فۋتبول ماۋسىمىنىڭ كەزەكتى تارتىستارى

استانا. قازاقپارات - بۇگىنگى تاڭدا ەل ىشىندەگى بىرىنشىلىك اياقتالسا دا، فۋتبول ويىنىن ءسۇيىپ كورەتىندەر ءۇشىن الا دوپ دۋمانى كارى قۇرلىقتا (ەۋروپادا) قىزىپ جاتىر.

اتاپ ايتقاندا، قازاقستاندىق سپورت جانكۇيەرلەرى الەمدىك جۇلدىزدى كلۋبتاردىڭ دا ويىندارىن تەلەارنادان تىكەلەي كورۋ مۇمكىندىگىنە يە بولىپ وتىر.

اسىرەسە، «قازسپورت» تەلەارناسى ءاربىر سەنبى- جەكسەنبى كۇندەرى فۋتبولدان وتەتىن تارتىستى كەزدەسۋلەردى كورسەتىپ، كورەرمەندەرىن قۋانتىپ كەلەدى. دوپ تەپكەن شەبەرلەردىڭ ونەرىنە ءتانتى بولاتىنداردىڭ نازارى قىزىقتى ماتچتارعا اۋىسقان ەدى. شەتەلدىك ليگالاردىڭ ەڭ ماڭىزدى ماتچتارىنا شولۋ جاساساق.

ۇزدىكتەر گول سوقپادى وسى اپتادا FIFA 2016 -جىلدىڭ ۇزدىك فۋتبولشىسىنا ۇمىتكەرلەر اراسىنان ۇشەۋىن ىرىكتەپ شىعاردى. بۇل قاتارعا كريشتيانۋ رونالدۋ مەن لەونەل مەسسي ادەتتەگىدەي جايعاسسا، ءۇشىنشى بولىپ انتۋان گريزمانن ورىن تەپتى. الايدا، ۇشەۋى دە سەنبىلىك فۋتبول كەشتەرىندە گول سوعا المادى.

رونالدۋ مەن مەسسي ەل كلاسسيكودا كوزگە تۇسە الماسا، گريزمانن كومانداسىمەن بىرگە «ەسپانول» قاقپاسىنان ساڭىلاۋ تابا المادى. تاعى ءبىر جايت، مەسسي 2014 -جىلدىڭ ناۋرىزىندا «رەال مادريد» قاقپاسىنا حەت- تريك جاساعاننان بەرى ەل كلاسسيكو ماتچتارىندا گول سوعا الماي ءجۇر. ستاتيستيكاعا جۇگىنەر بولساق، رونالدۋ «كاتالوندىقتارعا» قارسى 25 رەت ويناپ 16 گول سوققان، ال لەونەل 32 ويىندا 21 رەت «رەال» قاقپاسىن ءدال كوزدەگەن.

الايدا، وسىنداي كەرەمەت كورسەتكىشتەر سەنبىلىك ماتچتا بايقالماعانداي. ءبىرىنشى تايمدا ەكى ۇجىم دا بەلسەندى وينادى. بارلىعى ءبىرىن- ءبىرى جۇلمالاۋمەن قاتار، تورەشى ىسقىرىعىن اڭدىپ ويناعانداي بولدى. ماتچ تورەشىسى ك. گومەس سىنعا ۇشىراۋدان ساقتانىپ، كەزدەسۋ بارىسىنا ايتارلىقتاي وزگەرىس ەنگىزەتىن ايىپ دوبىن بەلگىلەۋدەن اۋلاق بولدى. ەسەپتى 53- مينۋتتا لۋيس سۋارەس اشتى.

«رەال» شابۋىلىن كۇشەيتكىلەرى كەلگەنىمەن، كاتالوندىقتار دوپتى ءوز ىرقىنان جىبەرمەۋدەگى ۇلكەن شەبەرلىكتەرىن كامپ نوۋعا جينالعان 99 مىڭ كورەرمەنگە پاش ەتتى. نەيمار مەن مەسسيدىڭ دە ءبىر- ەكى تاماشا مۇمكىندىگى بولدى، پايدالانا الماي قالدى. «رەال» ويىنشىلارى جانە باپكەرى زينەدين زيدان «بارسەلونانىڭ» جەڭبەيتىنىن الدىن الا ءبىلىپ جۇرگەندەي. ويتكەنى كەي ساتتەردە تەك ويىنشىسىن الماستىرىپ، شىنىمەن دە ءجۇرىپ العانداي بولدى. كەزدەسۋدىڭ 90- مينۋتىندا كوتەرىلگەن دوپقا باسىن ءدال قويا بىلگەن سەرحيو راموس ەسەپتى تەڭەستىردى.

سونىمەن «بارسەلونا» ماڭىزدى ماتچتا جەڭىستى ۋىسىنان جىبەرىپ الدى. ءبىر قاراعاندا وسى گولدى ماسكەرانو، پيكە، البا اتتى قورعاۋشىلارى اسىعا كۇتكەن سىقىلدى. سەبەبى فۋتبولدىڭ سوڭعى ىسقىرىققا دەيىن وينالاتىنىن جاقسى بىلەتىن ولاردىڭ راموستى ۇستاۋعا الدەرى جەتپەك تۇگىلى، تىرىسقاندارى دا از سەكىلدى كورىندى. ناعىز كاپيتان سەرحيو راموس بولسا، كەزدەسۋدىڭ جۇلدىزىنا اينالدى. «رەالدى» سوڭعى مينۋتتاردا جەڭىلىستەن قۇتقارۋدى جاقسى «ادەتكە» اينالدىرعان يسپاندىق قورعاۋشىنىڭ ارقاسىندا مادريدتىك كلۋب وزدەرىنىڭ جەڭىلىسسىز سەرياسىن 33 ماتچقا دەيىن جەتكىزىپ وتىر.

فرانسيا قۇراماسى جانە «اتلەتيكو مادريدتىڭ» شابۋىلشىسى انتۋان گريزمانن دا كوزگە تۇسە المادى. الەمنىڭ ەكى ۇزدىك فۋتبولشىسى ءبىر- بىرىنە قارسى ويناپ، كەرەمەت ويىن كورسەتە الماعانىن انتۋان گريزمانن پايدالانۋ كەرەك ەدى. ءبىراق انتۋان دا «ەسپانولعا» قارسى ماتچتا گول سوعا المادى. ەكى ۇجىم كەزدەسۋلەرىن 0:0 ەسەبىمەن اياقتاۋعا ءماجبۇر بولدى.

كونتە باسقارعان «چەلسيدى» توقتاتۋ مۇمكىن ەمەس ءيا، ءدال سولاي. يتالياندىق باپكەردىڭ قولىن جان- جاققا سەرمەپ، فۋتبولشىلارىنا ورنىندا سەكىرىپ تۇرىپ ايعاي سالاتىنى موۋرينونىكىدەي «ناتيجەسىز قۇبىلىسقا» اينالىپ كەتپەسە كەرەك. ول اعىلشىن پرەمەر ليگاسىندا قاتارىنان سوڭعى 8 ويىندا جەڭىسكە جەتىپ، ابراموۆيچ كلۋبىن ليدەر قىلدى. اعىلشىن ليگاسىنىڭ 14- تۋرى اياسىنداعى باستى كەزدەسۋ «مانچەستەر سيتي» مەن «چەلسي» اراسىندا ءوتتى. چەمپيونات باسىنان بەرى وسى ليگانىڭ ەڭ مىقتى باپكەرى حوسەپ گۆارديولا بولىپ سانالعانداي ەدى، ەندى بارلىعى وزگەردى.

انتونيو كونتە - ەڭ مىقتى باپكەر. ول «چەلسي» قورعاۋشىسى گاري كەحيللدىڭ كومەگىمەن گۆارديولا قۇراعان «مانچەستەر ءسيتيدىڭ» ويناۋ تاكتيكاسىنا قارسى امالداردى كەزدەسۋ بارىسىندا ءساتتى جانە ۇتىمدى ەنگىزىپ وتىردى. «سيتي» ءبىرىنشى بولىپ ەسەپ اشتى. اۆتوگولدىڭ ورىن العانىنا قاراماستان، «چەلسي» ويىنشىلارى «مانچەستەر سيتي» قىسىمىنان شىعا ءبىلدى. قارىمتا شاۋبىلداردىڭ ارقاسىندا كلاۋديو براۆو قورعاعان قاقپاعا كوستا، ۆيليان جانە ازار جاۋاپسىز ءۇش گول سوقتى. ەسەپ 1-3.

گۆارديولاعا تەك اڭ- تاڭ بولىپ قالۋدان باسقا امال قالمادى. سوڭعى مينۋتتاردا اگۋەرو مەن فەرناندينو الاڭنان قۋىلىپ كەتتى. انتونيو كونتە ابراموۆيچتىڭ كلۋبىنا وتكەن جىلعى «لەستەر» جانە ءوزى باپكەرلىك جاساعان يتاليا قۇراماسىنىڭ تاكتيكالىق ۇلگىلەرىن سىڭىرە العانى بايقالادى. باستى ءتاسىل - قارسىلاس قىسىمىنان الىسقا اسىرىلعان پاستار ارقىلى شىعۋ، قارىمتا شابۋىلدى اياقتاۋ شەگىنە كوستا، ازار سياقتى مىقتىلاردى ورنالاستىرۋ جانە قورعاۋشىلار شەبىن تاسقامالعا اينالدىرۋ.

حوسەپ گۆارديولانى تىزە بۇكتىرگەن كونتە كومانداسى وتە مىقتى ۇجىمعا اينالىپ كەلەدى. جانە تاعى باسقا كەزدەسۋلەرگە توقتالىپ وتسەك، لوندوندىق دەربيدە «ۆەست حام» «ارسەنالدان» 1-5 ەسەبىمەن ويسىراي جەڭىلدى. «ليۆەرپۋل» سىرت الاڭدا 76 مينۋتقا دەيىن «بورنمۋتتى» 1-3 ەسەبىمەن ۇتىپ جاتقان ەدى، سودان كەيىن 4-3 بولىپ ەسە جىبەردى. يبراگيموۆيچ «ەۆەرتون» قاقپاسىنا كەرەمەت گول سوقتى، ءبىراق «مانچەستەر يۋنايتەد» سوڭعى ۋاقىتتاردا تەڭ تۇسۋدەن تالمايتىن بولدى.

وسىعان دەيىن «ارسەنال»، «ۆەست حاممەن»، ەندى مىنە «ەۆەرتونمەن» 1-1 بولىپ ويىندى اياقتادى. شاماسى بۇل 1-1 ەسەبى «مانچەستەر يۋنايتەدتىڭ» باس باپكەرى پورتۋگالدىق جوزە ءموۋرينونىڭ تۇسىنە ءجيى كىرەتىن بولار. «رب لەيپتسيگ» «لەستەر» جولىن قايتالاي الا ما؟ لەيپتسيگتا ورنالاسقان، 7 جىلدىق قانا تاريحى بار، وتكەن جىلى ەكىنشى بۋندەسليگادا 2- ورىن الىپ، باستى بۋندەسليگاعا اۋىسقان - «ر ب لەيپتسيگ» كلۋبى تۋرالى ايتار پىكىر كوپ ەمەس. ءبىراق ولار 13 تۋردان كەيىن ءبىرىنشى ورىندا كەلەدى.

اتاعى جەر جاراتىن «باۆاريا» ونىڭ ارتىنان قۋىپ جەتە الماۋدا. ويتكەنى بۇل سەنساتسيالىق كلۋب 13 كەزدەسۋدە جەڭىلىس دەگەندى كورمەگەن. كەرەمەت كورسەتكىش! ازۋلى دەگەن دورتمۋندىق «بورۋسسيانى»، «بايەردى» جەرگە قاراتقان «لەيپتسيگ» وسى دەمالىس كۇندەرى «شالكەدەن» 2-1 ەسەبىمەن باسىم ءتۇستى. ەگەر «رب لەيپتسيگ» كلۋبى وسى قارقىنىنان تايماسا، چەمپيوناتتى تاماشا ناتيجەمەن اياقتاي الادى. مۇمكىن وتكەن جىلى اعىلشىن پرەمەر ليگاسىندا كۇتپەگەن جەردەن توپ جارعان «لەستەر» سياقتى چەمپيون دا بولىپ قالار.

قازىرگى تاڭدا ولار بۋندەسليگادا ءبىرىنشى، «باۆاريا» بولسا 30 ۇپاي جيناپ، ءۇش ۇپايعا قالىپ كەلەدى. ال فرانتسيا بىرىنشىلىگىنە نازار سالساق، «مونپەلە» «پ س ج- نى» 3-0 قىلىپ، ويسىراتا جەڭدى. يتاليا چەمپيوناتىندا «يۋۆەنتۋس» سەنىمدى تۇردە الدا كەلەدى. ەكىنشى تۇرعان «روما» 4 ۇپايعا قالىپ كەلەدى.

ايتا كەتۋ كەرەك، الداعى سەنبى- جەكسەنبى كۇندەرى دە «قازسپورت» تەلەارناسى ەۋروپانىڭ ۇزدىك كلۋبتارىنىڭ تاماشا ويىندارىن كورەرمەندەر نازارىنا ۇسىنباقشى.

اۆتور: ايدىن بايمەن