تانىمال جۋرناليست جانبولات اۋپبايەۆ «ەكىنشى تۋعان كۇنىن» تويلاپ جاتىر
سولاردىڭ ءبىرى تانىمال جۋرناليست، قارىمدى پۋبليتسيست، كۇنى كەشەگە دەيىن ەلىمىزدەگى باس باسىلىم - «ەگەمەن قازاقستان» رەسپۋبليكالىق جالپىۇلتتىق گازەتىنىڭ باس رەداكتورى بولعان، بۇگىندە وسى گازەتتە باسقارما ءتوراعاسىنىڭ كەڭەسشىسى قىزمەتىن اتقارىپ جۇرگەن جانبولات اۋپبايەۆ اعامىز.
كەشە 65 دەيتىن اسۋعا جەتكەن قالامگەر اعامىزعا ءتول مەرەكەسىمەن ەلدەن بۇرىن قۇتتىقتايىق دەپ قوڭىراۋ شالعان بولاتىنبىز. امان- سالەمنەن كەيىن «قازاقپارات» ح ا ا جاريالايتىن كۇنتىزبە دەرەگى بويىنشا جانە ۋيكيپەديادا ول كىسىنىڭ تۋعان كۇنى 24 -جەلتوقسان (24.12.1951 ج. ) دەپ كورسەتىلىپ تۇرعانىن، الايدا جۋرناليستىك جاۋاپكەرشىلىكتى ۇمىتپاي، «ەگەمەن قازاقستان» گازەتىنىڭ قىزمەتكەرلەرى تۋرالى مالىمەتتەر بازاسىنا سۇراۋ سالعانىمىزدا، ول جەردە ول كىسىنىڭ تۋعان كۇنى 2 -ماۋسىم (02.06.1951 ج. ) دەپ كورسەتىلىپ تۇرعانىن ايتتىق. ەكى دەرەكتىڭ قايسىسى دۇرىس ەكەنىن ءوز اۋزىنان بىلەيىك دەپ حابارلاسىپ تۇرعانىمىزدى جەتكىزدىك. جاۋاپ كوپ كۇتتىرمەدى. «ەكەۋى دە مەنىڭ تۋعان كۇنىم، - دەدى كۇلىپ. - ومىردە جىلىنا تۋعان كۇندى ەكى رەت تويلايتىن ادامدار بولادى عوي. سونىڭ ءبىرى - مەنمىن، قاراعىم». ۇنسىزدىك.
مەن ول كىسىنىڭ ءسوزىن بولمەيىن دەگەن ويمەن ىركىلگەن ەدىم. ونى اۋپبايەۆ اعامىزدىڭ ءىشى سەزدى مە، ۇيالى تەلەفوننىڭ ارعى جاعىنداعى جارقىن ءۇن جالعاسا جونەلدى: «مەنىڭ بالا كەزىمدە ادامدار قۇجات دەگەن دۇنيەگە اسا ءمان بەرمەسە كەرەك. 1959 -جىلى جەتى جاستان اسقاندا مەكتەپكە باراتىن بولدىم. اكەم كولحوزدا (الماتى وبلىسى نارىنقول اۋدانى «وكتيابردىڭ 40 جىلدىعى» اتىنداعى قولحوز - رەد. ) ۇستا ەدى. مەن مەكتەپكە باراتىن كەزدە عانا تۋۋ تۋرالى كۋالىك جاساتقان عوي. ءوزى بارا المايتىن بولعان سوڭ، اۋدانعا شوپىرىن جىبەرگەن. شوپىر بارىپ اۋدانداعىلارعا كۋالىكتى جاساپ بەرىڭدەر دەگەن. تۋعان كۇنىمدى جازاتىن كەزدە عانا بارىپ، سونى سۇراماي شىعىپ كەتكەنى ەسىنە تۇسكەن. ول كەزدە قازىرگىدەي ۇيالى تەلەفون جوق قوي. حابارلاسىپ، بىلە قوياتىن. «كەيىن ءبىلىپ كەل» دەگەنگە: «ۇستا ماعان ۇرسادى، قۇر قول قايتپايمىن، قايتسەم دە كۋالىكتى الىپ قايتامىن»، - دەپ، ول دا كونبەگەن.
سودان ورىس ايەلدەردىڭ باسى ابدەن قاتىپ، 2 -ماۋسىم كۇنى تۋعان دەپ جازىپ جىبەرىپتى. سول كەزدە ەگەر ادامنىڭ تۋعان كۇنى بەلگىسىز بولسا، جىلدىڭ ورتاسىنا قويادى دەگەن زاڭ بار ەكەن. مىنە، وسىلاي مەنىڭ قۇجاتىمدا تۋعان كۇنىم باسقا كۇنمەن جازىلىپ كەتكەن»، - دەپ بارىپ ءسوزىن اياقتادى.
تاعى دا از-كەم اڭگىمەدەن كەيىن ارىپتەس اعامىزدى رەداكسيا اتىنان كەلە جاتقان «ءوز تۋعان كۇنىمەن» قۇتتىقتاپ، زور دەنساۋلىق، شىعارماشىلىق تابىستار تىلەدىك. ول كىسى دە ءۇنسىز قالعان جوق. «ءاي، بالا، سەندەرگە مىڭ راحمەت! ادەتتە باستى قىزمەتتەن كەتكەن سوڭ (باس رەداكتور لاۋازىمىنان اۋىسۋى - رەد. ) ينتەرنەتتەگى مالىمەتتەر دە جوعالىپ كەتىپ جاتادى. ەلەپ- ەسكەرىپ جاتقاندارىڭا مىڭ العىس»، - دەدى ەلجىرەپ.
انىقتاما: جانبولات ءاليحان ۇلى اۋپبايەۆ 1951 -جىلى 24 -جەلتوقساندا ق ح ر- دىڭ شىنجاڭ ولكەسىندەگى قۇلجا ۋالاياتىنا قاراستى تەكەس ەلدى مەكەنىندە ومىرگە كەلگەن. س. م. كيروۆ اتىنداعى قازاق مەملەكەتتىك ۋنيۆەرسيتەتىن (قازىرگى ءال-فارابي اتىنداعى قاز ۇ ۋ) بىتىرگەن. 1974-1986 -جىلدارى - «لەنينشىل جاس» رەسپۋبيكالىق جاستار گازەتىندە تالىمگەر، كىشى ادەبي قىزمەتكەر، اعا ءتىلشى، ءبولىم مەڭگەرۋشىسى بولعان. 1986-1991 -جىلدارى - «قازاقستان كوممۋنيسى» جۋرنالىنىڭ جاۋاپتى حاتشىسى بولعان. 1991-1996 -جىلدارى - «حالىق كەڭەسى» گازەتى باس رەداكتورىنىڭ ورىنباسارى بولعان. 1996-1998 -جىلدارى - «اقيقات» جۋرنالى باس رەداكتورىنىڭ ءبىرىنشى ورىنباسارى. 1998-2003 -جىلدارى «ەگەمەن قازاقستان» رەسپۋبليكالىق جالپىۇلتتىق گازەتى باس رەداكتورىنىڭ ورىنباسارى. 2003-2016 -جىلدارى وسى گازەتتە باس رەداكتور بولعان. 2016 -جىلعى قاراشادان باستاپ باسقارما ءتوراعاسىنىڭ كەڭەسشىسى قىزمەتىنە اۋىستى. كوپتەگەن تانىمدىق- پۋبليتسيستيكالىق كىتاپتاردىڭ اۆتورى.
و. سۇلەيمەنوۆتىڭ، س. سانبايەۆتىڭ شىعارمالارىن قازاق تىلىنە اۋداردى، «قاجىمۇقان مەن قاجىتاي»، «حان ءتاڭىرى» دەرەكتى كينوفيلمدەرىنىڭ ادەبي سەناريلەرىنىڭ اۆتورى. ماقالالارى مەن وچەركتەرى رەسپۋبليكالىق باسىلىمداردا ۇزبەي جاريالانىپ كەلەدى. قازاقستان جازۋشىلار وداعىنىڭ مۇشەسى، قازاقستان جۋرناليستەر وداعى سىيلىعىنىڭ، قازاقستان پرەزيدەنتىنىڭ جۋرناليستيكا سالاسىنداعى سىيلىعىنىڭ جانە قازاقستان جازۋشىلار وداعىنىڭ حالىقارالىق «الاش» سىيلىعىنىڭ لاۋرەاتى.
اۆتور: ەربول جانات