ساعىنتايەۆ ەكسترەميزم مەن تەرروريزمگە قارسى ءىس-قيمىل جونىندە كەڭەس وتكىزدى

استانا. قازاقپارات - ۇكىمەت ۇيىندە قازاقستان رەسپۋبليكاسى پرەمەر- ءمينيسترى باقىتجان ساعىنتايەۆ ەكسترەميزم مەن تەرروريزمگە قارسى ءىس-قيمىل ماسەلەلەرى بويىنشا كەڭەس وتكىزدى.

وتىرىس بارىسىندا ق ر پارلامەنتى دەپۋتاتتارىنىڭ، پرەزيدەنت اكىمشىلىگىنىڭ قاۋىپسىزدىك كەڭەسى، ۇلتتىق قاۋىپسىزدىك كوميتەتى باسشىلارىنىڭ جانە ءتيىستى مەملەكەتتىك ورگاندار وكىلدەرىنىڭ قاتىسۋىمەن قازاقستان رەسپۋبليكاسىندا ءدىني ەكسترەميزم مەن تەرروريزمگە قارسى ءىس- قيمىل جونىندەگى 2017-2020 -جىلدارعا ارنالعان مەملەكەتتىك باعدارلاماسى (ءارى قاراي - مەملەكەتتىك باعدارلاما) جوباسىنىڭ تۇجىرىمداماسى تانىستىرىلدى.

مەملەكەتتىك باعدارلامانىڭ تۇجىرىمداماسى مەملەكەت باسشىسىنىڭ 2016 -جىلعى 9 -قىركۇيەكتە قازاقستان رەسپۋبليكاسىنىڭ قاۋىپسىزدىك كەڭەسىنىڭ وتىرىسىندا بەرگەن تاپسىرماسىن ورىنداۋ ماقساتىندا ازىرلەنگەن جانە جاڭا قاۋىپتەر مەن تاۋەكەلدەردى ەسەپكە العاندا، ءدىني ەكسترەميزم مەن تەرروريزم قاۋپىنەن جەكە تۇلعا، قوعام جانە مەملەكەت مۇددەلەرىن سەنىمدى قورعاۋمەن قامتاماسىز ەتۋگە باعىتتالعان.