استانانىڭ قاي نۇكتەلەرىندە سىمسىز ينتەرنەتتى تەگىن پايدالانۋعا بولادى
اگەنتتىكتىڭ رەسمي ساۋالىنا وراي ەلوردا اكىمدىگىنەن كەلگەن مالىمەتتەرگە سايكەس، ولاردىڭ قاتارىندا استانا قالاسىنىڭ حالىقارالىق اۋەجايى، تەمىر جول جانە اۆتوبۋس ۆوكزالدارىمەن قاتار «كەرۋەن»، «ارۋجان»، «حان شاتىر»، «ازيا پارك» سىندى ويىن- ساۋىق ساۋدا ورتالىقتارى بار. مۇنان بولەك، الاۋ مۇز ايدىنى مەن الاتاۋ سپورت كەشەنىندە دە عالامتورعا تەگىن كىرە الاسىز. سونىمەن قاتار ەلوردانىڭ ءبىرقاتار مەيرامحاناسىندا دا تەگىن WI- FI نۇكتەسى ورناتىلعان. جالپى، بۇگىنگى كۇنى بۇل جوبانى «The One capital» كومپانياسى تولىقتاي قارجىلاندىرىپ، شىعىننىڭ ءبارىن ءوز موينىنا الىپ وتىر.
سوڭعى ۋاقىتتا تەگىن WI- FI نۇكتەسىن ەلوردالىقتاردىڭ بەلسەندى تۇردە پايدالانا باستاعانىن بايقاۋعا بولادى. ماسەلەن، وسى جىلدىڭ ىشىندە عانا بۇل نۇكتەلەرگە 1685800 بىرەگەي پايدالانۋشى قوسىلىپ، ولار 79225 گيگابايت ترافيك جاراتقان.
ايتا كەتەرلىگى، بۇگىنگى كۇنى ەلوردانىڭ 550 قوعامدىق اۆتوبۋسىندا دا تەگىن WI- FI نۇكتەسى ورناتىلعان. دەگەنمەن، سوڭعى ۋاقىتتا سىمسىز ينتەرنەتتى پايدالانۋ ەرەجەسىنە ەنگىزىلگەن وزگەرىستەر مەن ۇيالى بايلانىس وپەراتورلارىنىڭ 4 G جۇيەسىنە اۋىسۋىنا بايلانىستى قوعامدىق كولىكتەرگە ورناتىلعان قۇرال- جابدىقتاردى قايتا ورناتۋ جۇمىستارى جۇرگىزىلۋدە.