ەستەرىڭىزگە سالا كەتسەك، وسى جىلدىڭ 10 - قاراشاسىندا استانا قالالىق ءماسليحاتىنىڭ دەپۋتاتتارى ورىنبوردى ماڭگىلىك ەل، ال ە10 كوشەسىن ورىنبور دەپ وزگەرتۋ تۋرالى باستامانى قولداعان بولاتىن.
اۋەل باستا، «ەلوردا كوشەلەرىنىڭ اتى وزگەرەدى» دەگەندە، قالا اكىمدىگى حالىققا قىزمەت كورسەتۋ ورتالىقتارى زاڭدى جانە جەكە تۇلعالار ءۇشىن ءۇي قۇجاتتارىن اۋىستىراتىندىعىن، ءۇيدىڭ تەحنيكالىق ءتولقۇجاتىنا وزگەرىس ەنگىزۋ تەگىن بولاتىندىعىن تۇسىندىرگەن ەدى. الايدا، ەلەكتروندى ۇكىمەتتىڭ كونسۋلتانتتارى ءبىزدىڭ قوڭىراۋعا جاۋاپ بەرە وتىرىپ، قۇجاتتاردى اۋىستىرۋ 530 تەڭگە تۇراتىنىن حابارلاعان بولاتىن.
جالپى، قالانىڭ «الماتى» اۋداندارىندا حۋسەين بەن تالال، كەنەن ازىربايەۆ، تەمىربەك جۇرگەنوۆ اتىنداعى كوشەلەر پايدا بولادى. بۇعان دەيىن حۋسەين بەن تالالدىڭ اتىن يەمدەنگەن كوشە ۇلى دالا داڭعىلى اتالادى. مۇنان بولەك، بۇعان دەيىن يۆان پانفيلوۆ اتىنداعى كوشەگە ساكەن ءجۇنىسوۆتىڭ ەسىمى بەرىلسە، بەيبىت مايلين اتىنداعى كوشە مەن جوبالىق اتاۋى ا193 كوشەسى قوسىلادى. ال بۇعان دەيىن ەڭبەكشىلدەر دەپ اتالىپ كەلگەن كوشە 36- كوشەمەن بىرىگىپ، ءاليحان بوكەيحانوۆتىڭ ەسىمىمەن اتالاتىن بولادى.
ايتا كەتەرلىگى، «سارى ارقا» اۋدانىنداعى بوكەيحانوۆ كوشەسى ەندىگى ۋاقىتتا ازەربايجان مامبەتوۆ كوشەسى دە اتالادى. «ەسىل» اۋدانىندا جاڭا 10 كوشە اتاۋى پايدا بولادى. سونداي- اق بۇل اۋداندا ءبىرقاتار كوشەگە نياز بي، نۇرپەيىس بايعانين، سۇلتانبەك قوجانوۆ، قايىم مۇحامەدجانوۆ، نيكولا تەسلا، رابيعا ەسىمجانوۆا، ءساتتار ەرۋبايەۆ، حانشايىم سۇيىنبيكە جانە بۇقار جىراۋ اتتارى بەرىلەدى.
اۆتور: مارلان جيەمباي