فيلمىنەن قاراجات جىمقىردى دەگەن كۇدىكپەن رەجيسسەر جانىبەكوۆ ۇستالدى

استانا. قازاقپارات - رەجيسسەر تالگاد جانىبەكوۆ ۇستالىپ، الماتى ءى ءى د ۋاقىتشا ۇستاۋ يزولياتورىنا قامالدى.

بۇل تۋرالى Tengrinews.kz تىلشىسىنە كۇدىكتىنىڭ ادۆوكاتى سەرىك ايتبايەۆ حابارلادى.

«بۇگىن ونى «قىلمىس ورنىندا قۇرىقتالدى» دەپ ۇستاپ اكەتتى. ۇستاۋ تۋرالى قاۋلىدا سولاي جازىلعان. كۇلكىلى. 72 ساعاتقا ۇستاۋ ءۇشىن ادام قىلمىس ورنىندا ۇستالۋى كەرەك»، - دەپ حابارلادى سەرىك ايتبايەۆ.

بۇعان دەيىن تالگاد جانىبەكوۆ ەشقايدا كەتپەۋ تۋرالى قولحاتپەن جىبەرىلگەن. ادۆوكاتىنىڭ ايتۋىنشا، بۇلتارتپاۋ شاراسىن وزگەرتۋگە پروكۋروردىڭ نەمەسە تەرگەۋ سۋدياسىنىڭ سانكسياسى قاجەت.

«سوندىقتان وسىندايدى ويلاپ تاپقان، 72 ساعات ۇستاۋ ءۇشىن. بىزگە 1000 ا ە ك كولەمىندە كەپىلاقى بەرۋ تۋرالى رەسمي تۇردە حابارلادى، سوندا عانا بارلىعى جاقسى بولادى ەكەن»، - دەدى ادۆوكات.

تالگاد جانىبەكوۆ «فەنيكس» فيلمىنىڭ تۇسىرىلىمدەرىنە ارنالعان قاراجاتتىڭ جىمقىرىلۋى ىسىندە كۇدىكتى. تەرگەۋدىڭ مالىمەتىنشە، رەجيسسەرگە سەنىپ تاپسىرىلعان مۇلىكتى يەمدەندى نەمەسە جۇمساپ قويدى دەگەن كۇدىك كەلدى. ونىڭ كىناسى دالەلدەنسە مۇلكى تاركىلەنە وتىرىپ، 7  جىلدان 12 جىلعا دەيىن باس بوستاندىعىنان ايىرىلادى.

ايتا كەتەيىك، وسى داۋلى فيلم بويىنشا بەلگىلى اكتەر تۇڭعىشباي جامانقۇلوۆ ۇستالىپ، كەيىن كەپىلاقىمەن بوساتىلعان ەدى. ول 79 ميلليون تەڭگە جىمقىردى دەگەن كۇدىككە ىلىنگەن. كەيىن ول ءوز كىناسىن مويىنداپ، قاراجاتتىڭ 6 ميلليون تەڭگەسىن قايتارعان. مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل جونىندەگى اگەنتتىكتىڭ ءتوراعاسى قايرات قوجامجاروۆتىڭ ايتۋىنشا، ءارتىس "قازاق فيلمگە" قارىزدى ءوندىرىپ بەرۋگە ۋادە ەتكەن.