ساعىنتايەۆ جەڭىل اقشانى كوزدەيتىن شەتەلدىك كومپانيالارعا ەسكەرتۋ جاسادى

استانا. قازاقپارات - ۇكىمەتتىڭ بۇگىنگى وتىرىسىندا پرەمەر- مينيستر باقىتجان ساعىنتايەۆ اۋىل شارۋاشىلىعى سالاسىنداعى كومپانيالارعا ەسكەرتۋ جاساپ، سىرتتان تەحنيكا اكەلۋگە تىيىم سالىنباسا دا، وتاندىق ءوندىرىستى دامىتۋعا باسىمدىق بەرىلەتىنىن جەكىزدى، دەپ حابارلايدى قازاقپارات ءتىلشىسى.

«ءبىز اۋىل شارۋاشىلىعى سالاسىنداعى شەتەلدىك تەحنيكانىڭ قايسىسى جاقسى ەكەنىن كوپتەن بەرى تالقىلاپ كەلەمىز. «John Deer» ما، «Claas» پا، ءبىراق، ءوزىڭىز كورىپ وتىرسىزدار، 20 جىل بويى كەلىسسوزدەردى جۇرگىزىپ جاتىرمىز. الايدا، بىرەۋى دە قازاقستانعا كەلىپ، ءوز ءوندىرىسىن اشپايدى. «ءيا، سەندەرگە زاۋىت سالىپ بەرەمىز، تەحنيكانى قۇراستىرامىز، شىعارامىز!» دەپ جالاۋلاتادى. ءبىراق ءالى كۇنگە دەيىن ناقتى ناتيجە جوق. ءبىز بارلىق جاعدايلاردى جاساپ بەردىك. دەگەنمەن، «John Deer» دا، «Claas» تا كەلمەي وتىر. سەبەبى ولارعا وسى جەردە ءوندىرىس اشقانشا، دايىن ءونىمدى ساتىپ، اقشانى الا سالعان ءتيىمدى. جەڭىل پايدانى كوزدەيدى»، - دەدى ب. ساعىنتايەۆ.

ۇكىمەت باسشىسىنىڭ ايتۋىنشا، ەندىگى كەزەكتە سىرتتان تەحنيكا اكەلۋگە تىيىم سالىنباسا دا، اۋىل شارۋاشىلىعى سالاسىنداعى وتاندىق ءوندىرىستى دامىتۋعا كۇش سالىنادى. «بۇگىندە ءبىز ماشينا جاساۋ ونەركاسىبىن قولعا الدىق. تراكتورلار مەن كومباينداردى قۇراستىرا باستادىق. ەندى، ونى ارى قاراي دامىتۋ قاجەت قوي. ءبىز وسى سالانى قولداۋعا دايىنبىز»، - دەپ اتاپ كورسەتتى پرەمەر- مينيستر.

ايتا كەتەيىك، بۇگىنگى وتىرىستا ۇكىمەت باسشىسىنىڭ ورىنباسارى-اۋىل شارۋاشىلىعى ءمينيسترى اسقار مىرزاحمەتوۆ اگرو ونەركاسىپ كەشەنىن دامىتۋدىڭ 2017-2021-جىلدارعا ارنالعان باعدارلاماسىن تانىستىردى.

ونىڭ ايتۋىنشا، جاڭا باعدارلاما اياسىندا اۋىل حالقى ميللياردتاپ تابىس تاباتىن بولادى. سونداي-اق قازاقپارات تىلشىسىنە سۇحبات بەرگەن ا. مىرزاحمەتوۆ، «قازاقستانعا يمپورتتالاتىن ەت تەكسەرىلمەيدى» دەگەن ەسەپ كوميتەتىنىڭ قورىتىندىسىنا جاۋاپ بەردى.

ال دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا كاسىپكەرلىكتى جاپپاي دامىتۋدىڭ جاڭا باعدارلاماسى تۋرالى ايتىپ بەردى.

اۆتور: ارمان اسقاروۆ