جەدەل كومەك كورسەتۋ قىزمەتتەرى استانادا داۋىل سوعاتىندىعىن ەسكەرتۋدە

بۇل جايىندا Smart Astana قوسىمشاسىندا جاريا ەتىلدى، دەپ حابارلايدى قازاقپارات.

«وسىعان بايلانىستى «112 قىزمەتى» تۇرعىنداردان الىس ساپارلارعا شىقپاۋعا جانە جولدا اباي بولۋعا شاقىرادى. كوممۋنالدىق قىزمەتتەردىڭ جۇمىسىنا كەدەرگى جاساماس ءۇشىن كولىكتەردى جولداردىڭ بويىندا قالدىرماۋدى سۇرايدى. قالا كوشەلەرى مەن تروتۋارلاردى تازالاۋ جۇمىستارى ءۇزىلىسسىز جۇرگىزىلىپ جاتىر»، - دەلىنگەن حابارلامادا.

سينوپتيكتەردىڭ دەرەكتەرىنە قاراعاندا، 13 -جەلتوقساندا ەلوردادا كوشپەلى بۇلت شىعادى، تۇستەن كەيىن قار جاۋادى، كوكتايعاق بولىپ، ۇيىتقي بوران سوعادى. وڭتۇستىكتەن، وڭتۇستىك- باتىستان سەكۋندىنا 15-20 مەترلىك جىلدامدىقپەن سوققان جەلدىڭ ەكپىنى 23-28 م/س دەيىن كۇشەيەدى.

اۋا تەمپەراتۋراسى تۇندە -13...-15°س، كۇندىز -3...-5°س. ال 14 جەلتوقسان كۇنى كوشپەلى بۇلت شىعىپ، وقتىن- وقتىن قار جاۋادى، كوكتايعاق، بوران سوعادى. وڭتۇستىك- باتىستان 9-14 م/س جىلدامدىقپەن سوعاتىن جەلدىڭ ەكپىنى 15-20 م/س دەيىن كۇشەيەدى. اۋا تەمپەراتۋراسى تۇندە -3...-5°س، كۇندىز 0...-2°س. 15 -جەلتوقساندا ەلوردادا كوشپەلى بۇلت شىعادى، وقتىن- وقتىن قار جاۋادى، بۇرقاسىنداتادى. سولتۇستىك- باتىستان 9-14 م/س جىلدامدىقپەن جەل سوعادى. اۋا تەمپەراتۋراسى تۇندە جانە كۇندىز -8...-10°س بولادى.

اۆتور: مارلان جيەمباي