قازاقتىڭ تۇڭعىش عارىشكەرى اۋباكىروۆ قاراعاندى وبلىسىنىڭ قۇرمەتتى ازاماتى اتاندى

 قاراعاندى. قازاقپارات - قاراعاندى وبلىسىنىڭ قۇرمەتتى ازاماتتارىنىڭ ءتىزىمى تانىمال تۇلعالارمەن تولىقتى، دەپ حابارلايدى «قازاقپارات» ح ا ا ءتىلشىسى.

«مەنىڭ الدىمدا ماڭىزدى مىندەت تۇر. وبلىس ءماسليحاتى سەسسياسىنىڭ شەشىمىمەن قازاقستان رەسپۋبليكاسى تاۋەلسىزدىگىنىڭ 25 جىلدىعىن مەرەكەلەۋ بارىسىندا كەيبىر قايراتكەرلەر «قاراعاندى وبلىسىنىڭ قۇرمەتتى ازاماتى» اتاعىن يەلەندى»، - دەپ حابارلادى وبلىس اكىمى نۇرمۇحامبەت ابدىبەكوۆ، ق ر تاۋەلسىزدىگىنىڭ 25 جىلدىعىنا ارنالعان سالتاناتتى جينالىستا. قاراعاندى وبلىسىنىڭ قۇرمەتتى ازاماتى رەتىندە ەكس-سەناتور، نۇر وتان پارتياسى جانىنداعى جەمقورلىققا قارسى كۇرەس كوميتەتىنىڭ ءتوراعاسى ورالباي ابدىكارىموۆ، عارىشكەر، قازاقستاننىڭ حالىق باتىرى توقتار اۋباكىروۆ پەن «كاراگانداۋگول» ح ك بۇرىنعى باس ديرەكتورى، پروفەسسور نيكولاي دريجد ماراپاتتالدى. ماراپاتتاۋ ءراسىمى مەرەكەلىك ساحنادا ءوتتى.

«مەن قايدا جۇمىس جاساسام دا، قانداي قىزمەت اتقارسام دا، ءاردايىم قاراعاندى وبلىسىنداعى جاعدايلارعا بەي-جاي قارامادىم. ءوزىمدى قاراعاندىلىقپىن دەپ ەسەپتەيمىن جانە ەشقاشان كىر كەلتىرمەۋگە تىرىستىم. 1970 -جىلى بولاشاق پرەزيدەنتپەن كەزدەستىرگەن تاعدىرىما شەكسىز ريزامىن. بۇل مەنىڭ كەلەشەگىمە ىقپال ەتتى»، - دەدى و. ابدىكارىموۆ.

اۋباكىروۆ جەرلەستەرىنىڭ ىستىق ىقىلاسپەن قارسى الىپ قوشەمەت بىلدىرگەندەرى ءۇشىن العىس ايتتى. «ماعان ءتۇرلى قالالار - ماسكەۋ، الماتى ۇنايدى. 18 جىلدان بەرى استانادا تۇرىپ كەلە جاتىرمىن جانە ەلوردامىزدى جاقسى كورەمىن. مەن قاراعاندىلىقپىن جانە ءومىرىمنىڭ سوڭىنا دەيىن وسىلاي قالا بەرمەك، سەبەبى مەنىڭ كىندىك قانىم وسى جەرگە تامعان». عارىشكەر توقتار اۋباكىروۆ بارشا قازاقستاندىقتاردى ەل تاۋەلسىزدىگىنىڭ 25 جىلدىق مەرەيتويىمەن قۇتتىقتادى. پروفەسسور ن. دريجد ءوز جەرلەستەرىنە دەگەن ىستىق ىقىلاسىن ءبىلدىردى. «مەن كەلەسى جىلى 90 جاسقا تولامىن. سونىڭ 88 جىلى قاراعاندىمەن بايلانىستى. مەن وسى جەردە دۇنيەگە كەلىپ، كەرەمەت ادامدارمەن جۇمىس جاساسقانىما ءدان ريزامىن»، - دەپ اتاپ ءوتتى ول.