تاسماعامبەتوۆ ەلوردامىزدىڭ سارى ارقا تورىنە كوشىرىلۋىنىڭ باستى سەبەبىن ايتتى

استانا. قازاقپارات - «تاۋەلسىزدىك تاعىلىمى» اتتى تەلەجوبا بارىسىندا ق ر پرەمەر- ءمينيسترىنىڭ ورىنباسارى يمانعالي تاسماعامبەتوۆ ەلوردامىزدىڭ سارى ارقا تورىنە كوشىرىلۋىنىڭ باستى سەبەبىن ايتتى،

 دەپ حابارلايدى قازاقپارات.

«استانا جاي قالا ەمەس. بۇل ەلىمىزدىڭ، حالقىمىزدىڭ باس قالاسى. ونى كوشىرۋدە ارينە، 90- جىلدىڭ ورتاسىندا ەلباسى پارلامەنتتە دالەلدەپ سويلەدى عوي. ءبىراق، ەڭ باستى نارسەنى ايتقان جوق. مەن ءبىر جيىندا ايتقان ءسوزىمدى تاعى قايتالاعىم كەلەدى. ءاز بابالارىمىزدىڭ ايتىپ كەتكەن ءسوز بار. «ەدىلدى كەلىپ العانىڭ، ەتەككە قولدى سالعانىڭ، جايىقتى كەلىپ العانىڭ، جاعاعا قولدى سالعانىڭ». سول كەزدە باس قالامىزدى سارى ارقا تورىنە كوشىرمەگەندە كىم بىلەدى نە بولارىن؟ كورشىلەرىمىزدە نە بولىپ جاتقانىن كورىپ وتىرمىز عوي. شىن مانىندە ەسىلدى دە اڭساپ قالاتىنداي جاعدايدا بولۋىمىز مۇمكىن ەدى. سوندىقتان تاريحي شەشىمنىڭ قانشالىقتى قازاق حالقىنىڭ مەملەكەتتىلىگىنە قاجەت ەكەندىگىنە بۇگىن دە، كەلەشەك ۇرپاق تا ءوز باعاسىن بەرەدى دەگەن ويدامىن»، - دەدى تاسماعامبەتوۆ.

ق ر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ تە استانا جايىندا ءسوز قوزعادى. سونىمەن قاتار ول پرەزيدەنتتىڭ بيزنەسىمەندەردى شاقىرىپ، استانادا دۇكەندەر، جانارماي قۇيۋ ستانسالارىن سالۋعا كوندىرگەنىن اتاپ ءوتتى.

«ويتكەنى، قالا قاراڭعى بولاتىن. ال جانارماي قۇيۋ ستانساسى جارقىراپ تۇراتىن. قالانى جارىقتاندىرۋعا قاجەت بولدى»، - دەپ ازىلدەدى ەلباسى نۇرسۇلتان نازاربايەۆ.

اۆتور: مارلان جيەمباي