نازاربايەۆ ەلىمىزدىڭ ءار ءوڭىرىنىڭ تاۋەلسىزدىككە قوسقان ۇلەسىنە جەكە-جەكە توقتالدى
«تۇعىرى مىعىم، مارتەبەسى بيىك تاۋەلسىز قازاقستاندى ءبىز ءبارىمىز جاسادىق، بۇكىل قازاقستاندىقتار بولىپ. ارينە، ونىڭ ىشىندە سىزدەر دە بارسىزدار. مەن بۇگىن مەرەيلى ساتتە ەل دامۋىنا ۇلەس قوسقان ءاربىر وتانداسىما ايرىقشا ىقىلاسىمدى بىلدىرەمىن. كيەلى وسى ۇلى مەملەكەت قۇرۋدا، ەلدى بىرىكتىرۋگە جاساعان شارۋامىزدا الاتاۋدىڭ باۋرايىنداعى ازاتتىقتىڭ التىن بەسىگى الماتىلىقتار، جاعاسىن قارت كاسپيدىڭ تولقىندارى سۇيگەن مۇنايلى ولكە اتىراۋلىق جانە ماڭعىستاۋلىق اعايىن، ءوندىرىستى ءوڭىر اقتوبەلىكتەر ۇلكەن ۇلەس قوستى»، - دەدى قازاقستان پرەزيدەنتى.
ەلباسى كەنشىلەر مەكەنى قاراعاندىلىقتار، بايتاق دالانىڭ قوس جۇلدىزى سۇلۋ كوكشە مەن باياناۋىل وڭىرلەرىنىڭ جانە شىرايلى شىمكەنتتىڭ تۇرعىندارى تاۋەلسىزدىك جولىندا تولاسسىز تەر توككەنىن باسا ايتتى. جەر ءجانناتى جەتىسۋلىقتار مەن اق جايىق ارۋ مەكەن باتىس قازاقستاندىق باۋىرلار، استى مەن ءۇستى تاريحي جانە تابيعي بايلىققا تولى كەندى التاي ءوڭىرى، تالاي تاريحتىڭ كۋاسى جامبىل تۇرعىندارى ەرەن ەڭبەكتىڭ ۇلگىسىن كورسەتكەنىن اتاپ ءوتتى. «ارالى ورالىپ، اق كۇرىشى جايقالعان سىر ءوڭىرى، ايماعى ءارلى، توپىراعى ءنارلى، التىن ءدان دالاسى قوستاناي مەن سولتۇستىك قازاقستان تۇرعىندارى ايانباي ەڭبەك ەتتى. ازاتتىعىمىزدىڭ ايشىقتى ايعاعى استانالىقتار جاسامپازدىقتى پاش ەتتى»، - دەدى ەلباسى.