سەنات ماقۇلداعان زاڭ جوباسى لاڭكەستىك ءۇشىن جاۋاپكەرشىلىكتى كۇشەيتەدى
زاڭ جوباسىن تانىستىرۋ بارىسىندا ق ر ۇلتتىق قاۋىپسىزدىك كوميتەتى ءتوراعاسىنىڭ ورىنباسارى مارات قالقابايەۆتىڭ اتاپ وتۋىنشە، لاڭكەستىك پەن ەكسترەميستىك قىلمىستار ءۇشىن جاۋاپكەرشىلىكتى كۇشەيتەتەتىنىن اتاپ ءوتتى.
«ۇسىنىلىپ وتىرعان زاڭ جوباسى ەلباسىنىڭ وسى جىلعى ماۋسىم ايىنداعى قاۋىپسىزدىك كەڭەسىندە بەرگەن تاپسىرمالاردى ورىنداۋ ماقساتىندا ازىرلەندى. زاڭ جوباسىن دايىنداۋ بارىسىندا سوڭعى كەزدەرى ەلىمىزدە جانە باسقا دا مەملەكەتتەردە بولىپ جاتقان لاڭكەستىك قىلمىستاردىڭ ورىن الۋ سەبەپتەرى، ولارعا قارسى كۇرەستەگى وڭ ناتيجەلەر ەسكەرىلدى»، - دەدى قالقابايەۆ.
بۇدان بۇرىن حابارلانعانداي، قاراستىرىلىپ وتىرعان زاڭ جوباسىنىڭ نەگىزگى ماقساتى ەكسترەميزمگە جانە لاڭكەستىككە، قارۋ-جاراق اينالىمىنا قارسى ءىس-قيمىل مەن كوشى-قوندى رەتتەۋ سالالارىندا زاڭنامانى جەتىلدىرۋ بولىپ تابىلادى. زاڭ جوباسى ازاماتتاردى، قوعامدى جانە مەملەكەتتى قاتەردەن قورعاۋ دەڭگەيىن ارتتىرۋعا باعىتتالعان. اتالعان زاڭ جوباسىن تالقىلاۋ بارىسىندا ۇكىمەتتىك ەمەس سەكتور، قوعامدىق ۇيىمدار مەن وتاندىق جانە شەتەلدىك ساراپشىلاردىڭ قاتىسۋىمەن كەڭىنەن پىكىر الماسۋلار بولدى.
وسىعان بايلانىستى ىشكى ميگرانتتاردى تىركەۋ تۋرالى ماسەلە قىزۋ تالقىعا ءتۇستى. وندا قارۋ-جاراق اينالىمىن، ونى ساقتاۋ ءتارتىبىن باقىلاۋدى كۇشەيتۋ، ونىڭ ىشىندە ازاماتتىق، قىزمەتتىك قارۋ جانە وق-ءدارى اينالىمى، سونداي-اق كۇزەت قىزمەتىن جۇزەگە اسىرۋ سالاسىندا جۇمىس ىستەيتىن كاسىپكەرلىك سۋبەكتىلەرىن مەملەكەتتىك باقىلاۋدىڭ ەرەكشە ءتارتىبىن جۇزەگە اسىرۋ ەسكەرىلگەن.
بۇدان بولەك، ەكسترەميزم مەن تەرروريزم ءۇشىن، ونىڭ ىشىندە حالىقارالىق لاڭكەستىك ۇيىمدارعا جانە شەتەلدىك قارۋلى جانجالدارعا قاتىسقانى ءۇشىن جازاعا تارتۋ شارالارىن كۇشەيتۋ، لاڭكەستىككە ىقپال ەتەتىن ءدىني توپتار مەن بىرلەستىكتەردىڭ قىزمەتىنە تىيىم سالۋ قامتىلعان. سونىمەن قاتار تەرروريزمگە قارسى ءىس-قيمىل تۋرالى زاڭنامانى ساقتاماعانى ءۇشىن، سونداي-اق قولدانىلۋى مىندەتتى تەحنيكالىق قۇرالداردىڭ جارامسىزدىعى ءۇشىن كۇزەت قۇرىلىمدارىنىڭ جانە لاڭكەستىك جاعىنان وسال نىساندار يەلەرىنىڭ اكىمشىلىك جاۋاپكەرشىلىگىن ەنگىزۋ كوزدەلىپ وتىر.
اۆتور: رۋسلان عابباسوۆ