ەرلان ءبىلال: «الماس قىلىش» - قوعامنىڭ رۋحىن شىڭدايتىن فيلم
«ەلىمىزدىڭ مادەنيەت جانە ونەر سالاسى ءۇشىن 2016 -جىل - ءىرى جوبالاردىڭ ءساتتى جۇزەگە اسقان جىلى بولىپ وتىر. بيىل سونداي- اق، تاۋەلسىزدىكتىڭ 25 جىلدىعىن اتاپ وتتىك. بيىل جۇزەگە اسىرعان جوبالاردىڭ اراسىندا - «الماس قىلىش» فيلمى شوقتىعى بيىك تۋىندى بولىپ وتىر.
«الماس قىلىش» - مەملەكەتتىك ماڭىزى بار جوبا. ويتكەنى، بۇل فيلم ارقىلى قازاق حالقىنىڭ ۇلت بولىپ، مەملەكەت بولىپ قالىپتاسۋ تاريحى، سول جولداعى تاريحي تۇلعالاردىڭ، حانداردىڭ، باتىرلاردىڭ، بيلەردىڭ تاريحتاعى اتقارعان شەشۋشى رولدەرى، قازاق حاندىعىنىڭ پايدا بولۋ كەزەڭىندەگى شيەلەنىستى تاريحي جاعدايلار تەرەڭ دراماتۋرگيامەن ءورىلىپ، شەبەر رەجيسسۋرامەن كورسەتىلگەن»، - دەيدى ە. ءبىلال. ايتا كەتەيىك، «الماس قىلىش» - قازاق حاندىعىنىڭ 550 جىلدىعىنا وراي قولعا الىنعان ەڭ ءىرى كينو جوبا «قازاق ەلى» سەريالىنىڭ كينونۇسقاسى.
«الماس قىلىش» فيلمى بۇگىنگى قوعامعا ءوزىنىڭ ءتۇپ تامىرىن تانۋعا، تاريحىمەن ماقتانۋعا، مەملەكەتتىك تاريحىمىزدىڭ تامىرى تەرەڭدە ەكەنىن سەزىنۋگە جانە قاي زاماندا دا تاۋەلسىزدىك جولىنداعى كۇرەستىڭ، جاڭا مەملەكەت قۇرۋدىڭ وڭاي بولماعانىن انىق كورسەتەدى. سول ارقىلى ءار ازاماتتىڭ بويىنداعى وتانسۇيگىشتىك سەزىمىن ودان ءارى قۋاتتاندىرىپ، رۋحتاندىرادى. بۇل كينوتۋىندىنىڭ ەكىنشى ءبىر جاعى ول - تاربيەلىك ماڭىزى. بۇگىنگى جاس ۇرپاققا مۇنداي ءىرى تاريحي فيلمدەردىڭ بەرەرى وتە مول.
كينونىڭ اۋديتورياسىنىڭ كوپ بولاتىندىعى ءارى ادامعا اسەر ەتۋ تۇرعىسىنان زور كۇشكە يە ەكەنىن ەسكەرسەك، «الماس قىلىش» تۋىندىسى تاۋەلسىزدىك جىلدارىندا ومىرگە كەلگەن جاس بۋىندى پاتريوتتىق جولدا تاربيەلەۋدىڭ نەگىزگى قۇرالىنا اينالارى ءسوزسىز. جالپى، «الماس قىلىش» تاريحي فيلمى قوعامنىڭ مەملەكەتشىلدىك، وتانشىلدىق ساناسىن وياتىپ، رۋحىن شىڭدايتىن كينو جوبا بولعانىن باسا ايتقانىمىز ءجون»، - دەيدى تەاتر ديرەكتورى. ەستەرىڭىزگە سالا كەتەيىك، تاۋەلسىزدىك كۇنى قارساڭىندا استانا جانە الماتى قالالارىندا «الماس قىلىش» فيلمىنىڭ تۇساۋكەسەرى وتكەن بولاتىن. كينوعا 500 گە تارتا ادام، 100 گە جۋىق اكتەر جۇمىلدىرىلعان. كوركەم فيلمنىڭ رەجيسسەرى - رۇستەم ءابدىراش. فيلم 15-عاسىردىڭ ورتا تۇسىنداعى قازاق حاندىعىنىڭ قۇرىلۋ تاريحىن باياندايدى.
اۆتور: كەنجەكەي توقتامۇرات قىزى