قازاقستان شەتەلدىك كومباينداردى ساتىپ الۋدى شەكتەمەك

استانا. قازاقپارات - قارجى ۇنەمدەۋ ماقساتىندا قازاقستان شەتەلدىك كومباينداردى ساتىپ الۋدى شەكتەيدى.

بۇل تۋرالى پارلامەنت ماجىلىسىندەگى ۇكىمەت ساعاتىندا پرەمەر-ءمينيستردىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ ءمالىم ەتتى، دەپ حابارلايدى قازاقپارات.

«وتكەن جىلى كومباينداردى ساتىپ الۋعا 3,6 ميلليارد تەڭگە جۇمسادىق. ونىڭ قىرىق پايىزى الىس شەتەلگە، ال 60 پايىزى ت م د ەلدەرىنە تيەسىلى. اتالعان 40 پايىزىنا قارجىنىڭ 70 پايىزى جۇمسالدى. وسى رەتتە ءتيىستى ەسەپتەۋلەردى جاسادىق، نەگىزىنەن ت م د- دا وندىرىلەتىن، ياعني بۇل تۇرعىدا رەسەي مەن بەلارۋس تەحنيكاسىن ساتىپ الۋ ەسكەرىلدى. سونىمەن قاتار ءوزىنىڭ تەحنيكالىق سيپاتتاماسى بويىنشا ولار الىس شەتەل تەحنيكاسىنان قالىس قالمايدى. ناتيجەسىندە، ءدال سول قارجىعا كومباين پاركىن ءۇش ەسەگە ارتتىرۋعا بولادى»، - دەدى مىرزاحمەتوۆ.

ونىڭ سوزىنە قاراعاندا، ليزينگتىك باعدارلاما اياسىندا «قازاگروقارجى» جەلىسى بويىنشا اۋىل شارۋاشىلىعى تەحنيكاسىن ساتىپ الۋعا جۇمسالاتىن اقشا كومبايندار مەن تەحنيكانى وندىرەتىن وتاندىق زاۋىتتى قۇرۋعا بايلانىپ وتىرعان كورىنەدى. اتاپ ايتقاندا، بۇگىن قاراستىرىلعان ا و ك- نى دامىتۋدىڭ 2017-2021 -جىلدارعا ارنالعان مەملەكەتتىك جاڭا باعدارلاماسى اياسىندا وتاندىق اۋىل شارۋاشىلىعى تەحنيكاسىن جاسايتىن وندىرىستەرگە قولداۋ جاساۋ قامتىلىپ وتىر. وسى ورايدا ا. مىرزاحمەتوۆ بۇگىندە زاۋىتتار بار ەكەنىن، الايدا ولار نەگىزىنەن دايىن تەتىكتەردى قۇراستىرۋمەن اينالىساتىنىن اتاپ ءوتتى.

«ەندى باعدارلاما اياسىندا لوكاليزاتسيانى ارتتىرىپ، وتاندىق اۋىل شارۋاشىلىعى ماشينا جاساۋ سالاسىن قولداۋعا دايار ەكەنىمىزدى مالىمدەپ وتىرمىز»، - دەدى مىرزاحمەتوۆ.