نازاربايەۆ تەك وتاندىق قول ساعاتتى تاعاتىن بولدى

استانا. قازاقپارات - تاۋەلسىزدىك قۇرداسى ارمان توسقانبايەۆ «وتان» برەندىمەن جاساعان ساعاتىن ەلباسى نۇرسۇلتان نازاربايەۆقا سىيعا تارتتى، دەپ حابارلايدى قازاقپارات.

«مەن - جاس كاسىپكەرمىن. قازىر 25 جاستامىن جانە 4 كومپانيام بار. ونىڭ بىرەۋىنىڭ ءوزى جىلىنا 168 ميلليون تەڭگە تابىس تابادى، 33 جۇمىس ورنىن قامتاماسىز ەتىپ وتىر. «وتان» برەندىمەن ساعات جاسايتىن كاسىپورنىم «قازاقستاندا جاسالعان» جوباسىن ىسكە اسىرۋعا ۇلەس قوسۋدا. ءسىزدىڭ تاپسىرماڭىزبەن جۇزەگە اسىرىلىپ جاتقان «بيزنەستىڭ جول كارتاسى-2020» باعدارلاماسىنىڭ ارقاسىندا ءبىزدىڭ كاسىپورىن زور سەرپىن الدى. سول سەبەپتى سىزگە زور العىس ايتا وتىرىپ، سىزگە ارناپ جاساعان قول ساعاتتى سىيعا تارتپاقپىز»، - دەدى جاس كاسىپكەر تاۋەلسىزدىك سارايىندا رەسپۋبليكالىق جاستار فورۋمىندا.

فورۋم بارىسىندا ا. توسقانبايەۆ پرەزيدەنتتىڭ قولىنا ساعاتتى ءوزى تاعىپ بەردى. «ەندى تەك ءوزىمىزدىڭ وتاندىق ساعاتتاردى عانا تاعامىز، شۆەيتساريالىقتى تاقپايمىز»، - دەدى ن. نازاربايەۆ.

ەستەرىڭىزگە سالا كەتەيىك، بيىل قىركۇيەك ايىندا تاۋەلسىزدىك قۇرداسى ارمان توسقانبايەۆپەن «قازاقپارات» ءتىلشىسىنىڭ سۇحباتى جاريالانعان ەدى.