ۇكىمەت باسشىسى: قالىڭدىق ۇزاتىلۋعا دايىن، ءبىراق الاتىن جىگىت جوق

استانا. قازاقپارات - بۇگىن ۇكىمەت وتىرىسىندا مەملەكەتتىك-جەكەمەنشىك ارىپتەستىك تۋرالى مينيسترلەر مەن اكىمدەردىڭ بايانداماسىن تىڭداعان ۇكىمەت باسشىسى باقىتجان ساعىنتايەۆ بۇل سالاعا قاتىستى ايتا كەلە:

«قالىڭدىق ۇزاتىلۋعا دايىن، ءبىراق الاتىن جىگىت جوقتىڭ» كەبىن كيىپ وتىرمىز، - دەدى.

«باياندامالاردان بىلگەنىمىز، بۇل باعىتتا بەلگىلى ءبىر جۇمىستار قولعا الىنعان ەكەن. مينيستر (ۇلتتىق ەكونوميكا ءمينيسترى قۋاندىق بيشىمبايەۆ - اگەنتتىك) بايانداعانداي، زاڭنامالىق بازا جاسالعان. ايماقتاردىڭ اكىمدەرى بايانداعانداي، ولارعا ليميت بەرىلەدى ەكەن. مەملەكەتتىك-جەكەمەنشىك ارىپتەستىك سالاسىندا شامامەن 300 دەي جوبا بار ەكەنىن دە بىلدىك. باياندامالارىڭىز، ارينە، جاقسى. دەگەنمەن، «قالىڭدىق ۇزاتىلۋعا دايىن، ءبىراق الاتىن جىگىت جوق» دەيدى عوي. تۋرا سونىڭ كەيپىن كيىپ وتىرمىز. وسى مەملەكەتتىك-جەكەمەنشىك ارىپتەستىك تۋرالى ۇنەمى ايتىپ ءجۇرمىز، زاڭنامانى دا ۇنەمى وزگەرتەمىز. ءبىراق، ءالى كۇنگە دەيىن تەك اۋىزبەن جوسپاردى عانا ايتىپ كەلەمىز»، - دەدى پرەمەر-مينيستر باقىتجان ساعىنتايەۆ.

ۇكىمەت باسشىسى اتاپ وتكەندەي، مەملەكەتتىك-جەكەمەنشىك ارىپتەستىك بالاباقشا سالۋعا پايداسىن تيگىزۋى كەرەك. «ەگەر جوسپار ورىندالسا، 2017-2019-جىلدار ارالىعىندا 1630 بالاباقشا سالادى ەكەنبىز. ەرلان كەنجەعالي ۇلى (ءبىلىم جانە عىلىم ءمينيسترى ەرلان ساعاديەۆ - اگەنتتىك)، ەگەر دە وسى ەكى جىل ىشىندە سالىناتىن 1630 بالاباقشانىڭ تىم بولماعاندا جارتىسىن مەملەكەتتىك-جەكەمەنشىك سەرىكتەستىك اياسىندا سالا الساق، ءجون بولار ەدى. ءبىراق، بۇل سالادا قارالماعان ءالى تالاي دۇنيە بار»، - دەي كەلە، ۇكىمەت باسشىسى ەڭ الدىمەن مەملەكەتتىك-جەكەمەنشىك ارىپتەستىك اياسىنداعى جوبالاردىڭ قارالۋ مەرزىمىن ازايتۋ كەرەكتىگىن ايتتى.