تاۋەلسىزدىككە تارتۋ رەتىندە ەكى كىتاپتىڭ تۇساۋىن كەستى

استانا. قازاقپارات - استاناداعى ۇلتتىق اكادەميالىق كىتاپحانادا «ەگەمەن قازاقستان» رەسپۋبليكالىق گازەتى ق ر پرەزيدەنتى اكىمشىلىگىنىڭ باسپا ءسوز قىزمەتىمەن بىرلەسە شىعارعان كىتاپتاردىڭ تۇساۋىن كەستى.

تاۋەلسىزدىكتىڭ 25 جىلدىعىنا ارنالعان كىتاپتار «25 جىلدىڭ 25 ءساتى»، «جيىرما بەس جىل: جەڭىستەر مەن جەمىستەر» دەپ اتالادى. بۇدان بولەك، جۇرتشىلىققا «ەگەمەن قازاقستان كىتاپحاناسى» سەرياسىمەن جارىق كورگەن ءابىش كەكىلبايەۆتىڭ «ءداۋىر داۋىسى» جانە «ەتجەڭدى» ەگەمەن قازاقستان» جيناعى تانىستىرىلدى، دەپ حابارلايدى قازاقپارات.

جيىندى اشقان باسىلىم باسشىسى دارحان قىدىرالى ار كىتاپتىڭ مازمۇنى، ماڭىزى جايلى قىسقاشا اڭگىمەلەدى. ونىڭ ايتۋىنشا، «جيىرما بەس جىل: جەڭىستەر مەن جەمىستەر» كىتابى تاۋەلسىزدىك ءۇشىن اسا ماڭىزدى جىلداردىڭ اربىرىنە ەگجەي-تەگجەي توقتالادى. ونداعى ماقالالاردىڭ اۆتورلارى قاتارىندا ءابىش كەكىلبايەۆ، مىرزاتاي جولداسبەكوۆ، جابال ەرعاليەۆ، نۇرلان ورازالين سياقتى ەسىمى ەلگە بەلگىلى تۇلعالار بار.

«بۇگىنگى كىتاپتاردى شىعارۋ بارىسىندا ءداستۇر ساباقتاستىعىن ساقتاۋعا ەرەكشە دەن قويدىق دەپ ەدىم. بۇلاي دەيتىنىمىز، ءدال وسىنداي «ەگەمەن قازاقستان» گازەتىمەن بىرلەسكەن جوبالار بۇعان دەيىن دە اتقارىلىپ كەلگەن بولاتىن. ال ءتول تاۋەلسىزدىك مەرەكەسىنە وراي شىققان ءونىمنىڭ مازمۇنى باي، كوركەمدىك پۋبليتسيستيكالىق دەڭگەيى جوعارى بولىپ وتىر»، - دەدى ق ر پرەزيدەنتى اكىمشىلىگى باسپا ءسوز حاتشىسىنىڭ ورىنباسارى باۋىرجان وماروۆ.

جيىنعا مىرزاتاي جولداسبەكوۆ، اقان بيجانوۆ، سۇلتان ورازالين، سەرىك قيرابايەۆ، باۋىرجان وماروۆ، نەسىپبەك ايت ۇلى سياقتى مەملەكەت، قوعام جانە مادەنيەت قايراتكەرلەرى قاتىسىپ، لەبىزدەرىن ءبىلدىردى. جالپى «ەگەمەن قازاقستان» گازەتى الداعى ۋاقىتتا كىتاپتار سەرياسىن شىعارۋدى جالعاستىرادى. وندا ەل گازەتىندە ەڭبەك ەتكەن قالامگەرلەردىڭ جيناقتارىن باسۋ جوسپارلانعان. سونىڭ ىشىندە جازۋشى ءارى پۋبليتسيست شەرحان مۇرتازانىڭ جاقىندا جارىق كورەتىن كىتابى «نامىس نايزاعايى» دەپ اتالماق.

بۇدان بولەك، شارا اياسىندا «ەگەمەن قازاقستان» گازەتى ۇيىمداستىرعان «تاۋەلسىزدىك: تۇلعا، تاعىلىم، تاعدىر» اتتى ارنايى شىعارماشىلىق بايقاۋ قورىتىندىسى شىعارىلىپ، جۇلدەگەرلەردى ماراپاتتاۋ ءراسىمى ءوتتى. كونكۋرستىڭ اقىلداستار القاسى شەشىمىمەن بەلگىلى جۋرناليست قايسار ءالىم 1- ورىنعا لايىق دەپ تانىلسا، جاقسىباي مۇسايەۆ 2- ورىندى يەلەندى. ال 3- ورىن كەنجەبولات جولدىباي مەن احمەت ءومىرزاققا بەرىلدى. ايتقادىر تىلەۋوۆكە ارنايى ىنتالاندىرۋ سىيلىعى تابىس ەتىلدى.