ورالدا ۇلتتىق ۇلان جاۋىنگەرلەرى مەملەكەتتىك ناگرادالارمەن ماراپاتتالدى - فوتو
«باتىس» وڭىرلىك قولباسشىلىعى باسپا ءسوز قىزمەتىنىڭ باستىعى، پودپولكوۆنيك ەربولات سۇلتانوۆتان تۇسكەن مالىمەتكە قاراعاندا، الدىمەن اسكەري بولىمدەردىڭ تۋلارى اكەلىنىپ، مەملەكەتتىك ءانۇران ورىندالدى.
«باتىس» وڭىرلىك قولباسشىسى، گەنەرال- مايور قايرات اقتانوۆتىڭ اتاپ وتكەنىندەي، بيىل - بارشا قازاقستاندىقتار ءۇشىن ەرەكشە جىل. ەلباسىمىزدىڭ باستاۋىمەن كوپتەگەن تابىستارعا قول جەتكىزگەن تاۋەلسىز ەلىمىز ءوز ازاتتىعىنىڭ 25 جىلدىعىن كەڭ كولەمدە اتاپ ءوتىپ وتىر. ۇلتتىق ۇلان جاۋىنگەرلەرىنىڭ باستى مىندەت- بورىشى دا وتانعا قالتقىسىز قىزمەت ەتۋ. جيىن بارىسىندا ق ر ىشكى ىستەر ءمينيسترىنىڭ، ق ر ۇلتتىق ۇلانى باس قولباسشىسىنىڭ جانە «باتىس» وڭىرلىك قولباسشىسىنىڭ قۇتتىقتاۋلارى مەن مەرەكەلىك بۇيرىقتارى وقىلىپ، سوعان سايكەس اسكەري قىزمەتكەرلەردىڭ ۇلكەن توبى مەدال، گراموتالارمەن، باعالى سىيلىقتارمەن ماراپاتتالدى. مەملەكەت باسشىسىنىڭ جارلىعىنا سايكەس «باتىس» وڭىرلىك قولباسشىلىعىنىڭ بەس بىردەي جاۋىنگەرى ءۇشىنشى دارەجەلى «ايبىن» وردەنىن، «جاۋىنگەرلىك ەرلىگى ءۇشىن» مەدالىن يەلەنگەنى بەلگىلى بولدى.
ءمينيستردىڭ بۇيرىعىنا وراي جەدەل باسقارما باستىعى، پودپولكوۆنيك بولات مۇسابەكوۆكە مەرزىمىنەن بۇرىن پولكوۆنيك اسكەري شەنى بەرىلدى. ال ۇلتتىق ۇلان باس قولباسشىسىنىڭ بۇيرىعىمەن ب ق و مادەنيەت، مۇراعاتتار جانە قۇجاتتاما باسقارماسىنىڭ باسشىسى داۋلەتكەرەي قۇسايىنوۆ ەكىنشى دارەجەلى «ۇلتتىق ۇلاننىڭ ۇزدىگى» توسبەلگىسىمەن ماراپاتتالدى. د. قۇسايىنوۆ ءوڭىر باسشىسىنىڭ اتىنان ۇلتتىق ۇلان جاۋىنگەرلەرىن ەلىمىزدەگى ەڭ ۇلىق مەيراممەن قۇتتىقتاپ، وبلىس اكىمىنىڭ العىسحاتتارىن تابىس ەتتى. سالتاناتتى جيىن سوڭى جاستار مادەنيەت ءۇيى مەن ع. قۇرمانعاليەۆ اتىنداعى وبلىستىق فيلارمونيا ارتىستەرى قويعان مەرەكەلىك كونسەرتكە ۇلاستى.
اۆتور: ەلجان ەرالى