قازاق قىزى جارتى عاسىر عۇمىرىن قىرعىز اۆياتسياسىنا ارناعان- فوتو
وسىدان 55 جىل بۇرىن قىرعىز كوگىن العاش باعىندىرعان قارشاداي عانا قازاق قىزى جارتى عاسىر ءومىرىن ازاماتتىق اۆياتسياعا ارناعان. قازاقپارات تىلشىسىمەن اڭگىمەلەسكەن تىلەۋقور بوشىموۆا اسپانعا ۇشسام دەگەن اسقاق ارمانى تۋرالى، سول ارمانعا جەتەر جولداعى قيىندىق پەن قىزىقتارى تۋرالى ەستەلىكتەرىن ايتىپ بەردى.
«مەن قىرعىز رەسپۋبليكاسىنىڭ چۋي وبلىسى ماسكەۋ اۋدانىنا قاراستى تۇلەك اۋىلىندا تۋدىم. بۇل جەرگە اتا- انام 30- جىلدارى قاراعاندى وبلىسىنان كوشىپ كەلگەن ەكەن. كەڭ دالادا ءوستىم، بالا كەزىمدە جىلقى جايىپ، تۇيە باقتىم. سوندا، اسپاننان ارى- بەرى ۇشقان ۇشاقتاردى كوپ كورەتىنمىن. 17 جاسىمدا ەڭ العاش رەت ۇشاققا وتىرعان مەن «ستيۋاردەسسا» دەگەن مامان يەسىن العاش رەت كوردىم. «نە دەگەن ادەمى قىز!» دەپ تاڭ قالعان مەن «ءوزىم دە وسىلاي ۇشامىن» دەگەن ويعا كەلدىم»، - دەيدى بالا ارمانىن ەسكە العان تىلەۋقور اپا.
الايدا، قازاق قىزىنىڭ بۇل ارمانى بىردەن ورىندالا قويماعان ەكەن.
«1959 -جىلى مەن فرۋنزە قالاسىنا كەلدىم. جانىمداعى قىزداردىڭ بىرەۋى تىگىن تىكسە، ەكىنشىسى توقىماعا اۋەس ەدى. ال، مەنى ونداي دۇنيەلەر قىزىقتىرمادى، ۇشۋعا قۇمارلانا بەردىم. ءسويتىپ، پاراشيۋتتان سەكىرۋ سپورتىنا دەن قويدىم. 1964 -جىلى تروللەيبۋس ايالداماسىندا تۇردىم دا ىشىمنەن ءبىر تىلەك تىلەدىم: ەگەر دە ءبىرىنشى وتكەن تروللەيبۋس تەاترعا قاراي بارا جاتسا، ءارتىس بولامىن، ەگەر، اۋەجايعا بارا جاتسا، اۆياتسياعا بارامىن دەدىم. ءبىرىنشى تروللەيبۋس جوعارى جاققا، ياعني، اۋەجاي باعىتىنا قاراي ءجۇردى. ويلانباستان، ۇشقىشتار ۋچيليشەسىنە كەلدىم، ءبىراق، ستۋدەنتتەردى ىرىكتەۋ اياقتالىپ قويعان ەكەن.
«ءسىزدى ديكتور رەتىندە قابىلدايىق، بىرنەشە ايدان كەيىن ۋچيليشەگە وقۋعا اۋىستىرامىز، دەدى. وسىلايشا، مەن ازاماتتىق اۆياتسياداعى العاشقى ديكتور بولدىم. 1965 -جىلى ۋچيليشەگە اۋىسىپ، ستيۋاردەسسا اتاندىم»، - دەيدى ت. بوشىموۆا.
وقۋ بىتىرگەننەن كەيىن تىلەۋقور ىزەمبەك قىزى 17 جىل بويى كوكتە قالقىدى. 20 مىڭ ساعات بويى ۇشقان ەكەن. سول 17 جىلدا قىرعىز اۆياتسياسىنداعى قازاق قىزى تالاي قىزىقتاردى باستان وتكەرىپتى.
«ءبىر رەت مەنىڭ قولىما 6 ايلىق بالانى تاستاپ كەتتى. ونىڭ اناسى ستۋدەنت ەدى. سوندىقتان، ماسكەۋدە قالىپ، سىناق تاپسىرۋى كەرەك بولدى. ستۋدەنت قىز بالاسىن ماعان قالدىردى دا فرۋنزە قالاسىنان تۋىستارى كۇتىپ الاتىنىن، تەلەگرامما دا جولدانىپ قويعانىن ايتتى. فرۋنزەگە ۇشىپ كەلدىك، تەلەگرامما دا جوق، كۇتىپ الاتىن اتا- انا دا جوق، تۋىس- تۋعان دا جوق. ستۋدەنت قىزدان كۇتىپ الاتىن كىسىلەردىڭ ادرەسىن جازىپ العانىم سونداي جاقسى بولار ما، تاكسيگە وتىردىم دا ءتيىستى مەكەنجايعا كەلدىم. تاڭعى ساعات 07-00 بولاتىن. ەسىكتى كىشكەنە بالا اشىپ تۇر، اتا- انام جوق، بازارعا كەتكەن دەيدى. سونىمەن، نە كەرەك، بالانى امان- ەسەن جەتكىزدىم. كەيىن، بالانىڭ اتا- اجەسى مەنى تاۋىپ الىپ، العىس ايتتى»، - دەيدى اۆياتسيا سالاسىنا ەڭبەگى سىڭگەن بوشىموۆا.
تىلەۋقور بوشىموۆانىڭ وتباسى دا اۆياتسيا سالاسىندا ەڭبەك ەتەدى ەكەن. جولداسى مارات بەكتەنوۆ حالىقارالىق رەيستەردىڭ 1 ساناتتى ينجەنەر- ۇشقىشى بولعان ەكەن. جۋىردا عانا، 2017 -جىلدىڭ 7 - قاڭتارىندا مارات بەكتەنوۆتىڭ قۇرمەتىنە ونىڭ تۋعان جەرى - قويتاس اۋىلىنىڭ ءبىر كوشەسىنە قىرعىز رەسپۋبليكاسىنىڭ اتاقتى ۇشقىشىنىڭ ەسىمى بەرىلگەن ەكەن.
ۇشقىشتاردىڭ وتباسىندا دۇنيەگە كەلگەن بالالار دا اتا- انا جولىن جالعاستىرعان. تىلەۋقور بوشىموۆا مەن مارات بەكتەنوۆتىڭ ەكى قىزى دا قازىر حالىقارالىق رەيستەردىڭ ستيۋاردەسسالارى. سامات اتتى ۇلدارى «قىرعىزستان اۋە جولدارى» اتتى اۋە كومپانياسىنىڭ قىزمەتكەرى. بوشىموۆانىڭ 7-سىنىپتا وقيتىن نەمەرەسى دە اۆياتورلار ديناستياسىن جالعاستىرامىن دەيدى ەكەن.
قىرعىز رەسپۋبليكاسىنىڭ ازاماتتىق اۆياتسياسىنا جارتى عاسىر عۇرمىرىن ارناعان تىلەۋقور ىزەمبەك قىزى قازىر قىرعىزستاننىڭ ازاماتتىق اۆياتسيا مۋزەيىن باسقارىپ وتىر.
تىلەۋقور بوشىموۆا قوعامدىق جۇمىستارعا دا بەلسەنە اتسالىسقان ادام. كوپ جىلداردان بەرى قازاق دياسپوراسى ءتوراعاسىنىڭ ورىنباسارى، قىرعىزستان ايەلدەرى كونگرەسسىنىڭ مۇشەسى. «قىرعىزستاننىڭ ەڭبەك سىڭىرگەن اۆياتورى»، «قىرعىزستاننىڭ مادەنيەت ۇزدىگى» سياقتى ماراپاتتارىمەن قاتار، قازاقستاننىڭ جانە رەسەيدىڭ ماراپاتتارىنا يە بولعان.
اۆتور: كەنجەكەي توقتامۇرات قىزى