ن. ءا. نازاربايەۆ قاريالار مەن اتا-انانى قاستەرلەۋگە شاقىردى
ەلباسى جاستارعا اقىل-كەڭەستەرىن بەرە كەلە، اتا-اناعا قۇرمەت جايىندا ايتتى. «ءبىز ۇلكەندەردى سىيلاپ وسكەن قازاقپىز. قاريالاردى قازىنامىز دەپ بىلگەن، انانى سۇيگەن، قۇرمەتتەگەن ادامبىز. انانىڭ اق سۇتىنەن ارتىق ەش نارسە جوق. مەنىڭ بارمايتىن جەرىم جوق قوي، بارلىعىن ارالاپ جۇرەمىن. بۇرىن مەنىڭ جاستاۋ كەزىمدە قارتتار ۇيىندە قازاقتىڭ قاريالارى بولماۋشى ەدى. قازىر بارساڭ، قازاقتىڭ دا قاريالارى دا سول جەردە. جاندارىنا وتىرىپ: «بالالارىڭىز بار ما؟»، دەپ اڭگىمەلەسىپ، سۇراعانىمدا: « قايتەسىڭ سونى، سۇراماي-اق قوي!»، - دەيدى.
بارلىعى تۇسىنىكتى بولادى. ارينە، سول كەزدە ءىشىڭ اشيدى. اكە مەن اناعا جاساعان جاقسىلىق تا، جاماندىق تا ءوز بالالارىڭنىڭ الدىنان شىعادى. ءار ۋاقىتتا ويلانىڭدار. ولارعا ءبىر نارسەنى ءبولىپ بەرۋدىڭ كەرەگى جوق. جالاقىلارىڭنىڭ جارتىسىن اپارىپ بەرۋدىڭ دە قاجەتى جوق. بەس مينۋت جانىندا وتىرىپ، «پاپا، ماما» دەسەڭ - سول كەرەك. ولارعا باسقاسى كەرەك ەمەس. سەندەرگە ءبىر ايتارىم وسى ەدى»، - دەدى پرەزيدەنت.
سونداي-اق مەملەكەت باسشىسى باقىت تۋرالى ءسوز قوزعاپ، قازاقستاندىقتارعا باتاسىن بەردى. نۇرسۇلتان نازاربايەۆ جاقىندا گارۆارد ۋنيۆەرسيتەتى «باقىت دەگەن نە؟» دەگەن سۇراققا ساۋالناما وتكىزگەنىن، مىڭ ادامنان جاۋاپ العاننان كەيىن، باقىت ءتورت نارسەدەن تۇراتىندىعى انىقتالعانىن ايتتى.
«ەڭ ءبىرىنشى باقىت - ول باۋىرىڭا باساتىن بالاڭ. ايەلدىڭ شاشى جىبەكتەي بولاتىنى، ونىڭ شاشىنان كۇنىنە ءبىر رەت سيپاپ وتسەڭ - سولاي بولادى. ەكىنشىدەن، بويىڭ سۇڭعاق ءارى ادەمى بولۋىڭنىڭ سەبەبى - تاماعىڭنىڭ جارتىسىن اشقا بەرسەڭ. سونداي-اق، بالاڭدى جاقسى كورۋ، ۇيىڭدەگى جۇبايىڭمەنەن ءتۇسىنىسىپ ءومىر ءسۇرۋ، جولداستارىڭمەن قاتىناسىڭ، كوڭىلىڭدى كوتەرۋ دەگەن سياقتى قاراپايىم نارسەلەر ادامنىڭ باقىتىنا اكەلەدى. ونى وزدەرىڭ بىلەسىڭدەر. سوندىقتان، باقتارىڭ باستارىڭنان تايماسىن»، - دەپ تىلەدى قازاقستان پرەزيدەنتى.