استاناداعى ەڭ ءىرى مۇز قالاشىعى «حان شاتىر» ساۋدا ورتالىعى ماڭىنان اشىلادى

استانا. قازاقپارات - قىستىڭ كەلۋىمەن استانا تۇرعىندارى مەن قوناقتارىنا ارناپ كوپتەگەن قىزىقتى شارالار ازىرلەنۋدە.

قالىپتاسقان ءداستۇر بويىنشا استانانىڭ باقتارىندا جانە ەسىل جاعالاۋىندا مۇز ايدىندارى قۇيىلىپ، مۇز قالاشىقتارى سالىنادى. ەڭ ۇلكەن مۇز قالاشىعى «حان شاتىر» ساۋدا ويىن-ساۋىق ورتالىعىنىڭ ماڭىندا ورنالاساتىن بولادى، دەپ حابارلايدى استانا اكىمدىگىنىڭ باسپا ءسوز قىزمەتى.

ساۋدا ورتالىعىنىڭ قاسىنداعى الاڭدا مۇز مۇسىندەرىنە تولى قالاشىقتان باسقا، مۇز ايدىنى، سىرعاناۋ توبەشىكتەرى، كونكي مەن شانانى جالعا بەرۋ بەكەتتەرى، شاي ءىشىپ، جىلىناتىن ورىندار قاراستىرىلاتىن بولادى. ەلوردا اكىمدىگىنىڭ الدىنداعى مۇز ايدىنى دا اشىق اسپان استىنداعى قىسقى قىزىق تۇرلەرىن ۇناتاتىنداردىڭ كوڭىلىنەن شىعاتىنى انىق.

سونداي-اق، بيىل ەسىل جاعالاۋىنداعى ءداستۇرلى مۇز ايدىنىنان بولەك، ساعات تۇرىندە بەزەندىرىلگەن «كۇن» سۋبۇرقاعىنىڭ قاسىندا دا كونكي تەبۋگە مۇمكىندىك بار. سونىمەن قاتار، اقبۇلاق بۇلاعىندا، «جەرۇيىق» جانە پرەزيدەنت باقتارىندا دا مۇز ايدىندارىن قۇيۋ جوسپارلانعان. «اراي» باعىندا بىلتىرعىمەن سالىستىرعاندا ۇلكەندەۋ سىرعاناۋ توبەشىكتەرى جاسالادى. قالاداعى ەڭ ادەمى مۇز ايدىندارىنىڭ ءبىرى وسىندا ورنالاسادى. باقتىڭ جارىقتاندىرىلۋى ادەمى جانە جاستاردىڭ قىدىرۋىنا لايىقتى. بارلىق مۇز ايدىندارىندا كونكيدى جالعا بەرۋ بەكەتتەرى، تاماقتانۋ ورىندارى قاراستىرىلادى، ءبارى ادەمى فورماتتا جاسالادى. باقتاردا كونكي تەپكەن ىڭعايلى سياقتى، ويتكەنى ول جەردەگى اعاشتار جەلدەن قورعايدى، بالالارمەن كونكي تەبۋگە جاقسى»، - دەيدى استانا قالاسى كوممۋنالدىق مەنشىك قورى ديرەكتورىنىڭ ورىنباسارى عاني حاسەنوۆ. ونىڭ ايتۋىنشا، بارلىق جۇمىستار 20 -جەلتوقسانعا دەيىن اياقتالادى.