رەسەيگە سانكسيا سالعانى دۇرىس بولدى - نازاربايەۆ
«بىزدە ءبارى بار. مۇناي دا، ءتۇستى مەتالدار دا. ەندى، وسىنىڭ بارلىعىن وڭدەۋگە تىرىسۋ قاجەت. يندۋسترياليزاتسيانىڭ باستى ماقساتى دا وسى. مۇناي ارزانداسا، ونى وڭدەپ، دايىن ءونىم رەتىندە ساتۋ قاجەت. گاز دا سولاي. نەگىزى، مۇناي حيمياسىنان پلاستماسقا دەيىن ءونىمنىڭ ءتۇر- ءتۇرىن جاساۋعا بولادى. قۇرىلىس ماتەريالدارى جانە تاعىسىن تاعى. وعان قوسا، الليۋمينيي، مىس سياقتى مەتالدار بار. ال شيكىزاتتى وڭدەپ، دايىن ءونىم رەتىندە ساتسا، ودان دا كوپ پايدا تابۋعا بولادى»، - دەدى ن. نازاربايەۆ.
وسى ورايدا پرەزيدەنت قازاقستان مەن رەسەيدىڭ اگرارلىق كەشەن جاعىنان ۇقساس ەكەنىن ەسكە سالدى. الايدا وسى سالاداعى شيكىزات تا دۇرىس وڭدەلمەيدى. «قازاقستاندا دا، رەسەيدە دە ۇلكەن اگرارلىق كەشەن بار. الايدا ءبىز بيدايدى دا، ەتتى دە، ءسۇتتى دە، كوكونىستى دە اياعىنا دەيىن وڭدەمەيمىز. ەۋروپادان دايىن كونسەرۆىلەردى ساتىپ الا سالامىز. ونى ءوزىمىز نەگە ىستەمەيمىز؟.. ال ەندى وسىنىڭ ءبارىن وڭدەپ الۋ ءۇشىن ماشينا جاساۋ ونەركاسىبىن بارىنشا دامىتۋ قاجەت. ول ءوندىرىس زامانعا ساي بولۋى شارت. ماسەلەن، مۇنايدى وڭدەۋ ءۇشىن زاماناۋي مۇناي وڭدەۋ زاۋىتى قاجەت. ول قۇرال- جابدىقتار وتە قىمبات. مىنە، وسىنى قولعا العان ءجون. سوسىن نانوتەحنولوگيالار، بالامالى ەنەرگەتيكا، بيوحيميا سياقتى عىلىمي- تەحنولوگيالىق جۇمىستاردى دا ۇمىتپاۋ قاجەت. ءبىر جاعىنان رەسەيگە سانكتسيا سالعان دۇرىس بولدى. قازىر وعان جاقسى ءبىر سەرپىلىس كەرەك. بىلەكتى سىبانىپ، جۇمىسقا كىرىسسە، ءبىر جەردەن جارىپ شىعادى»، - دەپ اتاپ كورسەتتى مەملەكەت باسشىسى.
اۆتور: ارمان اسقاروۆ