قازاقستان باس پروكۋراتۋراسى راحات اليەۆكە قاتىستى قىلمىستىق ءىستى توقتاتادى
بۇل قۇجات راحات اليەۆتىڭ ولىمىنە بايلانىستى، وعان قاتىستى قوزعالعان قىلمىستىق ءىستى توقتاتۋ ءۇشىن تەرگەۋ ورگاندارىنا جونەلتىلدى، دەپ حابارلايدى قازاقپارات. اگەنتتىك ءتىلشىسىنىڭ رەسمي ساۋالىنا جاۋاپ بەرگەن باس پروكۋراتۋرانىڭ مالىمەتىنە سۇيەنسەك، قۇزىرلى ورگان راحات اليەۆتىڭ ءولىمى جاريالانعان 2015 -جىلدىڭ 25 -اقپانىنان بەرى قىلمىستىق ءىستى توقتاتۋعا قاجەتتى ءتيىستى قۇجاتتاردى سۇراتقان. اۆستريانىڭ ءتيىستى ورگاندارىنا حالىقارالىق تەرگەۋ بۇيرىعى جونەلتىلىپ، بيزنەسمەننىڭ ءولىمى تۋرالى كۋالىك، سوت-مەديتسينالىق ساراپتامالاردىڭ قورىتىندىسى، حاتتامالار جانە ولىكتى انىقتايتىن قۇجاتتار سۇراتىلعان.
«باس پروكۋراتۋرا وسى ساۋالدارىنا جاۋاپ رەتىندە 2015 -جىلدىڭ 20 -ساۋىرىندە تەك قانا راحات اليەۆتىڭ ءولىمى تۋرالى كۋالىكتىڭ كوشىرمەسىن الا الدى. 2016 -جىلدىڭ 13 -اقپانىندا باس پروكۋراتۋرا اۆسترياعا تاعى دا ساۋال جولدادى. اۆستريا بيلىگى ەكىنشى مارتە جونەلتىلگەن سۇراۋعا 2016 -جىلدىڭ 30 -ماۋسىمىندا جاۋاپ بەرە وتىرىپ، كۋالىكتەن باسقا قۇجات بەرە المايتىندارىن ايتتى.
سەبەبى، راحات اليەۆتىڭ جەسىرى ە. شورازوۆا 2015 -جىلدىڭ 18 -ماۋسىمىندا ۆەنانىڭ جەر سوتىنا راحات اليەۆتىڭ ولىمىنە قاتىستى قۇجاتتاردى قازاقستان تاراپىنا بەرمەۋ تۋرالى پروتەست جىبەرىپ قويعان»، - دەپ حابارلادى ساۋالىمىزعا جاۋاپ بەرگەن باس پروكۋراتۋرا.
الايدا، ۆەنا سوتى ەلنارا شورازوۆانىڭ ءوتىنىشىن قابىلدامادى. 2016 -جىلدىڭ 21 -قاراشاسىندا قازاقستاننىڭ باس پروكۋراتۋراسى ديپلوماتيالىق كانالداردىڭ كومەگىمەن راحات اليەۆتىڭ ءولىمى تۋرالى اپوستيلدى كۋالىكتىڭ، 2015 -جىلدىڭ 9 -ناۋرىزىندا شۆەيتساريانىڭ سانكت- گاللەن قالاسىنداعى سوت مەديتسينا ينستيتۋتى جۇرگىزگەن سوت- مەديتسينالىق ساراپتامالاردىڭ كوشىرمەسىن العان. «وسى قۇجاتتار راحات اليەۆتىڭ ولىمىنە بايلانىستى، وعان قاتىستى قوزعالعان قىلمىستىق ءىستى توقتاتۋ ءۇشىن تەرگەۋ ورگاندارىنا جونەلتىلدى»، - دەپ حابارلادى باس پروكۋراتۋرا.