بۇگىن - ءانۇراننىڭ اۆتورى، اقىن جۇمەكەن ناجىمەدەنوۆ تۋعان كۇن

استانا. قازاقپارات - بۇگىن - اقىن جۇمەكەن ناجىمەدەنوۆ تۋعان كۇن.

81 جىل بۇرىن (1935-1983) قازاقستان رەسپۋبليكاسى مەملەكەتتىك ءانۇرانىنىڭ (ءماتىنى) اۆتورى، كورنەكتى اقىن، اۋدارماشى، قازاقستان جاستار وداعى سىيلىعىنىڭ يەگەرى جۇمەكەن سابىر ۇلى ناجىمەدەنوۆ دۇنيەگە كەلدى.

جۇمەكەن اتىراۋ وبلىسى قۇرمانعازى اۋدانىندا تۋعان. قۇرمانعازى اتىنداعى الماتى كونسەرۆاتورياسىنىڭ ۇلت اسپاپتارى فاكۋلتەتىن، م. گوركي اتىنداعى ادەبيەت ينستيتۋتى جانىنداعى جوعارى كۋرستى بىتىرگەن. 1959-1965-جىلدارى - «جازۋشى» باسپاسىنىڭ كىشى رەداكتورى، 1965-1966-جىلدارى - رەسپۋبليكالىق «لەنينشىل جاس» گازەتىندە ادەبيەت جانە ونەر ءبولىمىنىڭ مەڭگەرۋشىسى.

1966-1971-جىلدارى - قازاقستان جازۋشىلار وداعىندا ادەبي كەڭەسشى. 1974-1978-جىلدارى - قازاق ك س ر باسپا، پوليگرافيا جانە كىتاپ ساۋداسى ىستەرى جونىندەگى مەملەكەتتىك كوميتەتىنىڭ رەداكتورى، 1978-1983-جىلدارى «مەكتەپ» باسپاسىندا رەداكسيا مەڭگەرۋشىسى قىزمەتتەرىن اتقارعان.

تۇڭعىش كىتابى «بالاۋسا» دەگەن اتپەن 1961-جىلى جارىق كوردى. الپىسىنشى جىلداردان باستاپ ولەڭدەرى مەن شىعارمالارى، ءۇش رومانى، اۋدارما كىتاپتارى «جازۋشى»، «جالىن» باسپالارىنان جارىق كورگەن.

«بالاۋسا»، «سىبىزعى سىرى»، «جوق، ۇمىتۋعا بولمايدى»، «كۇي كىتابى»، «مەزگىل اۋەندەرى»، « ۇلىم، ساعان ايتام»، «قىزعالداق جايلى باللادا»، «تەمىرقازىق»، «مەنىڭ توپىراعىم» كىتاپتارى، ءۇش تومدىق شىعارمالار جيناعى، «مەن - تامىرمىن» داستاندارى، «قاسىرەت پەن قايسارلىق»، «جۇمەكەن»، «جاڭعىرىق»، «جارىق پەن جىلۋ»، «ۆەسەننيە ۆەترى»، «مەن تۋعان كۇن»، «جەتى بوياۋ»، «شۋاق»، «اشىق اسپان»، «قىران قيا»، «تەبە گوۆوريۋ، پوتوموك» تولعاۋ، پوەمالارى مەن جىرلارى، «اق شاعىل»، «كىشكەنتاي»، «داڭق پەن داقپىرت» اتتى روماندارىنىڭ اۆتورى.

1967-جىلى «جوق، ۇمىتۋعا بولمايدى!» اتتى پوەماسى ءۇشىن قازاقستان لەنين كومسومولى سىيلىعىنىڭ لاۋرەاتى اتاندى. اقىن جىرلارى بىرنەشە شەت ەل تىلدەرىنە اۋدارىلعان. جۇمەكەن ناجىمەدەنوۆ ءماتىنىن جازعان «مەنىڭ قازاقستانىم» 2005-جىلى ءانۇران بولىپ بەكىتىلدى. اقىننىڭ ەسىمى ءوزىنىڭ تۋعان جەرى اتىراۋ وبلىسى قۇرمانعازى اۋدانىنداعى اۋىلعا بەرىلگەن.