دۇعا وقىعانى ءۇشىن اقشا سۇراعان يمام جۇمىستان بوساتىلدى

استانا. قازاقپارات - اتىراۋ وبلىسىندا ءدىن قىزمەتكەرىنىڭ ەتيكاسىن بۇزىپ، ءدىني بورىشىن دۇرىس ورىنداماعانى ءۇشىن يمامدى جۇمىستان بوساتتى، دەپ جازادى mgorod.kz.

قازاقستان مۇسىلماندارىنىڭ ءدىني باسقارماسىنىڭ باسپا ءسوز قىزمەتى حابارلاعانداي، سارسەنباي كەنجەبايەۆ ءدىن قىزمەتكەرىنىڭ ەتيكاسىنا ساي كەلمەيتىن ارەكەتكە جول بەرگەن. يمام دۇعا وقىعانى ءۇشىن اقشا سۇراعان. وسى دەرەك بويىنشا قازاقستان مۇسىلماندارىنىڭ ءدىني باسقارماسى شۇعىل تەكسەرىس وتكىزدى.

«ءدىن قىزمەتكەرىنىڭ ەتيكاسى» قۇجاتىندا كورسەتىلگەن تالاپتاردى، سونداي-اق سەنىپ تاپسىرىلعان ءدىني بورىشىن دۇرىس ورىنداماعانى ءۇشىن سارسەنباي كەنجەبايەۆ باس ءمۇفتي ەرجان قاجى مالعاجى ۇلىنىڭ 2017-جىلدىڭ 10-قاڭتار كۇنگى بۇيرىعىمەن قازىرگى قىزمەتىنەن بوسادى»، - دەپ حابارلادى باسقارمانىڭ باسپا ءسوز قىزمەتى.

ەسكە سالا كەتەيىك، سارسەنباي كەنجەبايەۆ اتىراۋ وبلىسى قۇرمانعازى اۋدانى ەڭبەكشى اۋىلىنا 2012-جىلدىڭ 30-قاراشا كۇنى ۋاقىتشا يمام بولىپ تاعايىندالعان بولاتىن.