اتاۋى: پەنەلوپا مەن ونىڭ تابىنۋشىلارى
اۆتور: دجون ۋيليام ۋوتەرحاۋس
سالىنعان ۋاقىتى: 1912
ستيل: رومانتيزم
مايلى بوياۋ
دجون ۋيليام ۋوتەرحاۋس - اعىلشىن قىلقالام شەبەرى. پرەرافاەليتتىك سۋرەتشىلەر تولقىنىنا جاتاتىن ۋوتەرحاۋس ايەل بەينەلەرىن اسەرلى جەتكىزە بىلۋىمەن اسا تانىمال. ونىڭ كوپتەگەن كارتينالارىنداعى كەيىپكەرلەر اڭىزدار مەن ادەبي شىعارمالاردان الىنعان. ۋوتەرحاۋستىق ايەلدەر بەينەسى - ءارقاشان نازىك، مۇڭدى جانە ءوزىنىڭ ىشكى جان كۇيزەلىسىمەن ىشتەي ارپالىسقان تۇڭعيىق كەيىپكەر.
ءبىز اڭگىمەلەگەلى وتىرعان «پەنەلوپا مەن ونىڭ تابىنۋشىلارى» اتتى سۋرەت تە ادەبي تۋىندىنىڭ ۇشقىنى. بالا كەزىمىزدەن ءسۇيىپ وقىعان كونە گرەك اڭىزدارىنداعى وقيعالاردىڭ ءبىرى وسى سۋرەتتە كورىنىس تاپقان.
گومەردىڭ «وديسسەيا» اتتى ەكىنشى پوەماسىنىڭ تاقىرىبى - ترويا سوعىسىنان قايتىپ كەلە جاتقان يتاكا ارالىنىڭ پاتشاسى وديسسەيدىڭ باسىنان كەشكەن شىتىرمان وقيعالارى. «وديسسەيانىڭ» نەگىزگى سيۋجەتى - «كۇيەۋدىڭ ورالۋى» . وديسسەي ءوز ۇيىنە 10 جىل بويى ساپار شەگىپ، جولدا كوپتەگەن قاۋىپ- قاتەردى جەڭەدى. ۋوتەرحاۋس تۋىندىسىنىڭ نەگىزگى كەيىپكەرى پەنەلوپا وديسسەيدىڭ جولىندا ونى كۇتۋمەن بولادى. حاس سۇلۋعا قانشاما باتىرلار قۇدا تۇسسە دە، ول كىلەمىن توقىپ بىتىرمەي ەشكىممەن كوڭىل قوسپايتىنىن ايتادى. وزگەگە ءومىرىن ارناماي، جارىنىڭ ساپاردان ورالارىنا سەنگەن ارۋ كۇندىز توقىعان كىلەمىن كەشكە تارقاتىپ تاستاپ وتىرادى. وسىلايشا، كىلەم توقۋ 3 جىلعا سوزىلادى. كەيىن ونىڭ بۇل ارەكەتىن ءبىلىپ قويعان جۇرتشىلىق پەنەلوپادان وزىنە جۇرەگىن ۇسىنعان جىگىتتەردىڭ بىرەۋىن تاڭداۋدى تالاپ ەتەدى. ايەلى وديسسەيدىڭ ەسكى ساداعىن اتۋدان سايىس ۇيىمداستىرىپ جاتقاندا ول قايىرشى كەيپىندە قالاعا كەلەدى. افينانىڭ ىقپالىمەن پەنەلوپا جەڭىمپازعا كۇيەۋگە شىعۋعا ۋادە بەرەدى. وديسسەي سايىسقا قاتىسىپ، جەڭىمپاز اتانادى. سودان سوڭ افينانىڭ كومەگىمەن بارلىق كۇيەۋسىماقتاردىڭ سازايىن بەرەدى.
ازاماتىنا ادالدىعىن ساقتاپ قالعان ارۋدىڭ اتى گومەردىڭ جىرلاۋىنان بولەك، ۋوترەحاۋس تۋىندىسى ارقىلى تاريح بەتىندە ماڭگىگە ساقتالدى.
massaget.kz