استانالىقتار شاحانداعى وقيعادان زارداپ شەككەندەرگە بەلسەندى كومەك كورسەتۋدە - فوتو

استانا. قازاقپارات - الەۋمەتتىك جەلىلەردى پايدالانۋشىلار شاحاندا قۇلاعان (قاراعاندى وبلىسى) ءۇيدىڭ سالدارىنان زارداپ شەككەن وتباسىلارعا ازىق-تۇلىك پەن جىلى كيىم تۇرىندە كومەك ۇيىمداستىردى.

بۇل تۋرالى فەيسبۋك جەلىسىندە «اتامەكەن» ق ر ۇلتتىق كاسىپكەرلەر پالاتاسى ءتوراعاسىنىڭ ورىنباسارى، باسقارما مۇشەسى مۇرات ابەنوۆ جازدى. «كەشە ەرلان سايروۆ پەن Akberen Elgezek باستاعان باستاماشى توپ وكىلدەرى بۇزىلمايتىن ازىق- تۇلىك پەن جىلى كيىم تۇرىندە قايعىلى جاعدايدان زارداپ شەككەن بالالارعا كومەك ۇيىمداستىرۋ جونىندە شەشىم قابىلداعان بولاتىن.

بۇگىن كومەك قابىلداۋ قوعامدىق تىرەگى اشىلدى. ازاماتتاردىڭ بەلسەندىلىگى قاتتى قۋانتتى. كومەك قولىن سوزعان ازاماتتار كۇنى بويى كەلىپ جاتتى. ولاردىڭ كوپشىلىگى ورتا تاپ وكىلدەرى. ولار قولدارىنان كەلگەندەرىن جەتكىزىپ جاتىر.

«ەرتەڭ قوعامدىق كومەك قابىلداۋ ورنى ءوزىنىڭ جۇمىسىن جالعاستىرادى. مەكەن-جايىن ەسكە سال كەتەيىن: استانا قالاسى، مومىش ۇلى مەن ساتپايەۆ كوشەلەرىنىڭ قيىلىسىنداعى «بەلىي ۆەتەر» دۇكەنى. كەڭسە 3- قاباتتا. قابىلداۋ تىرەگىنىڭ جۇمىسى تاڭعى ساعات 10  نان كەشكى 17 گە دەيىن ءۇزىلىسسىز جالعاسادى. كومەك كورسەتەم دەۋشىلەر جۇما كۇنى دە كەلە الادى. سەنبى كۇنى جينالعان زاتتار شاحانعا جىبەرىلەدى»، - دەپ قوستى ول.

ايتا كەتەيىك، 1 -قاڭتار كۇنى 22 ساعات 40 مينۋتتار شاماسىندا قاراعاندى وبلىسىنىڭ توتەنشە جاعدايلار دەپارتامەنتىنە شاحان كەنتىندە كوپقاباتتى ءۇيدىڭ قۇلاعانى جونىندە ارنايى حابار كەلىپ تۇسكەن. وقيعا ورنىنا توتەنشە جاعدايلار قىزمەتىنىڭ كۇش- قۇرىلىمدارى مەن ارنايى تەحنيكالارى جونەلتىلىپ، تۇرعىنداردى ەۆاكۋاتسيالاۋ جۇمىستارى جۇرگىزىلدى. شاحان كەنتىنىڭ اكىمدىگى جانىنان جەدەل جەلى قىزمەتى ۇيىمداستىرىلدى. قيراعان ءۇيدىڭ ۇيىندىلەرىنەن 9 ادامنىڭ ءمايىتى تابىلدى. ولاردىڭ 3 ۋى ەر ادام، 3 ۋى ايەل ادام، تاعى ۇشەۋى بالالار. مەرت بولعان وتباسىنىڭ ءاربىر مۇشەسىنە 1 ميلليون تەڭگە ماتەريالدىق كومەك كورسەتىلەدى. اۋرۋحانادا جاتقان، زارداپ شەككەندەر ءۇشىن 500 مىڭ تەڭگەدەن تولەنەدى.