جاڭا جىلدا جۇمىستان بەرىلگەن سىيلىقتى الۋعا بولا ما؟

استانا. قازاقپارات - جاڭا جىلدا جۇمىستان قانشا بالاڭ بولسا، سونشا سىيلىق بەرىلەتىنى بەلگىلى.

سونى الۋعا بولا ما؟ جاڭا جىلدا تۋعان- تۋىسقا سىيلىق سىيلاساق ونىڭ كۇناسى بار ما؟ بۇل سۇراقتارعا ءدىنتانۋشى ابدۋسامات قاسىم Islam.kz سايتىندا جاۋاپ بەرگەن ەكەن.

اللا ەلشىسى كاپىردەن دە سىيلىق قابىل ەتكەندىگى ساحيح حاديستەردە ايتىلادى. جانە ازىرەتى ومار ءوزىنىڭ مۇسىلمانشىلىقتى قابىل ەتپەگەن مۇشرىك باۋىرىنا كيىم سىيلاعاندىعى «ساحيح ءمۇسلىم» اتتى حاديستەر جيناعىندا كەلتىرىلگەن. سوندىقتان دا، جاڭا جىلعا ارناپ جۇمىستان سىيلىق بەرىلىپ جاتسا، ونى قابىل ەتۋدىڭ كۇناسى جوق. ماڭىزدىسى بەرىلگەن زات حالال بولۋى شارت.

ال، ەندى سىيلىق سىيلاۋعا كەلەر بولساق، بۇعان بايلانىستى ەرتەرەكتە ءومىر سۇرگەن كەي عۇلامالارىمىزدىڭ ايتۋى بويىنشا، ءدىنى بوتەن ەلدىڭ مەيرامىن ۇلىقتاۋ ماقساتىندا ەمەس قۇر ادامدار اراسىندا ورىن العان ادەت بولعاندىقتان الدەكىمگە ىقىلاس ءبىلدىرىپ، سىيلىق سىيلاپ جاتسا، وعان بولا كاپىر بولمايدى. تەك، ءدال سول كۇنى ەمەس، ءبىر كۇن الدىن نە ءبىر كۇن كەيىن سىيلاعانى جاقسى. بۇل - سول قاۋىمعا ۇقساۋ بولماسىن دەگەندىك. ويتكەنى پايعامبارىمىز (س. ا. ۋ. ): «كىم ءبىر قاۋىمعا ۇقساسا، ول سولاردان»، - دەگەن. سوندىقتان دا، ءوزىنىڭ جورا- جولداستارىنا نەمەسە تۋعان- تۋىستارىنا (سۇراقتا سۇرالعانداي كوڭىلدەرىن اۋلاۋ ماقساتىندا) سىيلىق سىيلاعىسى كەلگەن ءدىن جولىنداعى مۇسىلمان كىسى لاج بولسا، ءدال جاڭا جىل مەيرامىندا ەمەس، ودان بۇرىن نەمەسە ودان كەيىنگى كۇندەرى سىيلاعانى ءجون.