استانالىقتار دۇكەننەن نان تابا الماي ءجۇر

استانا. قازاقپارات - استاناداعى دۇكەندەردە ەكى كۇننەن بەرى ناندى اكەلمەي ءجۇر. سونىڭ سالدارىنان دۇكەن سورەلەرى بوس تۇر.

ال جەلتوقساننىڭ31 - كۇنىنەن قالعان ناندى ەشكىم العىسى كەلمەيدى، دەپ حابارلايدى قازاقپارات ءتىلشىسى. «ءيا، سوڭعى رەت ناندى جەلتوقساننىڭ 31- كۇنى اكەلگەن. مىنە، سودان قالعانى - ەكى بولكە. كەشەدەن بەرى تۇر. ەشكىم المايدى. ەندى، بىزگە نان اكەلىپ جۇرگەندەر - جەكە مەنشىك ناۋبايحانالار. ولار كەشەدەن بەرى دەم الىپ جاتىر-اۋ دەيمىن. بۇگىن نان كەلە مە، جوق پا، ونى ايتا المايمىن. كۇنىنە ەكى رەت، تاڭەرتەڭ جانە كەشكى ۋاقىتتا جاڭا پىسكەن ناندى اكەلىپ جۇرەتىن»، - دەيدى الماگۇل ەسىمدى دۇكەن ساتۋشىسى. بەس قاباتتى ءۇيدىڭ استىندا ورنالاسقان تاعى ءبىر دۇكەننىڭ ساتۋشىسى ناعيما دا ناننىڭ ەكى كۇننەن بەرى جەتكىزىلمەي وتىرعانىن راستاپ وتىر.

«سوڭعى رەت جاڭا جىلدىڭ الدىندا ءبىر رەت اكەلگەن. سودان بەرى ءالى كەلگەن جوق. دەم الامىز دەگەن. بۇگىن كەلمەيدى. ەرتەڭ تاراتۋدى باستايدى- اۋ دەيمىن»، - دەيدى ول. ونىڭ سوزىنە قاراعاندا، ۇساق دۇكەندەردىڭ ءبارى ەكى كۇننەن بەرى نانسىز وتىر. ال ءىرى ساۋدا ورتالىقتارىندا جاڭا پىسكەن نان بار. سەبەبى ونداي جەرلەردە ناۋبايحانالار دەمالىسسىز ىستەيدى. دەگەنمەن، استانالىقتار ناۋبايحانالاردىڭ بارىنە بىردەي نان تاراتقان دۇرىس دەپ سانايدى. ويتكەنى كەيبىر جەرلەردە ءىرى ساۋدا ورتالىقتارى شالعاي ورنالاسقان. «مەن تاڭ اتقاننان بەرى 4-5 دۇكەندى ارالاپ شىقتىم. بارىندە دە نان جوق. بولسا دا، قاتىپ قالعان. امال جوق. ساۋدا ورتالىعىنا اۆتوبۋسپەن باردىم. ءبىراق ول جەردە ناۋبايحانا جوق. ناندى الدىم. قاڭتاردىڭ 2 سى كۇنى دەپ جازىلعان. ءبىراق ونىڭ ءوزى بۇگىن پىسكەن نانعا ۇقسامايدى»، - دەيدى نۇرلان ەسىمدى قالا تۇرعىنى.

اۆتور: ارمان اسقاروۆ