جاتتىقتىرۋشىسى رەتىندە اكەسى مارات ەلەۋسىنوۆ قاداعالايتىن بولادى. ال اقپان ايىندا رەسمي تۇردە قول قوياتىن «MJA Entertainment's» پروموۋتەرلىك كومپانياسىنىڭ جاتتىعۋ لاگەرى فلوريدادا (ا ق ش) ورنالاسقان. قازاقستاندىق بوكسشىنى اكەسىنەن بولەك امەريكالىق جاتتىقتىرۋشىلار دا جاتتىقتىراتىن بولادى.

ايتا كەتەيىك، دانيار ەلەۋسىنوۆتىڭ اعاسى داۋرەن ەلەۋسىنوۆ تا كاسىپقوي بوكستا ەل نامىسىن قورعاپ جۇرگەن بوكسشىلارىمىزدىڭ ءبىرى. 2014-جىلدان بەرى التى جەكپە-جەك وتكىزىپ، بەسەۋىندە جەڭىسكە جەتتى. ءبىر جەكپە-جەگىندە قارسىلاسىمەن تەڭ ءتۇستى. داۋرەن دە جاقىن ۋاقىتتا دانيار باق سىنايتىن پروموۋتەرلىك كومپانيامەن كەلىسىمگە كەلمەك.