ەر ادامنىڭ ايەلىنە ۇنەمى كوڭىلى تولماۋى دۇرىس پا؟
راسىندا دا، ولار تاڭنان قارا كەشكە دەيىن جۇبايىنىڭ قاس- قاباعىنا قاراپ، اس- سۋىن دايارلاپ، كىرىن جۋىپ، ءۇيىن جيناپ، ايتقاندارىن ورىنداپ وتىرسا دا كۇيەۋىنىڭ قاتۋلى قاباعىن ەش جازا المايدى، كەرىسىنشە، تاعى ءبىر سوگىس ەستيدى.
ءبىز ايەلدەر كۇيەۋىنىڭ جاعدايىن جاساۋى كەرەك، باعىنۋى كەرەك، قاس- قاباعىنا قاراۋى كەرەك، كۇلىپ قارسى الۋى كەرەك دەيمىز. ول دۇرىس تا. ءبىراق ەر ادامدار شە؟ ولارعا ايەلىنە وسىنداي قارىم- قاتىناس جاساۋعا، ياعني ۇنەمى كوڭىلى تولماي، سىنىقتان سىلتاۋ ىزدەپ وتىراتىن بەيمازا بولۋعا رۇقسات ەتىلگەن بە؟
ارينە، جوق. ءدىنىمىز كەرىسىنشە، ايەل ادامنىڭ قۇقىعىن جوعارى قويادى، ولاردى قۇرمەتتەۋدى، جاقسى قارىم- قاتىناس جاساۋدى، مەيىرىمدى بولۋدى، كۇيەۋى ايەلىنە سۇيىسپەنشىلىگىن ءبىلدىرىپ تۇرۋدى بۇيىرادى.
پايعامبارىمىز (س. ع. س): «اللا تاعالا مۇسىلمان قۇلىنىڭ باسىنا كەلگەن شارشاپ- شالدىعۋ، اۋرۋ- سىرقاۋ، ۇرەي، ۋايىم، كۇيىنىش پەن قايعى- قاسىرەت سەكىلدى قانداي دا ءبىر اۋىرتپاشىلىق سەبەپتى، ءتىپتى، قولىنا نەمەسە اياعىنا كىرگەن كىشكەنە تىكەن ءۇشىن دە ونىڭ كۇنالارىن جارىلقاپ كەشىرەدى»، - دەگەن (بۇحاري، ءماردا 1؛ مۋسليم، بيرر 49).
«قيىندىقتارىنا شاعىم جاسايتىن ادام، شىن مانىندە، اللا تاعالاعا شاعىم جاسايدى» (يمام ءالي (ر. ا. ) ).
قاباعىن ءتۇيىپ، كەشكى استى ەشكىم دىبىسىن شىعارماي ءىشىپ، كوڭىلسىز اتموسفەرا ورناتقاننان گورى، ايەلىڭىزدى، بالالارىڭىزدى كورىپ، كۇنى بويى شارشاعانىڭىزدى ولاردى قۇشاقتاپ، يىسكەپ باسىپ، كەشكى استى ويناپ- كۇلىپ، ءۇيدىڭ بەرەكەسىن كىرگىزە وتىرىپ، اللا تاعالاعا شۇكىرشىلىك ەتە وتىرىپ ىشكەن الدەقايدا دۇرىس تا، جاقسى دا ەمەس پە؟