قازاقستانداعى جولاۋشىلار ۆاگوندارى قالاي جاڭارتىلادى

استانا. قازاقپارات - ينۆەستيتسيالار جانە دامۋ مينيسترلىگىنىڭ وكىلدەرى جولاۋشىلار تاسىمالىن سۋبسيديالاۋدىڭ جاڭا مەحانيزمى ارقاسىندا ۆاگوندار جاڭارتىلىپ، قىزمەت كورسەتۋ ساپاسى كوتەرىلەدى، ءتىپتى جاڭا پويىزداردى ىسكە قوسۋعا مۇمكىندىك بەرەدى دەيدى.

بۇرىن سۋبسيديالاۋ تۋرالى كەلىسىمشارتتار ءتورت-اق جىلعا راسىمدەلەتىن. ول ۋاقىتتىڭ ىشىندە تاسىمالداۋشى كومپانيالار ءوز شىعىندارىن اقتاي الماي كەلدى. ەندىگى كەزەكتە ونداي قۇجاتتار جيىرما جىلعا راسىمدەلەدى، دەپ حابارلايدى قازاقپارات ءتىلشىسى.

كولىك كوميتەتىنىڭ ءتوراعاسى اسەت اساۋبايەۆتىڭ ايتۋىنشا، جاقىندا بارلىق الەۋمەتتىك ماڭىزى بار باعىتتار بويىنشا جيىرما جىلدىق كەزەڭگە تاسىمالداۋشىلاردى انىقتاۋ بويىنشا كونكۋرستىق پروتسەدۋرالار وتكىزىلدى. «ۇزاق مەرزىمدى كەزەڭگە كونكۋرستى وتكىزۋ ينۆەستيتسيالار تارتۋ شارتتارىنىڭ ءبىرى بولىپ تابىلادى. ياعني، بۇدان بۇرىن سۋبسيديالاۋ شارتى ءتورت جىلدىق كەزەڭگە جاسالعاندىقتان تاسىمالداۋشىلار سالىنعان قاراجاتتارىنىڭ ورنىن تولتىرا المايتىن. سوندىقتان ينۆەستيتسيالاردى تارتۋعا مۇمكىندىك بولعان جوق»، - دەيدى كوميتەت ءتوراعاسى. كونكۋرس قورىتىندىسى بويىنشا تاسىمالداۋشىلار ءتيىستى مىندەتتەمەلەردى ءوز مويىندارىنا الدى. اتاپ ايتقاندا، ۆاگوندار پاركىنىڭ 30 پايىزى جاڭارتىلۋى شارت.

بۇل - شامامەن 500 ۆاگوننان. وسى سالادا 16 ميلليارد تەڭگە جەكە ينۆەستيتسيالار تارتىلادى دەگەن جوسپار بار. «2017 -جىلى سۋبسيديالاۋ ەسەبىنەن قوسىمشا 24 ۆاگون ساتىپ الىناتىن بولادى. مىسالى، كەلەسى جىلى العاشقى التى ايدا 44/44 «قوستاناي - الماتى» قاتىناسى بويىنشا 14 جاڭا ۆاگون، 75/46 « قىزىلوردا - كوكشەتاۋ» بويىنشا - 13 ۆاگون، سونداي- اق 621-622 «قوستاناي - ارقالىق» باعىتىنا 6 ۆاگون ساتىپ الىنادى»، - دەپ اتاپ كورسەتتى ءا. اساۋبايەۆ.

سۋبسيديالاۋدىڭ جاڭا جۇيەسىن ەنگىزۋدىڭ ارقاسىندا جولاۋشىلار تاسىمالى سالاسىنداعى جەكە كومپانيالارلىڭ ۇلەسى 11 پايىزدان 27 پايىزعا دەيىن ءوستى. بۇدان بولەك، كەلەسى جىلى الماتى- شىمكەنت، استانا- ورال، الماتى- ورال جانە استانا- الماتى- التىنكول (ەكسپو شەڭبەرىندە)، استانا- اتىراۋ (ەكسپو شەڭبەرىندە)، استانا- مانعىشلاق (ەكسپو شەڭبەرىندە)، استانا- شىمكەنت (ەكسپو شەڭبەرىندە) باعدارلارى بويىنشا جاڭا پويىزدار جولعا شىعادى.

ايتا كەتكەن ءجون، اعىمداعى جىلدا تەمىرجول كولىگىمەن جۇرەتىن حالىقتىڭ سانى تاعى 1 ميلليون ادامعا ءوسىپ، 23,4 ميلليون جولاۋشىنى قۇرادى. بىلتىر اتالعان كورسەتكىش 22,5 ميلليون ادام بولعان. بۇگىندە قازاقستاندا جولاۋشىلار ۆاگوندارىنىڭ جالپى سانى شامامەن 2 مىڭ بىرلىكتى قۇرايدى. جىل سايىن توزىعى جەتكەن 100 ۆاگون قولدانىستان شىعارىلادى.

اۆتور: ارمان اسقاروۆ