بولاتبەك پەن مۇحتار تىكەلەي ەفيردە جەكپە- جەك ايتىسقا شىعۋى مۇمكىن
بۇل تۋرالى ءجۇرسىن ەرمان فەيسبۋكتەگى ءوز پاراقشاسىندا حابارلادى.
«بارىڭە! اۋرۋحانادا جاتىرمىن. بىتەلىپ قالعان قان تامىرلارىما وتا جاساماقشى. وسىدان امان شىقسام ءبىر جوسپارىم بار:
التىن دومبىرا تۋرالى ءارتۇرلى اڭگىمە ايتىلدى عوي. انىعى اللاعا ايان. بولاتبەك پەن مۇحتاردىڭ اراسىندا ۋاقىتى شەكتەۋسىز جەكپە جەك ايتىس وتكىزگىم كەلەدى. تىكەلەي ەفيردە. كورسەتىلىمدى قاي تەلەارنا موينىنا الا الادى؟ دەمەۋشى بولعىسى كەلەتىندەر بار ما؟ تورەلىكتى حالىق جاساسا قايتەر ەدى؟ قانداي جولمەن؟» - دەپ جازعان قازاقستان ايتىس اقىندارى مەن جىرشى تەرمەشىلەردىڭ حالىقارالىق وداعىنىڭ ءتوراعاسى ءجۇرسىن ەرمان.
ودان بولەك ايتىس جاناشىرى جۇرتتى «التىن دومبىرا» جىر دوداسىنداعى شەشىم تۋرالى الىپ- قاشپا اڭگىمەنى دوعارىپ، ەكى اقىننىڭ جەكپە- جەك ايتىسىن وتكىزۋگە قول ۇشىن سوزۋعا شاقىرعان:
«... اقىل قوسىڭدار. پىكىر ايتىڭدار. سىرتتان سىناي بەرۋ وڭاي عوي. ىشىندە بولىڭدار. ۇلت ونەرىنە شىن جاناشىر بولساڭدار، سوڭىنان جۇدىرىق بىلەپ اركىمدى عايباتتاعانشا، قازىر كومەككە كەلىڭدەر» دەگەن.
ءسوز سوڭىندا ول حالىقتان تەز ساۋىعىپ، ويداعى ءىسىن جۇزەگە اسىرۋ ءۇشىن تىلەكتەس بولۋىن سۇراعان. «جوبانى جۇزەگە اسىرۋ ءۇشىن مەنىڭ ءولىپ قالماۋىم كەرەك، دۇعالارىڭا قوسا جۇرىڭىزدەرشى. قۇرمەتپەن ...»، دەپ اياقتالادى جازبا.
ايتا كەتەيىك، الماتىدا وتكەن «التىن دومبىرا» ايتىسىندا حالىق تورەشىلەردىڭ شەشىمىنە نارازىلىق ءبىلدىرىپ، شۋلاپ كەتكەن ەدى. ساحناعا كوتەرىلگەن قالا اكىمى باۋىرجان بايبەك حالىققا باسۋ ايتىپ، باس جۇلدە قىزىلوردالىق مۇحتار نيازوۆقا بەرىلگەن بولاتىن. ال الماتىنىڭ اردا اقىنى بولاتبەك ورازبايەۆ ءبىرىنشى ورىندى يەلەنگەن ەدى.
كەيىن وسى داۋعا قاتىستى ايبەك قاليەۆ «التىن دومبىرا» ايتىسى ەل اراسىنا ىرىتكى سالاتىن بولسا، ونى وتكىزبەي- اق قويۋ كەرەك دەگەن پىكىر ايتقان.
ودان سوڭ 8 - جەلتوقسان كۇنى بولاتبەك اقىن بۇل داۋعا ءوزى نۇكتە قويعان بولاتىن.
اۆتور: ەربول جانات