قازاقستاندا نان مەن ءسۇتتىڭ باعاسى نەگىزسىز قىمباتتاعان

استانا. قازاقپارات - قازاقستاندا نان مەن ءسۇتتىڭ باعاسى نەگىزسىز قىمباتتاتىلىپ كەلگەن. كۇزگە تامان سورەلەردەن جوعالىپ، تاپتىرمايتىن قانتتىڭ قۇنى دا اسىرا كوتەرىلىپتى.

بۇگىنگى ۇكىمەت وتىرىسىندا ۇلتتىق ەكونوميكا ءمينيسترى قۋاندىق بيشىمبايەۆ جىل باسىنان بەرى جۇرگىزىلگەن تەكسەرىستىڭ ناتيجەسىن جاريالادى.

ءمينيستردىڭ ايتۋىنشا، بۇگىنگە دەيىن مونوپولياعا قارسى كوميتەت ماماندارى 40 تەرگەۋ ءىسىن جۇرگىزگەن. سونىڭ ناتيجەسىندە 45 ساۋدا نىسانىنىڭ ەشبىر ەكونوميكالىق سەبەپسىز باعانى كوتەرگەنى انىقتالىپتى. قيسىنسىز قىمباتتادى دەلىنگەن ازىق- تۇلىكتەردىڭ ىشىندە ۇن، نان، ءسۇت، قانت جانە ەت ونىمدەرى سياقتى الەۋمەتتىك ماڭىزى جوعارى تاۋارلار بار. وسىلاردى العا تارتقان قۋاندىق بيشىمبايەۆ، باعالاردىڭ شەكتى دەڭگەيىن زاڭ جۇزىندە بەلگىلەۋ كەرەك دەدى.

قۋاندىق بيشىمبايەۆ، ق ر ۇلتتىق ەكونوميكا ءمينيسترى:

- ءاربىر ساۋدا ورنىنىڭ ساناتىنا قاراي اي سايىن الەۋمەتتىك ماڭىزدى ازىق- تۇلىكتەردىڭ ۇسىنىلاتىن باعاسىن بەلگىلەپ وتىرامىز. سونداي- اق، بۇل باعالاردى ساۋدا سۋبەكتىلەرى جالپىلاما جاريالاپ وتىرۋى ءتيىس. وسىلايشا، كەلگەن تۇتىنۋشى الاتىن تاۋارىنىڭ ۇسىنىلعان قۇنىن بىلەتىن بولادى جانە تاۋار باعاسىن قاداعالاۋعا ات سالىسا الادى. ايتارلىقتاي ايىرماشىلىق بايقاعان جاعدايدا قۇزىرەتتى ورگاندارعا شاعىمدانۋعا كەڭەس بەرەمىز.

 

31.kz