باس پروكۋرور ءوزىن ورتەپ جىبەرگەن رىسمانوۆانىڭ اپكەسىن قابىلدادى

استانا. قازاقپارات - ق ر باس پروكۋرورى جاقىپ اسانوۆ قاداعالاۋشى ورگان عيماراتى الدىندا ءوزىن ورتەپ جىبەرگەننەن كەيىن قايتىس بولعان مايرا رىسمانوۆانىڭ اپكەسىن قابىلدادى، دەپ حابارلايدى قازاقپارات.

«بۇگىن باس پروكۋرور جاقىپ اسانوۆ 18 ارىزدانۋشىنى، ونىڭ ىشىندە مايرا رىسمانوۆانىڭ اپكەسى ءدانيا رىسمانوۆانى جەكە قابىلدادى. باس پروكۋرور رىسمانوۆانىڭ اپكەسىنە جاقىن تۋىسىنىڭ مەزگىلسىز قازا تابۋىنا بايلانىستى كوڭىل ايتىپ، جەرلەۋ راسىمىنە وراي وتباسىنا جاردەم كورسەتىلەتىندىگىن اتاپ ءوتتى»، - دەلىنگەن باس پروكۋراتۋرا تاراتقان اقپاراتتا.

ۆەدومستۆو اقپاراتىنا سايكەس، ۇلى ە. احمەتوۆتىڭ سوتتالۋىنا كەلىسپەگەن مايرا رىسمانوۆانىڭ شاعىمى باس پروكۋراتۋراعا 2016 -جىلدىڭ 28 -قاراشاسىندا تۇسكەن. شاعىمداعى دالەلدەردى تەكسەرۋ ءۇشىن سوتتان قىلمىستىق ءىس سۇراتىپ الىنعان. ە. احمەتوۆ 2015 -جىلدىڭ 15 -ماۋسىمىندا شۋ اۋداندىق سوتىنىڭ ۇكىمىمەن ءىرى مولشەردە ەسىرتى زاتىن زاڭسىز ساقتاعانى ءۇشىن 4,5 جىلعا باس بوستاندىعىنان ايىرىلعان. ۇكىمدى جامبىل وبلىستىق سوتىنىڭ اپپەلياتسيالىق ساتىسى دا وزگەرىسسىز قالدىرعان. ۇكىمگە بايلانىستى ەلىمىزدىڭ جوعارعى سوتىنا شاعىم جاسالماعان.

«ايتا كەتەرلىگى، رىسمانوۆانىڭ ۇلىنىڭ زاڭسىز سوتتالۋى تۋرالى دالەلدەرى وبلىستىڭ پوليتسيا قىزمەتكەرلەرىنە قاتىستى قوزعالعان باسقا جەتى قىلمىستىق ءىستى تەرگەۋ بارىسىندا تەكسەرىلۋدە. تەرگەۋ ناتيجەسىنە سايكەس ە. احمەتوۆتى سوققىعا جىققانى ءۇشىن ايىپتالعان وبلىستىق ءى ءى د قىزمەتكەرى جيدەشەۆ تاراز قالالىق سوتىمەن سوتتالعان. ۇكىم زاڭدى كۇشىنە ەنگەن جوق. ءىستى اپەللياتسيالىق تارتىپپەن قايتا قاراۋ اعىمداعى جىلدىڭ 20 -جەلتوقسانىنا بەلگىلەنگەن»، - دەپ حابارلادى باس پروكۋراتۋرادان.

ايتا كەتەيىك، اعىمداعى جىلدىڭ 6 -جەلتوقسانى كۇنى كۇندىزگى ساعات 12-16 دا ق ر باس پروكۋراتۋراسىنىڭ باقىلاۋ- وتكىزۋ پۋنكتىندە 1968 -جىلى دۇنيەگە كەلگەن مايرا رىسمانوۆا ءوزىن-ءوزى ورتەپ، قالالىق اۋرۋحاناعا جەتكىزىلگەن بولاتىن. بۇگىن ول قايتىس بولدى.

اۆتور: مارلان جيەمباي