سامبودان ءتورت مارتە الەم چەمپيونى ە. بايباتىروۆ ەگىز قىزدىڭ اكەسى اتاندى
ەربولات پەن جارى ايگەرىمنىڭ وسىعان دەيىن ەرداۋلەت، ەرمۇحامەت ەسىمدى ۇلدارى بار-تۇعىن. ولاردىڭ ءبىرىنىڭ جاسى 4 تە، ەكىنشىسى 3 تە. ەندى، مىنە، ولاردىڭ قاتارىنا قوس بىردەي كويلەكتىگەر قوسىلىپ، ەربولات پەن ايگەرىم كوپ بالالى اتا-انا اتانىپ وتىر.
«جاڭا جىل وسىلايشا ءبىزدىڭ وتباسىمىز، بارشا اعايىن- تۋما ءۇشىن ۇلكەن قۋانىشپەن باستالىپ وتىر. ەندى ەگىز قىزىمىزعا تۋما- تۋىسپەن اقىلداسىپ، جاقسى ات قويماقشىمىز. ءوزىمنىڭ جوسپارىمدى ايتا كەتسەم، بيىل تاعى ءبىر الەم چەمپيوناتىندا باعىمدى سىناعىم كەلەدى. ول ءۇشىن الدىمەن دۇرىستاپ دايىندالىپ، ىرىكتەۋ جارىستارىندا جۇلدەگەر اتانىپ، جولدامانى جەڭىپ الۋ كەرەك. بيىلعى دۇنيەجۇزىلىك دودا 10-12 قاراشادا رەسەيدىڭ سوچي قالاسىندا وتەدى»، دەدى «قازاقپارات» تىلشىسىنە ەربولات بايباتىروۆ.
ەسكە سالا كەتەيىك، بۇدان بۇرىن ەرەسەكتەر اراسىندا سپورتتىق سامبودان ءتورت دۇركىن الەم چەمپيونى اتانعان، قازاقستاننىڭ ەڭبەك سىڭىرگەن جاتتىقتىرۋشىسى رايىمبەك مەڭدىعاليەۆ باپتايتىن پوليتسيا اعا لەيتەنانتى، جاسى وتىزدان اسىپ بارا جاتقان ە. بايباتىروۆ ءۇشىن وتكەن جىل دا جەمىسسىز بولعان جوق. بولگاريا استاناسى سوفيا قالاسىندا وتكەن سامبودان الەم چەمپيوناتىندا ەربولات 57 ك گ سالماقتا كۇمىس جۇلدەگەر اتاندى. ەندى سونىڭ التىن القاعا اينالۋىن تىلەيىك.
اۆتور: ەلجان ەرالى