اسحات سادىرباي «جاڭالىعى جوق» تەلەارنالار تاراپىنا سىن ايتتى

استانا. قازاقپارات - وتاندىق تەلەارنالاردىڭ جىل سايىن جاڭا جىلعا ارنايى ۇيىمداستىراتىن باعدارلامالارى مەن جوبالارىنا كوپشىلىكتىڭ كوڭىلى تولا قويمايتىنى اۋەلدەن ايقىن.

جىلداعى سارىننىڭ قايتالانا بەرەتىنى بار. وسى ورايدا تانىمال تەلەجۇرگىزۋشى اسحات سادىرباي دا 2017 -جىلدى تەلەارنالار تاراپىنا سىن ايتۋدان باستادى. وعان تەلەارنالاردىڭ تاۋىق جىلىنا ارناپ ۇيىمداستىرعان ساۋىقتارى ۇناماپتى.

«مەرەكەلىك ەفيردى ءجىتى قاداعالاۋعا، تاپجىلماي تاماشالاۋعا مۇمكىندىك تە، ۋاقىت تا بولمادى. اراكىدىك باستى ارنالاردىڭ باستى كونسەرتتەرىن شولىپ شىقتىم. سول ءبىر ءان، سول ءبىر ءانشى. اۆتورلار مۇلدەم ىزدەنبەگەن. جاڭالىق جوق. جىل بويى قۇلاقتىڭ ەتىن جەگەن اندەردى كوزگە ابدەن مەزى بولعان انشىلەر شىرشانىڭ قاسىندا تۇرىپ ورىنداۋى، قالعاندارى داستارحان باسىندا سولارعا قول شاپالاقتاپ وتىرۋى نەشە جىلدان بەرى كەلە جاتقان ۇلى دالانىڭ ماڭگىلىك شابلونىنا اينالىپ كەتكەندەي. لەدپەن، شوۋ بالەتپەن جۇرتتى قازىر تاڭ قالدىرمايسىڭ. ماتەريال قايدا، مازمۇن قايدا، ءمان-ماعىنا قايدا؟ ساعىندىرعان جاقسى اندەر، جاقسى انشىلەر قايدا؟ جوق. رەنىش بولماسىن. سولاي.» - دەپ جازعان جۋرناليست.