سوت ەلدەن تىس جەرگە شىعارىلعان قانداستارىمىزعا راقىمشىلىق جاساسا
«قۇرمەتتى قالمۇحانبەت نۇرمۇحانبەت ۇلى! ءوزىڭىز وتە جاقسى بىلەسىز، 2013 -جىلى ءتورت جىلسىز ازاماتتىق بەرىلمەيتىن ەتىلىپ اسىعىس قابىلدانعان قاتاڭ زاڭ شەتەلدەن كوشىپ كەلگەن نەشە جۇزدەگەن قانداستارىمىزدى اكىمشىلىك قۇقىق بۇزۋشىلىققا ۇرىندىردى. ودان قالا بەردى، ق ح ر- نان كەلگەن ەتنيكالىق قازاقتاردان تالاپ ەتىلەتىن سوتتىلىعىنىڭ بار نەمەسە جوق ەكەنى تۋرالى انىقتاما! سونىڭ كەسىرىنەن، مىسالى 2015 -جىلى 307 ەتنيكالىق قازاق ەلدەن تىس جەرگە شىعارىلىپتى. 2016 - جىلدىڭ العاشقى توعىز ايىندا 199 قانداسىمىز جازاعا تارتىلىپ، ءوز ەلىنە قايتارىلىپتى. بۇل اقپاراتتى ءبىزدىڭ سۇراتۋىمىزعا وراي، سەناتور مۇرات باقتيار ۇلىنا ءوز قولىڭىزبەن بەردىڭىز. ال، ءبىز جاعىنان سۇراۋ جىبەرىلگەنىمەن، ءسىز 2014 -جىلى قانشا ەتنيكالىق قازاقتىڭ ءدال وسى قۇقىق بۇزۋشىلىقتىڭ قۇربانى بولعانى تۋرالى مالىمەت بەرمەپسىز. 2014 -جىلعى كورسەتكىش بۇدان دا كوپ بولۋى مۇمكىن!»، - دەيدى ول مينيسترگە جازعان حاتىندا.
سونىمەن قاتار اقىن وكىنىشكە وراي، وسى اكىمشىلىك شارامەن سوتتىڭ شەشىمى ارقىلى ەلدەن شىعارىلعان قانداس ازاماتتار بەس جىلسىز قازاقستانعا ورالا المايتىندىعىن، وتباسىلار ەكىگە ءبولىنىپ قالعاندىعىن اتاپ وتكەن.
«بۇرىن ءبىر مارتە اكىمشىلىك قۇقىق بۇزعان شەتەلدىك ازامات جازاعا تارتىلىپ، ءوز ەلىنە قايتارىلاتىن بولسا، وتكەن جىلى قايتا قابىلدانعان زاڭ جوباسىندا بۇل نورما بىرنەشە رەت بۇزىلعان جاعدايدا ەلدەن شىعارىلادى دەپ وزگەرتىلدى («حالىقتىڭ كوشى- قونى تۋرالى» زاڭنىڭ 49-باپ، 5-تارماعى). مىنە، قازاقستان تاۋەلسىزدىگىنىڭ 25 جىلدىعى مەرەكەسىنە وراي ۇلت كوشباسشىسى نۇرسۇلتان نازاربايەۆ 30000 قىلمىسكەرگە راقىمشىلىق جاساعالى جاتىر. قازاقستان رەسپۋبليكاسىنىڭ ق ر ىشكى ىستەر ءمينيسترى مارتەبەڭىزبەن، ەسكى زاڭنىڭ تىم قاتاڭدىعىن ەسكەرە وتىرىپ، ءسىزدىڭ دە قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە سايكەس كوشى- قون زاڭناماسىن بۇزعانى ءۇشىن، 2014 - جىلدىڭ 1 - قاڭتارىنان بەرى سوت شەشىمىمەن ەلدەن تىس جەرگە شىعارىلعان سول قانداستارىمىزعا ءبىر مارتە راقىمشىلىق جاساتۋىڭىزدى سۇرايمىن! بۇل راقىمشىلىق ارقىلى تۋمالارىنان ءبولىنىپ قالعان ەتنيكالىق قازاقتار، اسىرەسە، بالالار، وتباسىنا قايتا قوسىلاتىن بولادى»، - دەدى اۋىت مۇقيبەك.
ايتا كەتەيىك، بۇگىن «نۇر وتان» پارتياسىندا قوعامدىق قابىلداۋ وتكىزگەن ەلىمىزدىڭ ىشكى ىستەر ءمينيسترى قالمۇحانبەت قاسىموۆقا 9 جاسار مەيىرگۇل وتىنىشپەن كەلگەن بولاتىن. ونىڭ اتا- اناسى دا ەلىمىزدىڭ كوشى- قون زاڭناماسىن بۇزعانى ءۇشىن قازاقستاننان شىعارىلعان ەدى. ال مەيىرگۇل بۇگىندە الماتىدا تۋىستارىنىڭ قولىندا تۇرىپ جاتىر.
قازىرگى ۋاقىتتا الماتىدا جالعىز ءوزى قالىپ، تۋىستارىنىڭ ءۇيىن پانالاعان كىشكەنتاي قىز بۇگىن ەلورداعا ارنايى كەلىپ، مۇڭىن ىشكى ىستەر ءمينيسترى قالمۇحانبەت قاسىموۆقا اقتاردى. «نۇر وتان» پارتياسىندا وتكەن قوعامدىق قابىلداۋدا مەيىرگۇل مينيسترگە ارنايى جازىلعان ءوتىنىشىن تابىستادى. اتا- اناسىمەن تەز ارادا قاۋىشاتىندىعىنا ءۇمىت ارتقان ول ەل تاۋەلسىزدىگىڭ 25 جىلدىعىنا وراي شەتتەن ورالعانعانىمەن قازاقستاننىڭ كوشى- قون زاڭناماسىن بۇزىپ كەرى قايتارىلعان قانداستارىمىزعا دا راقىمشىلىق جاسالسا دەيدى. وقىرمانعا مەيىرگۇلدىڭ مينيسترگە جازعان حاتىن ۇسىنباقپىز.
«قالمۇحانبەت قاسىموۆ اتاعا ءوتىنىش!
مەنىڭ اتىم مەيىرگۇل. جاسىم 9-دا. الماتى قالاسىنداعى №93 مەكتەپتىڭ 3 «ءا» سىنىبىندا وقيمىن. 2013 -جىلى قىتايدان الماتىعا كوشىپ كەلگەنبىز. ول جاقتا قىتاي بالاباقشاسىندا وقىدىم. اتا- انام مەنى قازاقشا وقىتامىن دەپ، مەن ءۇشىن قازاقستانعا كوشىپ كەلدى. اكەمنىڭ اتى ۇلاربەك، انامنىڭ اتى ورالحان. ءبىراق اكەم مەن شەشەمدى پوليتسيا قۇقىق بۇزدىڭ دەپ قىتايعا شىعارىپ جىبەردى. 5 جىل كەلە المايدى ەكەن. مەن الماتىدا جالعىز ءوزىم قالدىم. مەن اتا- انامدى قاتتى ساعىندىم. تۇندە توسەكتە جاتقاندا كۇندە جىلايمىن. ولار كۇندە تۇسىمە كىرەدى. تەز كەلسە ەكەن دەپ اللادان كۇندە تىلەيمىن. قالمۇحانبەت اتا مەن سەكىلدى ءسىزدىڭ دە نەمەرەڭىز بار شىعار، ماعان كومەكتەسىڭىزشى، وتىنەمىن. اكەم مەن شەشەمە جانە سونداي كىسىلەرگە ءبىر جولعا راقىمشىلىق جاساڭىزشى. «نۇر وتان» پارتياسىنا سول ءۇشىن الماتىدان كەلدىم. ولار قازاقستان تەز قايتىپ ورالسىنشى. مەن ولاردى قاتتى ساعىنىپ كەتتىم»، - دەيدى 9 جاستاعى مەيىرگۇل مينيسترگە جازعان حاتىندا.
اۆتور: مارلان جيەمباي