باس پروكۋرور ءوزىن-ءوزى ورتەگەن ادام ءۇشىن بىلىكسىز مامانداردى كىنالادى

استانا. قازاقپارات - بۇگىن كاسىبي مەملەكەتتىك اپپاراتتى قالىپتاستىرۋ ماسەلەلەرىنە ارنالعان جيىندا ق ر باس پروكۋرورى جاقىپ اسانوۆ ءوزىن-ءوزى ورتەگەن ادامعا قاتىستى مامانداردىڭ بىلىكسىزدىگىن كىنالادى.

ەسكە سالا كەتەيىك، وسىدان ءبىراز بۇرىن باس پروكۋراتۋرا عيماراتىنىڭ الدىندا ايەل ادام ءوزىن-ءوزى ورتەگەن بولاتىن، دەپ حابارلايدى قازاقپارات ءتىلشىسى. ايتا كەتەرلىگى، جيىندا باس پروكۋراتۋرانىڭ كادر جونىندەگى دەپارتامەنت باسشىسى الەكساندر وگاي مامانداردى ىرىكتەۋ جۇمىسى جايىندا بايانداعان بولاتىن. ونىڭ ايتۋىنشا، بيىل ارنايى جوبا اياسىندا ىرىكتەۋدىڭ جاڭا جۇيەسى ەنىگىزىلەدى. الايدا وسى جۇمىس بارىسىندا كوپتەگەن ولقىلىقتار انىقتالعان. «ءبىز قۇجات قابىلداۋدى بەس كۇن ەمەس، ءبىر جارىم اي جۇرگىزدىك. شىنى كەرەك، جاستار بەلسەندى تۇردە قاتىستى. ءبىر ايدىڭ ىشىندە 1350 ادام ءوتىنىش بەردى. دەگەنمەن، ولاردىڭ ىشىندە تەك 378 ى عانا زاڭدى بىلەتىندەرىن دالەلدەدى. ال سىناقتان 69 اق ادام ءوتتى. نەگە ولاي؟ ءبىزدىڭ تالابىمىز جوعارى دا ەمەس. بىزدىڭشە، نەگىزگى ماسەلە - ءبىلىم بەرۋ دەڭگەيىنىڭ تومەندىگىندە»، - دەيدى ا. وگاي.

ونىڭ سوزىنە قاراعاندا، جالپى، ىرىكتەۋگە 82 ۋنيۆەرسيتەتتىڭ وكىلدەرى قاتىسىپ، 52 جوعارى وقۋ ورىننىڭ تۇلەگى سىناقتان وتە المادى قىزىل ديپلوممەن وقۋ ورنىن بىتىرگەندەردىڭ ءوزى قاراپايىم زاڭداردى بىلمەيتىن بولىپ شىققان. «كونكۋرسقا قاتىسقان قازاق گۋمانيتارلىق يننوۆاتسيالىق زاڭ ۋنيۆەرسيتەتىنىڭ ءبىر تۇلەگى ءبىر ساعاتتىڭ ىشىندە ەڭبەك تاجىريبەسىنە قاتىستى ءتورت-اق جول جازىپتى. ال ەسسەگە ەكى ساعات كەتىرسە دە، التى-اق جول شىعارمانى جازىپ بەرگەن. جولداسبەكوۆ اتىنداعى ەكونوميكا مەن قۇقىق اكادەمياسىنىڭ تۇلەگى ءۇش ساعات وتىرىپ، 140 سوزدەن تۇراتىن شىعارما جازدى. ەسەسىنە ول 53 ورفوگرافيالىق قاتە جىبەردى. ءتىپتى سىناقتان وتكەن 62 ۇمىتكەر پسيحولوگتىڭ سىنىنا شىداي المادى. ولاردىڭ ەسىرتكى، الكوگول، ويىن-ساۋىق پەن سۋيتسيدكە جاقىن ەكەنى انىقتالدى. راسىندا، بىزگە بوتانيكتەر كەرەك ەمەس. ناعىز كاسىبي ماماندار قاجەت»، - دەدى دەپارتامەنت باسشىسى.

ءدال وسى ساتتە ق ر باس پروكۋرور جاقىپ اسانوۆ بايانداماشىنى توقتاتىپ: «مەن كەشىرىم سۇرايمىن، ءبىر اپتا بۇرىن ءبىزدىڭ عيماراتىمىزدىڭ الدىندا ءبىر ادام ءوزىن-ءوزى ورتتەپ جىبەردى. ەندى، ويلانىپ كورىڭىزشى، ءبىز جاڭاعى ايتىلعان مامانداردى جۇمىسقا الساق، نە بولادى؟ ءيا، ولاردا ديپلوم بار. ءبىراق ونداي قىزمەتكەرلەر حالىقپەن سويلەسە الا ما؟ ازاماتتاردىڭ مۇڭ-مۇقتاجىن تۇسىنە الا ما؟ نەگىزى، اقشانى عانا ويلايتىن جوعارى وقۋ ورىندارىن جابۋ قاجەت. اكىمشىلىك رەسۋرستارمەن ەمەس، اتا-انالاردىڭ ساناسىنا جەتكىزۋ ارقىلى، جاستارعا كەڭىنەن ءتۇسىندىرۋ ارقىلى ونداي ءبىلىمنىڭ تۇككە تۇرمايتىنىن اشىق كورسەتۋىمىز كەرەك»، - دەپ اتاپ كورسەتتى ج. اسانوۆ. ونىڭ ايتۋىنشا، بۇگىندە پروكۋرورلار قاتارىندا زاڭدى بۇزاتىن ماماندار ءالى دە بار.

اۆتور: ارمان اسقاروۆ