قازاق كۇرەسىن وليمپيادا ويىندارىنا قوسۋعا ءبىر ۇرپاقتىڭ كۇشى جەتپەيدى - شورايەۆ

استانا. قازاقپارات - بىرنەشە كۇن بۇرىن قازاقتىڭ ۇلتتىق كۇرەسى يۋنەسكونىڭ ماتەريالدىق ەمەس مادەني مۇرالار تىزىمىنە ەندى.

مۇنداي شەشىمدى ەفيوپيادا ماتەريالدىق ەمەس مادەني مۇرالاردى قورعاۋ جونىندەگى كوميتەت قابىلدادى. قازاق كۇرەسىن الەمگە مويىنداتۋ ءۇشىن كوپ جۇمىس اتقارعان ازاماتتاردىڭ ءبىرى - «قازاقستان بارىسى» قازاق كۇرەسىن دامىتۋ قورىنىڭ ءتوراعاسى ارمان شورايەۆ.

قازاقپارات تىلشىسىمەن اڭگىمەلەسكەن ول قازاق كۇرەسىن يۋنەسكو تىزىمىنە قوسىپ، حالىقارالىق فەدەراتسيا اشۋ ءۇشىن وزگە دە ازاماتتاردىڭ تىنىم كورمەي جۇمىس ىستەگەنىن ايتىپ بەردى.

- ارمان تولەگەن ۇلى، بۇل ءسۇيىنشى جاڭالىقتى ەستىپ، ءبىز دە قۋانىپ جاتىرمىز. جالپى، جۇيەلى جۇمىستان تەك وسىنداي ناتيجە كۇتكەن شىعارسىزدار؟

- وسىدان ءۇش جىل بۇرىن «قازاقستان بارىسى» قورى مەن رەسپۋبليكالىق قازاق كۇرەسى فەدەراتسياسى وسى جۇمىستى قولعا العان ەدىك. ياعني، وتە ساپالى ۆيدەو- پرەزەنتاتسيامىزدى قوسىپ، ءوتىنىش بەردىك. سونىمەن قاتار، يۋنەسكومەن كەلىسسوز جۇرگىزۋ ءۇشىن بۇكىل تەرميندى اعىلشىن تىلىنە اۋداردىق. بۇل - ناعىز كوزدىڭ مايىن تاۋىساتىن، تەر توككىزگەن جۇمىس ەدى. سوندىقتان، قولعا العان باستاما تەك وسىنداي ناتيجە بەرەدى دەپ قاتتى ۇمىتتەنگەن بولاتىنبىز. بۇل رەتتە، مەنىڭ جاقتاسىم، قاناتتاسىم، ارىپتەسىم، «قازاق كۇرەسى» رەسپۋبليكالىق فەدەراتسياسىنىڭ باس حاتشىسى سارسەن قۇرانبەك ۇلىنىڭ زور ەڭبەگىن ايتا كەتۋىم كەرەك. سارسەن قۇرانبەكتىڭ تالابى، تاجىريبەسى، ءبىلىمى بولماعاندا، ءبىزدىڭ كوماندا وسىنداي قۋانىشقا قول جەتكىزە المايتىن ەدى. بۇكىل ەڭبەك مەنىكى دەپ ويلاماسىن، سەبەبى، وتە قاراپايىم ءارى وتە ەڭبەكقور سونداي باتىرىن حالىق تانۋى كەرەك.

- قازاق كۇرەسىنىڭ يۋنەسكو تىزىمىنە ەنۋى بۇل سپورتتىڭ ەندىگى «تاعدىرىنا» قالاي اسەر ەتەدى؟

- ارينە، قازاق كۇرەسىنىڭ حالىقارالىق دەڭگەيدە مويىندالىپ، حالىقارالىق مارتەبەگە شىعۋى - العاشقى ۇلكەن قادام. ەندى، وزگە ەلدەردە قازاق كۇرەسى فەدەراتسياسىن اشۋ ءۇشىن سول ەلدەردىڭ رەسمي ورگاندارىنا وڭاي حابارلاسا الامىز. ءتىپتى، قاجەت بولعان جاعدايدا، وزگە ەلدەردىڭ بيۋدجەتىنەن قازاق كۇرەسىنە قارجى ءبولىنۋىن سۇراي الامىز. ءقازىر ونشاقتى ەلدە فەدەراتسيامىزدىڭ فيليالىن اشقانبىز. يۋنەسكو تىزىمىنە ەنگەننەن كەيىن دە وسى جۇمىستاردى جالعاستىرماقپىز. جۋىق ارادا حالىقارالىق كۇرەس فەدەراتسياسىنىڭ قۇرىلعانىن رەسمي جاريالاپ، سالماقتى ادامداردى باسشىلىققا سايلايمىز.

- ارمان تولەگەن ۇلى، ەرتەرەكتە قازاق كۇرەسىن وليمپيادا ويىندارىنا قوسۋ تۋرالى دا ۇسىنىس ايتىلعان ەدى...

- بۇل ۇسىنىستى مەن ەمەس، شەنەۋنىكتەر ايتقان بولاتىن. ارينە، قازاق كۇرەسى وليمپيادا ويىندارىنا قوسىلا قويسا، توبەم كوككە جەتەر ەدى، ءبىراق مەن قيالعا ەمەس، مۇمكىندىكتەرىمىزگە قاراپ ايتامىن: قازاق كۇرەسى وليمپيادا ويىندارىنا قوسىلۋ ءۇشىن ءبىر ۇرپاقتىڭ ەڭبەگى از بولادى، كەم دەگەندە 10-15 جىل ۋاقىت كەرەك. ەگەر قازاق كۇرەسى وليمپيادا ويىندارىنا 50-60 جىلدان كەيىن قوسىلىپ جاتسا دا، شۇكىر دەيىك. سەبەبى، حالىقارالىق مارتەبەسى بار، الەم بويىنشا كوپ تانىلعان ورىستاردىڭ سامبو ونەرى ءالى وليمپيادا ويىندارىنىڭ تىزىمىنە ەنگەن جوق. ءبىراق، مەنىڭ ارمانىم جارتىلاي ورىندالدى دەۋگە بولادى - قازاق كۇرەسى جاپونداردىڭ سۋمو ونەرى سياقتى كورەرمەندەر تاراپىنان زور قولداۋعا يە بولدى. وليمپيادا ويىندارىنىڭ قاتارىنا كىرمەي-اق قويسىن، ءبىراق قازاق كۇرەسىنىڭ مارتەبەسى مەن رەيتينگىسى ودان كەم ەمەس. ءتىپتى، وليمپيادادان گورى، حالىقتىڭ قولداۋى مەن سۇرانىسى ماڭىزدىراق شىعار، سەبەبى، قازاق كۇرەسى ۇلتتىق بولمىسىمىزدى اشىپ، جاپونداردىڭ دەلەبەسىن قوزدىراتىن سۋمو سياقتى، قازاق كۇرەسى دە ءبىزدىڭ باتىرلارىنىڭ رۋحىن وياتاتىن دارەجەگە جەتتى.

- قازىر قازاقستان بويىنشا قازاق كۇرەسىنە نازارى اۋىپ، جۇيەلى جاتتىعىپ جۇرگەن ادامداردىڭ سانى قانشا؟

- مادەنيەت جانە سپورت مينيسترلىگىنىڭ رەسمي اقپاراتىنا سۇيەنسەك، 120 مىڭ ادام قازاق كۇرەسىنە دەن قويعان ەكەن. كوبىسى، مەنىڭ ويىمشا، بالالار مەن جاسوسپىرىمدەر. قازىر رەسپۋبليكا بويىنشا قازاق كۇرەسى بويىنشا سەكسيالار اشىلىپ، جاتتىقتىرۋشىلاردىڭ سانى دا كۇرت كوبەيدى.

- ۋاقىتىڭىزدى ءبولىپ، سۇحبات بەرگەنىڭىز ءۇشىن راقمەت!

اۆتور: كەنجەكەي توقتامۇرات قىزى