ارقا توسىندە التىن وندىرىلەتىن بولدى

استانا. قازاقپارات - جەزقازعاننىڭ ىرگەسىندە جاڭا كەن ورنى اشىلىپ، التىن كەنىن شوعىرلى سىلتىسىزدەندىرۋ قۇرىلعىلار كەشەنى مەن قۇرامىندا التىن كەنى بار رۋدالاردى وڭدەۋگە ارنالعان وندىرىستىك مودۋل ىسكە قوسىلدى.

 ەندى قالادان نەبارى 140 شاقىرىم جەردەگى جالتىربۇلاق كەن ورنىنان قازىلعان التىن كەنى زامانعا ساي كۇردەلى تەحنولوگيامەن شايىلىپ، شىعىس قازاقستانداعى التىن قورىتۋ زاۋىتىنا جونەلتىلەدى. وندا جەزقازعان كەنىنەن دورە قورىتپاسى الىنىپ، نارىققا جول تارتادى، - دەپ حابارلايدى قالا اكىمدىگىنىڭ باسپا ءسوز قىزمەتى.

 جالتىربۇلاق كەن ورنىنداعى جاڭا قۇرىلعىنى ىسكە قوسۋعا ارنالعان سالتاناتتى شاراعا جەزقازعان قالاسىنىڭ اكىمى باتىرلان احمەتوۆ، «جالتىربۇلاق» ا ق- ى فيليالىنىڭ ديرەكتورى سەرگەي ۆەرپاتا، فيليال ديرەكتورىنىڭ ورىنباسارى ماكسيم ابلين قاتىستى.

- قۇرمەتتى جەرلەستەر، قادىرلى جەزقازعاندىقتار! سىزدەردى ەل تاۋەلسىزدىگىنىڭ 25 جىلدىق مەرەيتويىمەن قۇتتىقتايمىن. تاۋەلسىزدىك جىلدارىندا ەلىمىزدە كوپتەگەن يننوۆاتسيالىق- يندۋستريالىق جوبالار جۇزەگە اسىپ جاتىر. مەرەيتوي قارساڭىندا ءوتىپ جاتقان «25 جۇلدىزدى كۇن» اكسياسى اياسىندا وڭىرىمىزدەگى تاعى ءبىر قۋانىشتى وقيعاعا كۋا بولىپ وتىرمىز. بۇگىن جاڭا ءوندىرىس نىسانى ىسكە قوسىلعالى تۇر. مۇندا 150 دەن استام ادامعا جاڭا جۇمىس ورنى اشىلادى، ەڭبەككەرلەرگە قاجەتتى بارلىق جاعداي جاسالىپ وتىر. جاڭا كاسىپورىننىڭ وسى كەن ورنىنىڭ توڭىرەگىندەگى اۋىل تۇرعىندارىنا دا بەرەرى مول، - دەدى نىساننىڭ اشىلۋ سالتاناتىندا سويلەگەن سوزىندە باتىرلان احمەتوۆ.

 سارىكەڭگىر اۋىلدىق وكرۋگىنا قاراستى اۋماقتاعى كەن ورنىندا قۇرىلىس جۇمىستارى بىلتىر باستالعان. التىن كەنىن شايۋ جانە وڭدەۋ ءوندىرىسىنىڭ قۇرىلىسىنا باس- اياعى 3,4 ميلليارد تەڭگە جۇمسالسا، ونىڭ 2,4 ميلليارد تەڭگەسى كومپانيانىڭ ءوز قاراجاتى كورىنەدى. جوبانىڭ تولىق قۋاتىنا ساي مۇندا جىلىنا 500 مىڭ توننادان 1 ميلليون تونناعا دەيىن رۋدا وڭدەلمەك. كاسىپورىننىڭ اقىرعى ءونىمى دورە قورىتپاسىنىڭ باستى ساتىپ الۋشىسى - قازاقستان رەسپۋبليكاسىنىڭ ۇلتتىق بانكى.

 دورە قورىتپاسىنىڭ قۇرامىنداعى التىننىڭ ۇلەسى ادەتتە 70 پروتسەنتتەن كەم بولمايدى. التىن كەن ورىندارىنان الىنعان قورىتپا ارى قاراي تازارتۋ زاۋىتىنا جونەلتىلەدى. وندا قورىتپا بالقىتىلىپ تازارتىلعان، سىناماسى قويىلعان، الەمدىك ستاندارتتارعا ساي التىن قۇيماسى تۇرىندە ساتىلىمعا شىعارىلادى.

- كاسىپورىن تولىق قۋاتىنا ساي ىسكە قوسىلعاندا 150 ادام جۇمىس ىستەيتىن بولادى. بولاشاقتا ءوندىرىس كولەمىن ارتتىرۋ ويدا بار. كەلەر جىلى نارىقتاعى سۇرانىس، ەكونوميكالىق جاعداي ويداعىداي بولسا، ءبىز وسى جەردە دورە قورىتپاسىن قۇياتىن جاڭا زاۋىتتىڭ قۇرىلىس جوباسىن ازىرلەۋدى جوسپارلاپ وتىرمىز. وندا ءبىز وسى جەردە التىن كەنىن وڭدەۋشى تولىق سيكلدى ىسكە قوساتىن بولامىز، - دەيدى «جالتىربۇلاق» ا ق فيليالىنىڭ ديرەكتورى سەرگەي ۆەرپاتا.

كاسىپورىن باسشىسى قاجەتتى ءوندىرىس قۇرالدارى مەن قۇرىلعىلارىن تولىقتاي وتاندىق وندىرۋشىلەردەن الاتىندارىن، جۇمىسشىلاردىڭ دا قاراعاندى، شىعىس قازاقستان وبلىستارى مەن الماتى قالاسىنىڭ تۇرعىندارى ەكەنىن ايتادى. سونداي- اق، كومپانيا كەن وڭدەۋ ورنىندا جۇمىسشىلارعا ارنالعان جاتاقحانا تۇرعىزىپ، ونى قاجەتتى قۇرالدارمەن جابدىقتاعان. ەكى، ءۇش، ءتورت كىسىلىك جاتاقحانا بولمەلەرى قازاندىق ارقىلى جىلىتىلادى، ەلەكتر توعى، ينتەرنەت جۇيەسى مەن تەلەفون جەلىسى تارتىلعان. ۇلكەن اسحانا دا جۇمىس ىستەپ تۇر. جالتىربۇلاقتىق جۇمىسشىلار جالاقىلارىنىڭ قازىر 80-250 مىڭ تەڭگە ارالىعىندا ەكەنىن، ۆاحتالىق جۇيەمەن جۇمىس ىستەيتىندىكتەن سەحتاردا، جۇمىسشى قالاشىعىندا بارلىق تۇرمىستىق، سانيتارلىق جاعدايلاردىڭ قاراستىرىلعانىن ايتادى.

دارحان مۇقانوۆ