تيبەتتىكتەردىڭ بالا تاربيەسىندەگى ەرەكشەلىكتەرى
مۇنداي ورەسكەلدىك «تىم نازىك ءارى ەرەكشە» جانداردىڭ كۇناسى.
العاشقى ارالىق 5 جاسقا دەيىن
بالانى حان كورىپ، توبەسىنە كوتەرەدى. ەشتەڭەگە تىيىم سالمايدى. تەك نازارىن بۇرىپ وتىرۋ كەرەك. ەگەر بالا قاۋىپتى نارسە جاساسا، ءتۇرى بۇزىلىپ، قورقىپ شىڭعىرادى. بالا مۇنداي ءتىلدى جاقسى تۇسىنەدى. بەس جاسقا دەيىن بەلسەندىلىك، اينالانى تانۋ، ومىرگى قىزىعۋشىلىق داميدى. بالا ۇزاق لوگيكالىق وي جۇيەسىن قالىپتاستىرمايدى. ماسەلەن، ول وتە قىمبات گۇلسالعىشتى شاعىپ الدى دەلىك. ول مۇنداي نازىك زاتتى ساتىپ الۋ ءۇشىن ماڭداي تەر توگىپ، كوپ ۋاقىت كۇتۋ كەرەكتىگىن تۇسىنبەيدى. جازالاۋدى ول كۇشتىنىڭ الدىندا قىسىم كورۋ دەپ قانا تۇسىنەدى. ءسىز وعان گۇلسالعىش سىندىرۋدى ەمەس، وزىنەن كۇشتىگە باعىنۋدى عانا ۇيرەتەسىز. بۇل سىزگە كەرەك پە؟
ەكىنشى ارالىق 5 جاستان 10 جاسقا دەيىن
بۇل كەزەڭدە بالانى قۇلشا جۇمساۋ ماقسات ەتىلەدى. وعان ءتۇرلى تاپسىرما بەرىپ، سونىڭ ورىندالۋىن قاداعالاۋ مىندەت. جاساي الماعانى ءۇشىن تانگە زاقىم كەلتىرمەي جازالاۋعا دا بولادى. وسى شامادا ونىڭ ساناسى بەلسەندى تۇردە جەتىلەدى. بالا ءوزىنىڭ قىلىعىنا وزگەلەر قالاي قارايتىنىن بولجاۋدى ۇيرەنەدى. وزىنە جاعىمدى قارىم- قاتىناستى قالاي ورناتۋ كەرەكتىگىن ۇعىنادى. تەرىس پيعىل تۋدىرۋدان ساقتانادى. ونى ءتۇرلى ءبىلىم ۇيرەنۋگە جەگۋگە قورىقپاڭىز.
ءۇشىنشى ارالىق 10 جاستان 15 جاسقا دەيىن
بۇل مەزگىلدە بالانى قالاي تاربيەلەۋ كەرەك؟ ونىمەن قانداي قارىم- قاتىناس ورناتۋ ماڭىزدى؟ تەڭدەي كورىڭىز. بىردەي ەمەس، تەڭدەي. ويتكەنى، ءسىز ءبارىبىر وعان قاراعاندا تاجىريبەلى، ءومىر كورگەن ادامسىز. ماڭىزدى نارسەنىڭ بارلىعىندا كەڭەسىپ وتىرىڭىز. اقىلىن سۇراڭىز. ماقتاپ وتىرىڭىز. ءوزى ءبىلىپ ىستەگەنىن قۇپتاڭىز. ءوز ويىڭىزدى پىكىرلەسۋ كەزىندە بايقاتپاي، كەڭەس بەرۋ، اقىل ايتۋ ارقىلى عانا ءبىلدىرىڭىز. ەگەر بىردەڭە ۇناماسا، دەرەۋ تىكەلەي تىيىم سالماۋ كەرەك. تەك سول ماسەلەنىڭ كەرى جاعىنا، ۇتىلاتىن تۇستارىنا باسىمدىق ءتۇسىرىڭىز. بۇل كەزەڭدە بالانىڭ دەربەستىگى قالىپتاسىپ، ەركىن ويلاۋ جۇيەسى داميدى. سوڭعى ارالىق 15 جاستان جوعارى قاراي
وعان قۇرمەتپەن قاراڭىز. ەندى بالا تاربيەلەۋ تىم كەش. تەك نە ەككەنىڭىزدى ورۋدىڭ عانا مۇمكىندىگى بار.
بۇل قاعيدالاردى ورىنداماسا، قانداي جاعداي ورىن الادى؟ - ەگەر بالانى 5 جاسقا دەيىن، ۇرىپ- سوعىپ، باسىپ تاستاسا، ونىڭ ومىرگە دەگەن قىزىعۋشىلىعى جويىلىپ، ومىرلىك بەلسەندىلىگى باسەڭسيدى، ساناسى، اقىلى، يممۋنيتەتى دۇرىس دامىمايدى. بالا ويسىز كۇيى وزىنەن كۇشتىگە باعىنۋدى عانا ۇيرەنەدى. ءتۇرلى وڭباعانداردىڭ وڭاي ولجاسى بولاتىن قۇرباندىق جاساپ شىعاراسىز. - 5 جاستان سوڭ دا ەركەلەتە بەرسەڭىز، بالا ينفانتيلدى، ياعني دۇرىس جەتىلمەي قالادى. ەڭبەك پەن وقۋعا قابىلەتى از بولادى. رۋحاني وسۋگە بەيىمسىز كەلەدى. - ەگەر بالانى 10 جاستان كەيىن دە كىشكەنتاي كورىپ، قامقورلىق تانىتا بەرسەڭىز، ول بالا سەنىمسىز بولىپ وسەدى. وزىنەن گورى ەركىندەۋ دوستارىنا تاۋەلدى بولىپ تۇرادى. ءبىراق ولار ءاردايىم دۇرىس اسەر ەتەدى دەۋ مۇمكىن بە؟ - ەگەر بالانى 15 جاستان سوڭ سىيلاي الماساڭىز، ول ونى سىزگە كەشىرمەيدى. ەڭ العاشقى مۇمكىندىك تۋعاندا سىزدەن ىرگەسىن اۋلاق سالادى. قايتىپ ورالماۋعا تىرىسادى.
islam.kz