تەڭگەنىڭ نىعايۋى جەكەلەر تۇرعىن ءۇي باعاسىمەن بايلانىستى - ساراپشىلار

استانا. قازاقپارات - تەڭگە باعامىنىڭ نىعايۋى ەكىنشى دەڭگەيلى تۇرعىن ءۇي باعاسىنىڭ تومەندەۋىنە ىقپال ەتەدى.

بۇل تۋرالى «سمارت- ريەلتەر» ەليتالى تۇرعىن ءۇي اگەنتتىگىنىڭ ديرەكتورى يننا فرولوۆا ورتالىق كوممۋنيكاتسيالار قىزمەتىنىڭ بريفينگىندە حابارلادى. «قازاقستانداعى پاتەرلەر باعاسى - ەكونوميكامىزدىڭ دەڭگەيىن كورسەتەتىن باستى كورسەتكىشتەردىڭ ءبىرى.

داعدارىس پەن دوللار باعامىنىڭ تومەندەۋىنە قاراماستان، تۇرعىن ءۇي باعاسى بۇرىنعىشا، قولجەتىمسىز بولىپ قالا بەرمەك. پاتەر ساتىپ الۋ ءۇشىن كوپ ۋاقىت بويى اقشا جيناۋ كەرەك نەمەسە يپوتەكا ارقىلى الۋعا بولادى. سوندىقتان پاتەردى ءتيىمدى باعامەن ساتىپ الۋ جانە وعان ارتىق قارجى جۇمساماۋ ءۇشىن باعانىڭ قۇبىلۋىن باقىلاپ وتىرعان ءجون.

قازان ايىندا ۆاليۋتا باعامى نىعايىپ، ەكىنشى دەڭگەيلى تۇرعىن ءۇي (مەملەكەتتىك باعدارلامارعا قاتىسى جوق، جەكەلەردىڭ ءۇيى - رەد.) نارىعىنداعى باعا ءبىرشاما تومەندەدى. استانادا تەڭگەمەن بەلگىلەنگەن باعا ءبىر جارىم، ەكى پايىزعا ارزانداپ، الماتىدا ول ەكى جارىم ەسەگە، وڭىرلەردە ءبىر جارىم ەسەگە جەتتى»، - دەدى يننا فرولوۆا.

ونىڭ سوزىنشە، ەكىنشى دەڭگەيلى تۇرعىن ءۇي نارىعىنداعى ۇسىنىستار سۇرانىستان 2-3 ەسەگە كوپ. الايدا، ءبىرىنشى دەڭگەيدەگى تۇرعىن ءۇي نارىعى ەكىنشى دەڭگەيدەگى نارىققا قىسىم كورسەتىپ، باعانى تومەندەتۋگە يتەرمەلەۋدە. باعانىڭ تومەندەۋى ساۋداگەرلەردى جالعا بەرۋ نارىعىنا تارتا تۇسۋدە. تۇرعىن ءۇيدى جالعا الۋ اياسىنداعى ۇسىنىستاردىڭ ارتۋى پاتەرلەردىڭ ءپىشىنى مەن ورنالاسقان جەرىنە بايلانىستى وزگەرىپ وتىراتىن ستاۆكالاردىڭ تومەندەۋىنە ىقپال ەتتى.