شىعىس قازاقستاندا ومىرگە قاۋىپتى سىناق جاساعان ەر ادام ايىپپۇل ارقالاۋى مۇمكىن - كەسكىن
فوكۋس كورسەتۋشى انتون روسس ءجۇرىپ كەلە جاتقان كولىككە بايلاۋلى جاتقان كۇيدەن بوساپ شىققانىن جەلىگە ورنالاستىرعان. قۇقىق قورعاۋشىلار بۇل تريۋكتە اكىمشىلىك قۇقىق بۇزۋشىلىق بارىن ايتادى، - دەپ حابارلايدى Tengrinews.kz ءتىلشىسى.
قازاقستاندا بەلگىلى فوكۋسشى، يلليۋزيونيست جانە ەكسترەمال انتون روسس الەۋمەتتىك جەلىدەگى ءوز پاراقشاسىنا قاۋىپتى ءنومىر تۇسىرىلگەن ۆيدەونى ورنالاستىرعان. ەر ادام قارلى جولدىڭ ۇستىندە سۇيرەتىلىپ كەلە جاتىپ، بايلاۋلى جەرىنەن بوساپ شىعادى، ونى وسى ساتتە كولىك سۇيرەپ كەلە جاتادى. ول بوساپ شىققانشا مۇزدى تاسجول ۇستىندە سۇيرەتىلىپ بارا جاتقان، ال ونىڭ ءىس-ارەكەتىن وپەراتور ءتۇسىرىپ وتىرعان.
«مۇندايدى بالا كۇنىمدە كينودان كوردىم، ەسەيگەن سوڭ قايتالاعىم كەلدى. كوندىكتىرۋ جەيدەسىنەن بوساپ شىعۋ وتە كۇردەلى جانە قىزىقتى تريۋك. وسىنىڭ سالدارىنان ارقامدى ۇرىپ الدىم، ءبىراق، العان اسەر دە كەرەمەت. قايتالاۋعا تىرىسپاڭىزدار. مەن كاسىبي مامانمىن جانە مۇندايعا الدىن الا دايىندالامىن»، - دەپ پىكىرىن ءبىلدىردى انتون روسس.
روليكتى كورگەن ءبىراز ادام ءوز پىكىرىن قالدىرىپ ۇلگەرگەن. ءتىپتى، ەكسترەمالدى كادرلار ىشكى ىستەر دەپارتامەنتىنىڭ وكىلدەرىن دە قىزىقتىرعان كورىنەدى. قۇقىق قورعاۋ ۆەدومستۆوسىندا مۇنداي ويىن- ساۋىق - اكىمشىلىك ايىپپۇلعا سەبەپ دەپ ەسەپتەيدى.
«ءبىز قازىر ۆيدەونى تولىعىمەن زەرتتەپ جاتىرمىز. مۇنداي سىرعاناق - ومىرگە قاۋىپتى، ەر ادام كولىك توقتاعان كەزدە دوڭگەلەك استىنا ءتۇسىپ كەتۋى نەمەسە قارسى باعىتتاعى كولىككە سوعىلۋى مۇمكىن ەدى. قالاي بولعاندا دا، كولىك جۇرگىزۋشىسىنە قاتىستى «جولاۋشىلار تاسىمالى ەرەجەلەرىن ساقتاماۋ» دەرەگى بويىنشا اكىمشىلىك ءىس قوزعالادى. جۇرگىزۋشىگە ايىپپۇل سالىنۋى مۇمكىن»، - دەيدى ش ق و ءى ءى د باسپا ءسوز قىزمەتىنىڭ جەتەكشىسى باقىتجان تورعايەۆ.
ەسكە سالايىق، انتون روسس امەريكالىق تريۋك جاساۋشى گارري گۋددينيدىڭ بيىك جەرگە اسىلىپ تۇرعان كۇيدە شىنجىرمەن ورالعان جەرىنەن بوساپ شىققان اتاقتى تريۋگىن قايتالاعاننان كەيىن تانىمال بولا باستادى. ەكى اپتا بۇرىن روسس ۇستىندەگى كيىمىن ورتەپ، قاراۋسىز قالعان كوپقاباتتى ءۇيدىڭ توبەسىنەن قار ۇيىندىسىنە سەكىرگەن بولاتىن. مۇنى ول سىرقاتتانعان قىز بالانىڭ ەمىنە قارجى جيناۋعا نازار اۋدارتۋ ءۇشىن جاساعان ەدى.