دانيار ەلەۋسىنوۆ: تاۋەلسىزدىك تويى مەرەيىمدى تىپتەن اسىرىپ جىبەردى
وسى 25 جىلدا ول قازاقستاننىڭ بىرنەشە دۇركىن چەمپيونى، جاستار اراسىنداعى الەم چەمپيوناتىنىڭ فيناليسى (مەكسيكا، 2008 ج.)، قازاقستان جاستار ويىنىنىڭ چەمپيونى (2009 ج.)، ق ر چەمپيونى (2010 ج. )، گۋاڭجوۋداعى ازيا ويىندارىنىڭ چەمپيونى (2010 ج.)، وليمپيادالىق كۆاليفيكاتسيالىق قۇرلىقارالىق تۋرنيردىڭ جەڭىمپازى (2012)، ق ر-2012 كۋبوگىنىڭ جەڭىمپازى، (2016 ج.) ريو وليمپياداسىنىڭ «التىن مەدال» يەگەرى اتانىپ ۇلگەردى. سپورتتاعى ەڭ ءىرى جەڭىسىنە بيىل ريودا وتكەن وليمپيادا ويىندارىندا قول جەتكىزدى. بۇل ونىڭ تاۋەلسىزدىگىمىزدىڭ 25 جىلدىق مەرەيتويىنا جاساعان ەڭ ۇلكەن تارتۋى دەسەك ارتىق ايتقانىمىز ەمەس. بۇگىن سايتىمىزعا سۇحبات بەرگەن بوكسشى ەلەۋسىنوۆ تاۋەلسىزدىكتىڭ قۇرداسى ەكەنىنە ماقتاناتىنىن ايتىپ، اعىنان اقتارىلدى.
- بۇگىن تاۋەلسىزدىك العانىمىزعا 25 جىل تولدى. تاۋەلسىزدىكتىڭ قۇرداسى بۇل كۇندى قالاي قارسى الىپ جاتىر؟ - تاۋەلسىزدىك كۇنى
- ەلىمىزدىڭ ەڭ ۇلىق مەرەكەسى. ەڭ اۋەلى جەرلەستەرىمدى وسى مەرەكەمەن قۇتتىقتايمىن. تاۋەلسىزدىگىمىز ۇزاعىنان بولىپ، ەلىمىز كوركەيە بەرسىن. ەل بولىپ 25 جىلدىعىمىزدى اتاپ ءوتىپ جاتىرمىز. بۇل - ۇلكەن قۋانىش. مەن دە ەلمەن بىرگە شاتتانىپ، ەلمەن بىرگە قۋانىپ جاتىرمىن. قۋانىشتى كوپپەن بىرگە بولىسكەنگە نە جەتسىن.
- تاۋەلسىزدىكتىڭ قۇرداسى ءارى وليمپيادا چەمپيونى رەتىندە كوپتەگەن مەملەكەتتىك ءىس-شارالارعا شاقىرتۋ الىپ، ءجيى قاتىسىپ جاتىرسىز. بۇل ءسىز ءۇشىن ۇلكەن ماقتانىش بولار؟
- ارينە! ۇلكەن ماقتانىش. سوڭعى كەزدەرى كوپتەگەن ءىرى مەملەكەتتىك ءىس- شارالارعا قاتىستىم. سونىڭ ىشىندە ەلباسى نۇرسۇلتان نازاربايەۆ قاتىسقان ءبىرقاتار شارالاردا دا بولدىم. مەن ءۇشىن بۇدان اسقان قۋانىش جوق.
- تاۋەلسىزدىكتىڭ قۇرداسى ەكەنىڭىزدى قانشالىق ماقتان ەتەسىز؟
- تىلمەن ايتىپ جەتكىزە المايتىن شىعارمىن. بيىل وليمپيادا جىلى ەل تاۋەلسىزدىگىنىڭ 25 جىلدىعىنا تۋرا كەلگەنى مەن ءۇشىن ۇلكەن ابىروي بولدى. 25 جاسىمدا 25 جىلدىعىمىزعا «التىن» جۇلدە سىيلاعانىمدى ماقتان ەتەمىن. ەگەر وسى تاۋەلسىزدىگىمىز بولماسا، بۇل دەڭگەيگە جەتە الارما ەدىك، كىم ءبىلسىن. وسىنىڭ بارلىعى تاۋەلسىزدىگىمىزدىڭ ارقاسى. سوندىقتان ەل تاۋەلسىزدىك الىپ جاتقان قيىن- قىستاۋ زاماندا دۇنيەگە كەلىپ، ەلمەن بىرگە ەسەيگەن، ەلمەن بىرگە ەڭسەمدى تىكتەگەن ۇلدىڭ ءبىرىمىن. سول ءۇشىن ءوزىمدى ءارقاشان باقىتتى سەزىنەمىن.
- وليمپياداعا اتتاناردا تاۋەلسىزدىكتىڭ 25 جىلدىعى قارساڭىندا چەمپيون بولام دەگەن وي بولدى ما؟
- مەن وليمپياداعا اتتانار الدىندا الدىما ەكى ءتۇرلى ماقسات قويدىم. ءبىرى - 69 كەلى باياعىدان قازاقتىڭ سالماعى. ءسوزسىز بۇل ءداستۇردى بۇزباۋ كەرەك دەپ ويلادىم. ەكىنشىسى - بيىل ەل تاۋەلسىزدىگىنىڭ 25 جىلدىق مەرەيتويى. 25 جاسىمدا 25 جىلدىق مەرەكەمىزگە قالايدا جۇلدە سىيلاۋىم كەرەك دەگەن ماقسات قويدىم. دەگەنىمە جەتتىم. ەندى ەلدىڭ ىقىلاسىنا بولەنىپ جاتىرمىن.
- ايقاي جيىرما بەس جاسىڭ ماڭگى جادىڭدا قالاتىن بولار؟
- مەن 25 جاسىمدا وليمپيادانى باعىندىرعانىم مەن تاۋەلسىزدىگىمىزدىڭ 25 جىلدىعىن اتاپ وتكەنىمىزدى ماڭگى ەسىمنەن شىعارمايتىنىم انىق. تاۋەلسىزدىك تويى مەرەيىمدى تىپتەن اسىرىپ جىبەردى. بۇرىندارى دا كوپتەگەن جارىستاردا الەم، ازيا ويىندارى سياقتى دودالاردا توپ جاردىم. ول كەزدەرى دە ەل- جۇرتىم ۇلكەن قۋانىشپەن كۇتىپ الاتىن. ءبىراق، وليمپيادا شىڭىن ارمانداپ جۇرگەن ەدىم. بۇل بيىكتى دە بيىل باعىندىردىم. بۇل مەنى بۇرىنعىدان دا تانىمال ەتتى. سونىڭ ارقاسىندا ەل تاۋەلسىزدىگىنىڭ 25 جىلدىق مەرەيتويلارىنا ارنايى قوناق بولىپ شاقىرىلىپ جاتىرمىن.
- وليمپيادا شىڭىن باعىندىرۋعا قانشا جىلىڭدى ارنادىڭ؟
- ءالى ەسىمدە، 2000 -جىلى سيدنەي وليمپياداسىندا بەكزات ساتتارحانوۆ پەن ەرماحان ىبىرايىموۆ اعالارىمىز چەمپيون بولدى. مەن سول جىلى ەس ءبىلىپ قالعان كەزىم ەدى. كوگىلدىر ەكراننان ارقالارىنا كوك بايراعىمىزدى جامىلىپ، رينگ ءىشىن اينالىپ جۇگىرگەنىن كورىپ، بولاشاقتا مەن دە وسىنداي چەمپيون بولام دەپ ارماندادىم. مىنە، بۇل ارمان 16 جىل دەگەندە ارەڭ ۇستاتتى.
- چەمپيون بولعان ءساتىڭىز ەسىڭىزدە مە؟
- ءبارى ەسىمدە. ونداي تاريحي ءسات ەسىمنەن قالاي كەتسىن. ءتىپتى، جانكۇيەرلەرىمنىڭ «دانيار، دانيار» دەگەن ايعايى قۇلاعىمدا ءالى دە تۇرعانداي بولىپ سەزىلەدى.
- ەندى قاشان رينگكە ورالاسىز؟
- اللا قالاسا، جاڭا جىلدان كەيىن ورالامىن. وزدەرىڭىز بىلەسىزدەر، وليمپيادا چەمپيوندارى مەن جۇلدەگەرلەرىنە ۇلتتىق قۇراما ءبىراز ۋاقىتقا دەمالىس بەرگەن. بيىلعى قازاقستان بىرىنشىلىگىنە دە سول ءۇشىن قاتىسقان جوقپىز. ەندى جاڭا جىلدان كەيىن جاتتىعۋعا قايتا كىرىسەمىز.
اۆتور: كۇنسۇلتان وتارباي