ليتۆادا وقىپ جۇرگەن قازاق قىزى

استانا. قازاقپارات - ءار پەندەنىڭ باسىندا ءارتۇرلى ارمان ءبار.

بىرەۋدىڭ باي بولعىسى، ءتورت تۇلىگى ساي بولعىسى كەلەدى. ال بىرەۋلەر عىلىم- ءبىلىم قۋىپ ادامزاتقا،  قوعامعا ۇلەس قوسقىسى كەلەدى.

ءدال وسىنداي ىزگى ارمانى مەن مۇراتى ءوزىن شەتەل اسىپ وقۋعا جەتەلەگەن قاراپايىم قازاق قىزىنا ليتۆا ەلىندە كەزدەستىك.

وسى جىلدىڭ 6-قاراشا كۇنى اباي اتىنداعى قازاق ۇلىتتىق ۋنيۋەرسيتەتىنىڭ ماگيسترانتتارى سالاۋاتىمىزبەن "شەتەلدە ءبىلىم اسىرۋ" باعدارلاماسى بويىنشا ليتۆا ەلىنە قادام تاستادىق. ماقساتىمىز سونداعى مەملەكەتتىك وقۋ- اعارتۋ ۋنيۋەرسيتەتىنىڭ پروفەسسورلارىنان لەكتسيا تىڭداپ ، تاجىريبە الماستىرىپ، وي   ءورىسىمىزدى كەڭەيتۋ. ءبىز قوناقجايعا تۇستەنىپ جاتقاندا   ليتۆا ەلىنىڭ استاناسى ۆەلنيۋس قالاسىندا ءبىلىم الىپ جاتقان قازاق قىزى اتا مەكەنىنەن جەرلەستەرى كەلگەنىن ەستىپ،  ءبىزدى ىزدەپ كەلدى. اتالعان جەرلەسىمىزدىڭ اتى-ءجونى مەرۋەرت سۇلەيمەنوۆا.

مەرۋەت سۇلەيمەنوۆا   1994 -جىلدىڭ تۋماسى.  2015 -جىلى الماتىداعى اباي اتىنداعى قازاق ۇلىتتىق پەداگوگيكالىق ۋنيۋەرسيتەتىنىڭ حيميا ماماندىعىنا ماگيسىتراتۋراعا قابىلدانعان.   2016 -جىلى   اباي اتىنداعى قازاق ۇلىتتىق ۋنيۋەرسيتەتىندە اكادەميالىق ۇتقىرلىق باعدارلاماسى بويىنشا ەكى كەزەڭنەن تۇراتىن سىناقتان ءوتىپ، ليتۆا ەلىندەگى 450  جىلدىق تاريحى بار ۆەلنيۋس ۋنيۋەرسيتەتىندە ءبىلىم اسىرۋعا مۇمكىندىك الادى. ارمانىنا قانات بايلاعان قازاق قىزى ءوز وقۋ ورىنىنىڭ دەمەۋىمەن بيىلعى قىركۇيەك ايىنان باستاپ ليتۆا ەلىندە ءبىلىم الۋدا.

مەرۋەت بىزگە ليتۆا ەلىنىڭ ءبىلىم بەرۋ جاعىنداعى ەرەكشەلىكتەرى تۋرالى ايتىپ بەردى. «قازاقستان مەن ليتۆا مەملەكەتىنىڭ جوعارى وقۋ ورىندارىنىڭ ءبىلىم بەرۋ جۇيەسى اراسىندا اسا ۇلكەن ۇقساماستىقتار جوق. ەكى ەلدىڭ دە وقىتۋشىلارىنىڭ ءدارىس كەزىندە قولداناتىن ءادىس-تاسىلدەرى دە نەگىزىنەن ۇقساس. ايتا كەتۋگە تاتيتىنى   ليتۆا ەلىندە ستۋدەنتتەردىڭ ءبىلىم الۋىنا تاماشا جاعداي جاراتىلعان. مىسالى، تاۋلىك بويى جۇمىس ىستەيتىن  كىتاپحانا ءبىلىم ءنارىن ىزدەگەن ءار   ستۋدەنىتكە ىزدەنۋدىڭ قولايلى ورتاسى.  بۇل ۋنيۋەرسيتەتتىڭ   كىتاپحاناسى مول كىتاپ قورىمەن باي، ءارى بارلىق جاڭا تەحنولوگيالارمەن جابدىقتالعان»،- دەيدى. سونىمەن بىرگە ول ليتۆا حالقىنىڭ انا تىلىنە دەگەن قۇرمەتىن تىلگە تيەك ەتتى.   

«ليتۆا ەلىنەن العان  ەرەكشە اسەرىمنىڭ ءبىرى  ليتۆا حالقىنىڭ انا تىلىنە دەگەن ەرەكشە قۇرمەتى مەن سۇيىسپەنشىلىگى، ءارى مۇنداعى جاستاردىڭ انا تىلىمەن قوسا اعىلشىن تىلىندە  ەركىن سويلەسۋى بولدى»،- دەيدى مەرۋەت سۇلەيمەنوۆا.

ءوز ماماندىعىنىڭ سوڭىنا ءتۇسىپ، تۋعان ەلى مەن جۇرتىنا ۇلەس قوسسام دەپ جۇرگەن قازاقتىڭ قىزى تەك اتا-اناسىنىڭ عانا ەمەس، ەلىنىڭ ماقتانشى بولۋعا لايىق ەكەنىن، شەتەلدە ءبىلىم الۋ ۇلكەن جاۋاپكەرشىلىكتى تالاپ ەتەتىنىن، ءوز ەلىنىڭ سەنىمىن اقتاپ، ابرويىن ارتتىرۋ ءوزى سەكىلدى ءاربىر زيالى جاستىڭ مىندەتى ەكەنىن اڭعارتقانداي.

دۇيسەنالى ءالىماقىن   

اباي اتىنداعى قازاق ۇلىتتىق پەداگوگيكالىق ۋنيۋەرسيتەتىنىڭ 2-كۋرس ماگيسىترانتى